Keshe tańǵy saǵat tórt shamasynda «Metalýrg-3» baý-baqsha qoǵamdastyǵynyń aýmaǵynda órt shyqty. Janyp jatqan úıde qalyp qoıǵan alty jastaǵy bala men áıel adamdy kórshisi qutqaryp qaldy, dep habarlaıdy Qamshy.kz aqparat agenttigi Altaynews.kz saıtyna silteme jasap.

Anyqtalǵandaı, jer úıdiń aǵashtan turǵyzylǵan qabyrǵalary men shatyry janǵan eken.

Osy ýaqytta kórshi úıde bolǵan Merýert Temerbaeva esimdi azamatsha órtti der kezinde baıqap, ózi jalǵyz janyp jatqan úıden áıel men balany tysqa alyp shyǵypty.

Bolǵan oqıǵa jaıly eki adamdy qutqaryp qalǵan Merýert Temerbaeva baıandap berdi:

- Órt shamamen túngi saǵat úshterden kete, tórtke taıaý bastalǵan eken. Anamnyń úıinde qonaqta bolǵanmyn, ózim ol úıde turmaımyn. Órtengen úı bizge qarama qarsy ornalasqan. Anamnyń uıqysy saq. Túnde terezege jaryq túskende birden oıanyp ketipti. Meni de oıatty. Úıdiń órtenip jatqanyn kóre sala men esh kıimsiz túngi ish kóılegimmen tysqa júgirip shyqtym. Ol kezde órt endi bastalyp kele jatqandyqtan, úıdiń ishine kirip kete aldym. Óte qorqynyshty. Kishkene bala qatty kúıip qalǵan. Ony kóterip tysqa alyp shyǵyp, ile-shala jas kelinshekke bolystym, - deıdi Merýert Temerbaeva.

Janyp jatqan úıden alyp shyqqan áıel adam: «Úıde kúıeýim qalyp qoıdy, oǵan kómektesińizshi», - dep jalynǵan eken. Biraq qyzyl jalynnyń qarqyny kúsheıe túskendikten, Merýert úıge qaıta kire almaǵan.

- Onyń ústine er adamdy jalǵyz ózim kóterip shyǵarýǵa shamam de kelmeıdi. Meniń ornymda er adam bolsa, múmkin ony da aman alyp qalar ma edi, kim bilsin,  - deıdi ol.

Merýert daýystap aıǵaılap, mańaıdaǵy kórshilerdi kómekke shaqyra bastaǵan. Alaıda tańǵy tórtte shyrt uıqyda jatqandar estimegen bolý kerek, eshkim kómekke kelmeıdi.

- Qaıta anamnyń úıine kirip, apaıymdy oıattym. Ekeýimiz birge jedel járdem men órt sóndirý qyzmetin shaqyrttyq.

Zardap shekkender balalar aýrýhanasy men 1-shi qalalyq aýrýhananyń jansaqtaý bólimine jetkizilgen. Jaǵdaılary aýyr.

Jalyn joıqyn bolǵandyqtan, baspana tolyqtaı órtengen. Órtti aýyzdyqtaý úshin qosymsha taǵy bir avtosısterna jiberilipti. Órt sóndirý barysynda órtenip ketken er adamnyń máıiti tabylyp otyr. Qazir onyń jeke basy anyqtalýda.

Usynǵan: Nazerke Labıhan