Ataýly áleýmettik kómek alýǵa ótinishterdi qaraý tártibi jarıalandy dep habarlaıdy Qamshy.kz aqparat agenttigi enbek.gov.kz  saıtyna silteme jasap.

Qazaqstan Respýblıkasynyń Tuńǵysh Prezıdenti - Elbasynyń tapsyrmasyna sáıkes, 2019 jyldyń 1 sáýirinen bastap ataýly áleýmettik kómek kórsetýdiń jańa formaty engizilgeni belgili.

Alǵashqy eki kún ishinde jergilikti atqarýshy organdarǵa 73 364 adam ótinish bildirdi, onyń ishinde 33 432 adam AÁK taǵaıyndaýǵa ótinish berdi. Bul rette azamattardyń basym bóligi halyqty jumyspen qamtý ortalyqtaryna júgindi. Nur-Sultan jáne Almaty qalalarynda aýdandyq ákimdikterde ótinishterdi qabyldaý boıynsha qosymsha pýnktter ashyldy.

Alǵashqy kúnder ótinish bergen adamdardyń sanyn eskere otyryp, AÁK taǵaıyndaý tártibin túsindirý qajet dep sanaımyz.

1-kezeń: qujattardy qabyldaý jáne qalyptastyrý

Jumyspen qamtý ortalyqtarynyń qyzmetkerleri ótinishterdi qabyldaıdy jáne memlekettik organdardyń elektrondyq bazasyn paıdalana otyryp, qajetti qujattardy derbes jınaıdy. Aqparattyq júıelerde málimetter bolmaǵan jaǵdaıda memlekettik organdarǵa jazbasha suraý salý jiberiledi. Bul rette ótinish berýshiler qajetti qujattardy óz betinshe usyna alady.

2-kezeń: qujattardy ýchaskelik komısıaǵa tapsyrý

Bir jumys kúni ishinde jınalǵan qujattar ýchaskelik komısıaǵa jiberiledi. Komısıa quramyna jergilikti memlekettik basqarý organdarynyń, qoǵamdyq birlestikterdiń, úı-jaılardyń (páterlerdiń) menshik ıeleri kooperatıvteriniń, halyqtyń, bilim berý, densaýlyq saqtaý, áleýmettik qorǵaý uıymdary men ýákiletti organdardyń, quqyq qorǵaý organdarynyń ókilderi kiredi.

3-kezeń: ótinish berýshiniń materıaldyq jaǵdaıyn tekserý

Qujattar kelip túsken kúnnen bastap úsh jumys kúni ishinde komısıa ótinish berýshiniń (otbasynyń) úıine baryp, onyń materıaldyq jaǵdaıyna tekserý júrgizedi. Atap aıtqanda, turǵyn úı-turmystyq jaǵdaı, jeke qosalqy sharýashylyqtyń bolýy jáne muqtajdyqtyń basqa da belgileri eskeriledi.

Tekserý nátıjeleri boıynsha materıaldyq jaǵdaı aktisi jasalady, onyń negizinde Jumyspen qamtý ortalyǵyna ataýly áleýmettik kómek usyný qajettiligi týraly qorytyndy beriledi.

Sonymen birge, aýdandyq komısıalar ótinish berýshiniń (otbasynyń) materıaldyq jaǵdaıyn zerttegen kezde foto- vıdeofıksasıa quraldaryn paıdalaný qarastyrylmaǵan.

Aıta ketý kerek, jergilikti atqarýshy organdar jeke qosalqy sharýashylyqty tabys kózi retinde anyqtaýǵa quqyly.

4-kezeń: AÁK taǵaıyndaý týraly sheshimniń jobasyn daıyndaý

Jumyspen qamtý ortalyǵy alynǵan qujattar men ýchaskelik komısıanyń qorytyndysy negizinde AÁK taǵaıyndaý týraly sheshimniń jobasyn daıyndaıdy jáne ony jumyspen qamtý jáne áleýmettik baǵdarlamalar bólimderine jiberedi.

5-kezeń: ýákiletti organda qaraý

Ýákiletti organ úsh jumys kúni ishinde qujattardy tekseredi jáne ataýly áleýmettik kómek taǵaıyndaý ne odan bas tartý týraly sheshim qabyldaıdy. Málimetter jetispegen jaǵdaıda qujattar jumyspen qamtý ortalyǵyna qaıtarylady, ol ótinish berýshimen birge úsh jumys kúni ishinde qujattar paketin durystaıdy.

6-kezeń: ótinish berýshige habarlama berý

Sheshim qabyldanǵan kúnnen bastap bes jumys kúni ishinde jumyspen qamtý ortalyǵy ótinish berýshini habardar etedi.

Budan buryn ataýly áleýmettik kómek alǵan adamdarǵa qujattardy qaıta tapsyrýdyń qajeti joq ekenin atap ótken jón. Jergilikti atqarýshy organdar shamamen 60 myń otbasynyń nemese 300 myń adamnyń derekterin ózektendirdi, olarǵa buryn taǵaıyndalǵan AÁK somalaryn qaıta esepteý júrgiziledi.

Usynǵan: Maqpal Sembaı