Sabaqtastyq – El damýynyń úlgisi

Elimiz óziniń damýynyń jańa kezeńinde Táýelsizdik jyldary qalyptasqan saıası turaqtylyq, qýatty ekonomıka men sapaly áleýmettik jetildirilýler aıasynda qaryshtap keledi. Tórtkúl dúnıemen úılesimde álemdik tanymaldylyqqa qol jetkizdi. HHİ ǵasyr – adamzat qaýymy úshin jańarýlar zamany. Bul uly ózgerister úderisi Qazaqstan Respýblıkasynyń da damý jolyn anyqtaýda.

         Táýelsizdik jyldary júz jylda júzege asatyn isterdi atqaryp, álemdegi eń damyǵan elý el qataryna qosyldyq. Bul oraıda bilim sapasynyń ókili retinde memleketimizdiń adam kapıtalyn daıyndaý sapasyn arttyrý jolyndaǵy saıasaty boıynsha ulttyq mazmunda tárbıe berip, álemdik bilim keńistigi mazmunymen úndesýdi júzege asyryp jatqanyn uly is dep bilemin. Naqtyraq aıtsam, «Bolashaq» baǵdarlamasy, Nazarbaev ýnıversıteti, Nazarbaev zıatkerlik mektepterine baǵdarlaný júzege asýda. Osy jylda júzdegen jańa mektepter men bala baqshalar boı kóterdi. Muǵalimderdiń biliktilik sapasy arttyryla tústi t.s.s.

Elbasy Nursultan Ábishuly Nazarbaev 19 naýryzdaǵy Qazaqstan Halqyna Úndeýinde: «Árbir urpaqtyń atqaratyn óz mindetteri bar. Men jáne meniń zamandastarym elimiz úshin qoldan kelgenniń bárin jasadyq. Álem ózgerip, jańa býyn keledi. Bul – tabıǵı proses. Olar óz zamanynyń problemalaryn sheshetin bolady. Sondaı-aq elimizdi odan ári órkendetý úshin bar kúsh-jigerin jumyldyrýǵa tıis,» - dep, konstıtýsıalyq negizde Qazaqstan Respýblıkasynyń Prezıdenti ókilettigin toqtatý týraly sheshimin jarıalady.

         Qazaqstandyqtar jáne álem qaýymdastyǵy bul sheshimdi, eń aldymen, memlekettiń keleshegine, saıası turaqtylyqqa jáne budan ári qaraıǵy Qazaqstannyń damýyna baǵyttalǵan kemeńgerlik kadam dep qoldap qabyldady.

         Qazaqstandaǵy bılik sabaqtastyǵy konstıtýsıalyq turǵydan rettelgen. Prezıdenttiń ókilettigi merziminen buryn toqtatylǵan jaǵdaıǵa baılanysty onyń ókilettigi qalǵan merzimine Senat tóraǵasyna berildi. Osy negizde Qazaqstan Respýblıkasynyń Prezıdenti Qasymjomart Kemeluly Toqaev 9 sáýirde Qazaqstan halqyna QR Prezıdenti ókilettigi boıynsha kezekten tys Qazaqstan Respýblıkasy Prezıdentin saılaý merziminiń 2019 jyldyń 9 maýsymyna belgilengeni týraly tarıhı Úndeý jarıalady.

         Jańa Úndeýde Qazaqstan Respýblıkasynyń Prezıdentin saılaýdy kezekten tys ótkizý sheshiminiń saıası-ekonomıkalyq jáne áleýmettik negizderi jáne ózektiligi jan-jaqty kórsetildi. QR Prezıdenti sonymen qatar QR Prezıdentin kezekten tys saılaý meıilinshe ashyq, ádil jáne demokratıalyq sıpatta ótetinine senim bildirip, qazaqstandyqtardy jańa saılaýǵa belsendi qatysýǵa shaqyrdy.

         Bizder muǵalimder qaýymy, memleketimizdiń bilim saıasatyn júzege asyrýshylar retinde, Elbasy N.Á.Nazarbaev bastamashylyǵymen belgilengen baǵdarlamalardyń odan ári sapaly júzege asýynda bul kezekten tys saılaý nátıjeleri asa mańyzdy dep bilemiz. Elimizdiń damý joly «Qazaqstan – 2050» strategıasynda t.b. baǵdarlamalarda aıqyn belgilengen. Bizdiń mindetimiz – Elbasy salyp bergen sara jolmen usynǵan ıdeıalaryn júzege asyrýǵa aıanbaı atsalysý. Jańa saılaý osy izgi nıetimizge jetýde ıgi yqpal etedi dep oılaımyn.

         Táýelsiz Qazaqstannyń jarqyn keleshegi úshin, Elbasynyń strategıalyq baǵdarlamalarynyń saltanat qurý úshin, damýdaǵy sabaqtastyq úshin QR Prezıdentin saılaýǵa bir kisideı qatysýǵa shaqyramyn.

Aıagúl Tóreqyzy Mırazova                                                                                                  

                                 Qazaqstannyń Eńbek Eri,                                                                                 

«Altyn juldyz», «Otan» ordenderiniń ıegeri                                                                                 

 Qazaqstanǵa eńbegi sińgen qyzmetker,

Almaty qalasynyń,

Jambyl oblysynyń,

Jýaly aýdanynyń

Qurmetti azamaty