Aǵymdaǵy jylǵy 26-sáýirde QR Premer-Mınıstriniń orynbasary G. Ábdiqalyqovanyń jetekshiligimen Úkimettik delegasıa Almaty qalasynda Elbasynyń "Áleýmettik qamqorlyq" jańa áleýmettik sharalarynyń negizgi baǵyttaryn túsindirý jumysyn jalǵastyrdy dep habarlaıdy Qamshy.kz aqparat agenttigi QR Eńbek jáne halyqty áleýmettik qorǵaý mınıstrliginiń resmı saıtyna silteme jasap. 

Túske deıin Vıse-premer G. Ábdiqalyqova, QR eńbek jáne halyqty áleýmettik qorǵaý mınıstri B. Saparbaev, qala ákimi B. Baıbek "Baqytty otbasy" jáne "Belsendi uzaq ómir" jol kartalarynyń iske asyrylýy jóninde keńes ótkizdi.

QR Tuńǵysh Prezıdenti – Elbasy N. Nazarbaevtyń tapsyrmasy boıynsha elimizde jańa áleýmettik saıasat iske asyrylyp jatyr. Basty mindet — azamattardyń turmys sapasy men ál-aýqatyn arttyrý.

Búginde qalada kóp balaly analar men qart adamdardy qoldaýǵa baǵyttalǵan "Baqytty otbasy" jáne "Belsendi uzaq ómir" jol kartalary júzege asyrylyp jatyr. 13 shara qarastyrylǵan Jol kartasy bekitildi. Jumysy "bir tereze" qaǵıdasy boıynsha júrgiziletin "Baqytty otbasy" ortalyǵy ashylýda. Onda zańgerler, psıhologtar, jattyqtyrýshylar jáne t.b. jumys isteıtin bolady. "Baqytty otbasy" qaıyrymdylyq qory qurylyp, mesenattar men jurtshylyqtyń arqasynda 131 mln teńgeden astam qarajat jınap úlgerdi. 1 myńnan astam otbasyǵa materıaldyq kómek kórsetildi.

Almaty elimizde alǵash bolyp "Baqytty otbasy" jeńildetilgen turǵyn úı baǵdarlamasyn iske qosty. Mamyr aıynda 30 otbasyny baspanamen qamtamasyz etý josparlanyp otyr. Qazirgi áleýmettik tólemderdiń mólsheri ósti. Atap aıtqanda, ómirdiń qıyn jaǵdaıyna tap bolǵan azamattarǵa beriletin bir jolǵy áleýmettik kómek 10 aılyq eseptik kórsetkishten (25 250 teńge) 20 aılyq eseptik kórsetkishke deıin (50 500 teńge) kóbeıdi. Bul sharamen 10 myńnan astam otbasy qamtylatyn bolady.

Sodan keıin G. Ábdiqalyqova jáne B. Saparbaev aýdandardyń ákimderimen, iri kásiporyndardyń, bıznes-qurylymdar men kásipodaq uıymdarynyń basshylarymen kezdesý ótkizip, onda áleýmettik áriptestik máselelerin talqylady.

2015 jyldan bastap bıznestiń áleýmettik jaýapkershiligi aıasynda 25,7 mlrd teńgege 40-tan astam joba iske asyrylyp keledi. Búginde 21,6 mlrd teńge somasyna 32 joba iske asyryldy. 7 balabaqsha, 1 emhana, feldsherlik-akýsherlik pýnkt jáne t.b. salyndy.

Vıse-premer kóp balaly analarmen kezdesýde memleket azamattardyń az qamtylǵan sanattaryna áleýmettik qoldaý kórsetýge baǵyttalǵan sharalar qabyldap jatqanyn atap ótti. 1 sáýirden bastap ataýly áleýmettik kómek kórsetý krıterııleri eń tómengi kúnkóris deńgeıiniń 70%-na deıin artyp, 20 789 teńgeni qurady, mamyr aıynan bastap jalǵa beriletin turǵyn úı bóline bastaıdy, al 1 maýsymnan bastap búdjet salasynyń jalaqysy tómen qyzmetkerleriniń eńbekaqysy kóbeıedi. Bilim berý jáne densaýlyq saqtaý júıesindegi qyzmetterdiń sapasyn arttyrý boıynsha sharalar qabyldanatyn bolady. Sondaı-aq jumys tobynyń músheleri jańa áleýmettik saıasat aıasynda iske asyrylyp jatqan jańalyqtar týraly aqparat berdi.

S. Asfendıarov atyndaǵy Ulttyq medısına ýnıversıtetiniń jataqhanasyn aralaý barysynda Premer-Mınıstrdiń orynbasary "Elbasynyń bes áleýmettik bastamasyn" iske asyrý aıasynda QR Tuńǵysh Prezıdentiniń tapsyrmasynyń oryndalý barysymen tanysty.

Gúlshara Ábdiqalyqova jumys saparynyń sońynda joǵary oqý oryndarynyń rektorlarymen kezdesý ótkizdi. Kezdesýde stýdent jastardyń ómir súrý jaǵdaıyn jaqsartý jónindegi úshinshi bastamanyń iske asyrylýy týraly aqparat tyńdaldy, joǵary bilim berýdegi ózekti máseleler talqylandy.

Joǵaryda atalǵan bastamany oryndaý úshin qalada stýdentter jataqhanalaryn salý jumysy jalǵasýda. 39 joǵary oqý orny jumys isteıdi, onda 149 myń adam bilim alady, onyń 92 myńnan astamy basqa qalalardan kelgen stýdentter. Barlyǵy 95 jataqhanada 30 myń (33%) stýdent turady. 

2018 jyly joǵary oqý oryndarynyń óz qarajatynyń esebinen 1200 orynǵa arnalǵan 3 jataqhana paıdalanýǵa berildi. 2019 jyly da óz qarajattary esebinen 2 340 orynǵa arnalǵan 5 jataqhanany aıaqtaý josparda bar.

Kezdesýdiń qorytyndysy boıynsha QR Premer-Mınıstriniń orynbasary G. Ábdiqalyqova jataqhanalardy ýaqytyly jáne sapaly paıdalanýǵa berýdi qamtamasyz etý, stýdentterge qolaıly jaǵdaılar jasaý úshin qajetti sharalar qabyldaý jóninde joǵary oqý oryndarynyń rektorlaryna, memlekettik organdardyń basshylaryna birqatar naqty tapsyrmalar berdi.

Usynǵan: Ádilet Mádenıet