«Rýhanı jańǵyrý» baǵdarlamasy  aıasynda Jambyl oblysy, T.Rysqulov aýdanyndaǵy   Qulan agrotehnıkalyq kolejinde tehnıkalyq jáne kásiptik bilim berý uıymdarynda oqyp jatqan  stýdentter arasynda respýblıkalyq «Úzdik veterınar-2019» kásibı sheberlik baıqaýy ótti.

Saıystyń maqsaty – veterınarıa mamandaryn daıyndaıtyn tehnıkalyq jáne kásiptik bilim berý uıymdarynyń arasynda yntymaqtastyq ornatý, ozyq tájirıbelerdi anyqtaý jáne stýdentterdiń kásibı quzirettiligin damytý.

Baıqaý  oblys ákimdigi bilim basqarmasy basshysynyń orynbasary mindetin atqarýshy Saıasat Eseevtiń alǵy sózimen ashyldy. Budan keıin aýyl sharýashylyǵy mınıstrliginiń oblystyq veterınarıalyq baqylaý jáne qadaǵalaý komıtetiniń oblystyq aýmaqtyq ınspeksıasynyń basshysy Ospan Berdıarov sóz alyp, qatysýshylarǵa sáttilik tiledi.

Baıqaýda Almaty oblysy bilim basqarmasynyń Taldyqorǵan agrotehnıkalyq kolejiniń, Qyzylorda oblysy bilim basqarmasynyń I.Ábdikárimov atyndaǵy Qyzylorda agrarlyq tehnıkalyq joǵary kolejiniń, Túrkistan oblysy bilim basqarmasynyń Túrkistan joǵary agrarlyq kolejiniń, Qaraǵandy oblysy bilim basqarmasynyń Myńjasar Ádekenov atyndaǵy Qarqaraly aýylsharýashylyq kolejiniń, Túrkistan oblysy bilim basqarmasynyń Qaplanbek joǵary agrarlyq tehnıkalyq kolejiniń, Almaty oblysy bilim basqarmasynyń Eýrazıa agrarlyq kolejiniń, oblys ákimdigi bilim basqarmasynyń Qordaı aýyl sharýashylyǵy kolejiniń, Qostanaı oblysy ákimdigi bilim basqarmasynyń Sarykól agrobıznes jáne quqyq kolejiniń jáne Shyǵys Qazaqstan aýylsharýashylyq kolejderiniń stýdentteri qatysyp, baq synady.

Úsh modýl boıynsha ótken saıysta aldymen «Vızıt kartochkasy» modýlinde baıqaýǵa qatysýshylar ózi jáne mamandyǵy, oqıtyn oqý orny, óńirde jıi kezdesetin mal sharýashylyǵyndaǵy indet týraly prezentasıasymen tanystyrsa,  ekinshi  «Testileý» modýlinde stýdentterdiń «İndettaný mıkrobıologıasymen», «Parazıtologıa jáne ınvazıalyq aýrýlar», «İshki juqpaıtyn aýrýlar», «Akýsherlik gınekologıa jáne kóbeıý bıotehnıkasy» pánderinen bilimi test tapsyrmalary arqyly tekserildi. Úshinshi  «Tájirıbelik daǵdylar» modýlinde úmitkerler mıkroskopıa júrgizý, janýarlarǵa dári egý, aýyl sharýashylyǵy janýarlaryn klınıkalyq tekserý tájirıbelik tapsyrmalaryn oryndaý daǵdylary men kásibı quzirettilikteri boıynsha kolejdiń veterınarıalyq klınıkasynda saıysqa tústi.

Qazylar alqasynyń baıqaýǵa qatysýshylardyń kásibı sheberligin baǵalaýy elektrondy túrde júrgizildi. Saıys qorytyndysy boıynsha shyǵysqazaqstandyq Toǵjan Asqarbek İ orynan kórinse, İİ orynǵa Taldyqorǵan oblysynan kelgen Sanjar Tleýjan jáne shyǵysqazaqstandyq Jansaıa Bazar laıyq dep tanyldy. Qyzylordadan kelgen qatysýshy Rýslan Balabek, qostanaılyq Vıktorıa Gavrılova jáne Túrkistan óńiriniń úkilep qosqan úmiti  Arsen Orynbek İİİ oryndy mise tutty. Sondaı-aq «Jeńiske qushtarlyǵy úshin» nomınasıasy boıynsha Túrkistan joǵary agrarlyq kolejiniń stýdenti Edige Maldybaı, Qaplanbek joǵary agrarlyq tehnıkalyq kolejiniń stýdenti Nurdáýlet Absamat jáne qaraǵandylyq  Mereı Dáriǵul marapattaldy.

Jaıdar Azamat