Elimiz egemendik alǵaly beri aýyl sharýashylyǵyn damytý máselesi kún tártibinen túsken emes. Elbasy-Qazaqstan Respýblıkasynyń Tuńǵysh Prezıdenti N.Nazarbaev Qazaqstan halqyna jyl saıynǵy Joldaýlarynda agroónerkásip keshenin damytý máselesin nazardan tys qaldyrǵan joq. Memleket basshysy Qasym-Jomart Toqaev ta salaǵa serpilis syılaý maqsatynda strategıalyq maqsattar qoıyp otyr.

Aýyl sharýashylyǵyn damytý máselesi aıtylǵan jerde veterınarıalyq qaýipsizdiktiń de qatar júretindigi daýsyz.

Búginde Jambyl oblysynyń aýmaǵynda enzootıalyq aýrýlarǵa qarsy kúresti júrgizýge 388 mıllıon teńge bólinip, múıizdi iri qara malynyń teılerıoz aýrýyna, jylqynyń saqaýyna jáne aýyl sharýashylyǵy maldarynyń salmonellez (qylaý) aýyrýyna qarsy egiletin vaksınalary alynyp, aldyn alý jumystary josparǵa sáıkes júrgizilýde.

Budan bólek oblys kóleminde azyq-túlik ónimderiniń qaýipsizdigin qamtamasyz etýdi baqylaý jáne qadaǵalaý jumystary júrgizilýde. Óńirde 14 stasıonarlyq 4 jyljymaly veterınarıalyq-sanıtarıalyq laboratorıa jumys atqarýda.

Sonymen qatar aımaqta 10 mal soıý pýnkti, 50 mal soıý alańy, 3 et óńdeý kombınaty jáne 1 qus óńdeý kásiporny jumys isteıdi.

Oblys boıynsha mal ólekselerin zalalsyzdandyratyn 41 bıotermıalyq shuńqyr jáne mal ólekselerin órteıtin 16 stasıonarly, 5 jyljymaly barlyǵy 21 ınsınerator iske qosylǵan.

Barlyq veterınarıalyq nysandar veterınarıa bólimderimen baqylaýǵa alynyp, veterınarıalyq zańnama talaptary buzǵylǵan jaǵdaıda Ákimshilik quqyq buzýshylyq kodekisiniń 406 babymen aıyppul salynýy tıis.

Oblys ákimdigi veterınarıa basqarmasynyń basshysy Ospan Berdıarovtyń aıtýynsha, aımaq boıynsha 2019 jyldyń 9 aıynda zańdy jáne jeke tulǵalarǵa 8 mıllıon 509 myń 748 teńge aıyppul salynyp, veterınarıalyq-sanıtarıalyq talaptardy oryndaý úshin 1186 nusqama berilgen.

Sibir jarasy kómindileriniń kadastri boıynsha oblys aýmaǵynda 189 sibir jarasy oshaǵy belgilengen. Barlyq oshaqtar sanıtarıalyq-epıdemıologıalyq talaptarǵa sáıkestendirilip, turaqty jer paıdalaný quqyǵyn beretin aktisi alynyp, biryńǵaı avtomattandyrylǵan aqparattyq júıege engizilgen.