«1 postym  kemi 1 mıllıon! Oqyrmanym kóbeıgen saıyn, stavkam da ósedi».   Áleýmettik jelide belsendi otandyq juldyzdar jarnama jasap-aq mıllıoner atanyp júr. Biraq neni, kimdi jarnamalaý kerek? Oǵan basyn qatyrmaıdy, aqshasyn tólep berseń boldy. Kóbi teksermeıdi de. Aryqtatatyn dári, shaılarynan bastap, kıim-keshek, til kýrstary, lombard, bank, tis emhanalaryna deıin.  Ókinishtisi, óner adamdaryna ımandaı sengen halyqtyń arasynda opyq jep, aldanyp qalǵandary da jeterlik. Bul týraly Eýrazıa birinshi arnasy habarlaıdy.

«Taltańdasań taltańda, oqyrmanyń kóp bolsa ınstańda». Bireýdiń aqshasyn sanaýdan aýlaqpyz,biraq aıtpasań taǵy bolmaıdy. Mıllıondaǵan aýdıtorıasy bar juldyzdarǵa halyq ımandaı senedi. Ony kásipkerler de jaqsy biledi. Sol úshin  qansha surasa da tóleýge daıyn. Al óner adamdary úshin de keregi sol ǵoı. Aqshasyń tóleseń boldy, ne nárseniń bolsyn jarnamasyn jasap berýge ketári emes. Ony ózderi de jasyrmaı, talaı jerde aıtyp ta, jazyp ta júr. Kóbi tipti teksermeıdi de. Jarnamanyń túr-túri ásirese 4 mln oqyrmany bar ánshi Erke Esmahan men prodússer Baıan Maqsatqyzynyń paraqshalarynda eken.

Alaıda bul jarnama degenderdiń tek ber jaǵy ǵoı. Aryqtatatyn, emdep-jazatyn dárilerdi de maqtap, mańyna shań jýytpaıdy. Alaıda ózi  iship júrip, paıdasyn kórgennen emes, aqshasy tólengennen keıin.

«Mam, vse davaı ýlybaısá, ty ý mená segodná v kachestve aktrısy.  Ochen mnogıe mne pıshýt chto eto ne pravda,  ıa by hotela podelıtsá, pootomý chto vse hotát byt zdorovymı, krasıvymı, ý vseh estrodıtelı».

«Meniń barlyq  balalarymnyń tisin men dál osy ortalyqqa tapsyrdym. Sebebi bul jerde shynymen joǵary deńgeıdegi mamandar eken. Sondyqtan men ózimniń balalaryma tisimdi emdeýge dál osyndaı tamasha ortalyq tapqanyma ana retinde qýanyp otyrmyn. Jáne sol qýanyshpen sizben bólise otyrmyn».

Ony ánshiler shynymen tekserdi me, joq pa, ol jaǵyn bilmedik. Biraq bir nárse belgili. Ánshi Qaraqat Ábildına jarnamalaǵan tis emhanasynyń basy bálege qaldy.

ANASTASIA ZELENAIa, QALA TURǴYNY:

«Meniń qyzymdy stomotologıadyq kabınetke kirgizdi. Maǵan syrtta kúte tursyn dedi. Al 15 mınýttan keıin kabınetten dáriger atyp shyǵyp, jedel-járdemdi shaqyrdy. Men eshteńe túsinbedim. Qyzyma ne boldy dep suradym. Alaıda maǵan eshteńe aıtpady. Tek  jarty saǵattaı ótkennen keıin ǵana qyzyń komaǵa tústi dedi».

Tisin emdetemin dep qyzyn Qaraqat shań jýytpaı maqtaǵan elıtaly stomotologıalardyń birine  aparǵan elordalyq Anastasıanyń mine úsh apta boldy uıqysy qashty. Dárigerdiń salǵyrtyǵynan qyzy komaǵa túsken. Áli kúnge deıin jaǵdaıy aýyr.  Al bul oqıǵadan keıin emhanada arnaıy tekseris júrgizgen quzyrly organdar kóptegen zań buzýshylyqtardy anyqtaǵan edi.  Al ánshiniń ózi qandaı da bir pikir bildirýden bas tartty. Qyzyǵy ánshilerdiń ıa vaınerlerdiń ne jarnamalap júrgenderin eshkim teksermeıdi, súzgiden ótkizbeıdi. Árkim ózi qoja, ózi bı eken.

Alaıda, ózgenikin emes, ózinikin jarnamalap, ónimin paraqshasy arqyly halyqqa satyp júrgenderi de joq emes.

«Aýylǵa da «Tóresh shaı keldi dep, ordasyn talaı-aý saılaǵan. Sary samaýryn aq quman e-heı».

«Keń dastarhany jaınaǵan dep» basqalardykin ábden jarnamalap bitken Tóreǵalı endi ózi ónimine kóshti. Tek Qazaqstandy ǵana emes, kórshi Reseı men Qytaıdy baǵyndyrǵan Dımash ta qalyspaıdy. Ol sháıimen qatar ıis sýyn da shyǵardy.  Osyndaıda Qaırat Nurtas shette  qalsyn ba?

Hıti bolǵan «Iýnıvers» ánine arnap,  dál sondaı atpen ıis sý shyǵardy. Alaıda halyqqa unaı qoımady. Baǵasy da, jalpy ıisi de. Biraq, sonda da asyǵa alyp jatyr. Nege? Surasań, tanymal ánshiniń ózi shaǵyryp, maqtap otyr ǵoı, qalaı almaısyń deıdi.