Qyrǵyzstannyń burynǵy prezıdenti Asqar Aqaevtyń uly Aıdar Aqaev keshe túnde qaıtys boldy. Derekterge súıensek, onyń júregi kenetten ustap qalǵan. Bul týraly Akipress habarlaıdy. 

Aıdar Aqaev tiri bolǵanda eki aptadan keıin 44 jasqa tolatyn edi.

Aqaevtyń otbasynda 4 bala bar. Olar: Bermet, Aıdar, Saadat jáne Ilım.

Mektepti támamdaǵannan keıin ol Máskeý memlekettik ınstıtýty halyqaralyq qatynastar fakúltetine oqýǵa tapsyrady. Keıinnen Amerıkada oqyp júrip, sonda birneshe oqý oryndaryna emtıhan tapsyrady. Nátıjesinde Merılend ýnıversıtetin tańdaıdy. Ony 1999 jyly bitirip, halyqaralyq qarjy jáne menedjment salasy boıynsha maman atanady. 

Aqaevtyń balalary únemi buqaralyq aqparat quraldarynyń nazarynda boldy. Onyń birden-bir sebebi Aıdardyń medıa salasynda belsendi bolýy. Sondaı-aq ol  túngi klýbtar men meıramhanalarda jıi júrgendikten qoǵamda jıi talqyǵa tústi.

Eki áýlettiń úılený toıynan keıin Aıdar elge tanyla bastady. Iaǵnı, 1998 jyly ol Qazaqstannyń tuńǵysh prezıdenti Nursultan Nazarbaevtyń kishi qyzy Álıaǵa úılenedi. Alaıda bul neke uzaqqa barmaı, 2001 jyly erli-zaıyptylar ajyrasty.

Keıinnen Aıdar Aqaev ekinshi ret tanymal telejúrgizýshi Saıkal Chokýbaevaǵa úılenedi. 

Aıdar jeke bıznespen aınalysty. Biraq BAQ quraldary onyń jasaǵan bıznes-jobalaryn ákesiniń arqasynda júrgizip otyr dep joramaldady.

Ol 23 jasynda «Kazkommersbank» AAQ-nyń Qyrǵyzstandaǵy ókildigin basqardy, al 2001 jyly Qarjy mınıstriniń keńesshisi qyzmetin atqardy. Ol kezde bar bolǵany 25 jasta edi. Keıinnen Nurbek Turdyqulovpen birge "Bitel" mobıldi kompanıasynyń negizin qalady.

Birde ol jýrnalıserdiń el basshysynyń balalary bıznespen aınalysqany durys pa degen suraǵyna bylaı dep jaýap berdi.

- Men mundaı bolmaıdy degen TMD-nyń birde-bir elin bilmeımin. Barlyq jerde el basshylarynyń týystary qoldarynan kelgenshe bıznespen aınalysady. Bul qalypty qubylys. Al munyń el ekonomıkasyna zıany tıe me, joq pa, bul basqa másele, - dedi Aqaev. 

Sonymen birge ol qoǵamdyq jumystarmen aınalysty. Aıdar kútpegen jerden Ulttyq Olımpıada komıtetiniń prezıdenti bolyp saılandy. Ol eldiń sporttyq ómirinde eleýli iz qaldyra almady. 

2004 jyly Prezıdent Asqar Aqaev balalaryn úlken saıasatqa tartý týraly sheshim qabyldady. Ony kópshilik murager josparyn júzege asyrý saıasaty bolar dep túsindi. Biraq Aıdar Aqaevtyń ózi saıasatqa aralasqysy kelmeıtinin aıtty.

2005 jylǵy parlament saılaýynda «Alǵa, Qyrǵyzstan!» partıasy alǵan daýysqa kúmándanýshylardyń narazylyǵy jappaı tártipsizdikke ulasty. Bul, 2005 jylǵy 24 naýryzdaǵy oqıǵalarmen tuspa-tus keledi. 

Osynyń nátıjesinde, Asqar Aqaev pen onyń otbasy elden ketýge májbúr boldy. 

Sóıtip, Qyrǵyzstanda bıliktiń alǵashqy aýysýy bastaldy jáne jazalaý sharalary burynǵy tártipke tústi. 

Bas prokýratýra Aqaevtarmen kimniń jáne qalaı baılanysqanyn bilip, onyń birneshe qylmystyq iske barǵanyn anyqtady. Onyń ústinen memlekettik qarajatty urlaý, qarjylyq alaıaqtyq jáne kúsh qoldaný, basqa adamdardyń múlkin zańsyz paıdalaný boıynsha birneshe qylmystyq ister qaraldy.

Qyrǵyzstannan qashqannan keıin onyń esimi medıa salasynda múldem atalmady. Keıinnen Aqaevtyń Máskeýde turatyny belgili boldy.