Rámizdersiz memleket bolmaıdy. Qazaq tarıhynda ártúrli rámizder boldy. Mysaly, Abylaıdyń aq týy. Biraq bir ókinishtisi keńes dáýirinde olardyń eshqaısysyn saqtaýǵa múmkindikter jasalmady. Komýnıstik ıdeologıa onyń bárin eskiniń sarqynshaǵy dep qarastyryp tarıhı jádigerlerdi joıýǵa tyrysty. Búgingi mýzeılerden solardyń birde biriniń tabylmaýy osynyń aıǵaǵy.

Bul týraly tarıh ǵylymdarynyń kandıdaty Erdáýlet Berlibaev Qazaq ulttyq qyzdar pedagogıkalyq ýnıversıtetinde ótken memlekettik rámizder kúnine arnalǵan basqosýda aıtty.

Joǵary oqý ornynyń baspasóz qyzmetiniń taratqan aqparatyna súıener bolsaq, Zoom platformasynda uıymdastyrylǵan onlaın sharada Qazaq eliniń egemendigin aıqyndaıtyn ataýly datanyń mańyzy men máni basty áńgime ózegine aınalǵan.

Jıyndy Qyzdar ýnıversıtetiniń Áleýmettik damý jónindegi prorektory Jańagúl Sultanova ashyp, shara qatysýshylaryn ataýly kúnmen quttyqtady.

– Bolashaǵy baıandy, keleshegi kemel elimizdiń basty belgisi, ol – memlekettik rámizderimiz. Memlekettik rámizder – bul kez kelgen eldiń egemendigi men birtutastyǵyn beıneleıtin, onyń ajyraǵysyz atrıbýttarynyń biri. Qazaqstan Respýblıkasynda Memlekettik tý, Memlekettik eltańba jáne Memlekettik gımn memlekettik rámizder bolyp tabylady. Olardy resmı turǵyda qabyldaý isine qazaqstandyqtar aıryqsha kóńil bólgen. Bul óz kezeginde elimiz úshin qanshalyqty mańyzdy ekenin aıqyn ańǵartsa kerek, – dedi óz sózinde Jańagúl Sultanova.

Basqosýda Sh. Ýálıhanov atyndaǵy Tarıh jáne arheologıa ınstıtýty dırektorynyń orynbasary, tarıh ǵylymdarynyń kandıdaty Áýezhan Shashaev, ál-Farabı atyndaǵy Qazaq ulttyq ýnıversıtetiniń dosenti, tarıh ǵylymdarynyń kandıdaty Arman Jumádil, Nur Otan partıasy Almaty qalasy Almaly aýdandyq fılıaly tóraǵasynyń keńesshisi Saltanat Ahmetjanova, Qazaqstan Respýblıkasy Ulttyq ulany «Ońtústik» óńirlik qolbasshylyǵynyń podpolkovnıgi Arhat Táttimbetov jáne taǵy basqalar ataýly kúnniń ereksheligi, rámizderdiń óskeleń urpaqtyń boıynda ultjandylyq qasıetti qalyptastyrýdaǵy rólin áńgimeledi.

Atap aıtqanda, Áýezhan Shashaev rámizderdi qabyldaý barysyndaǵy oqıǵalarǵa sholý jasady.

– Táýelsizdigin endi jarıalaǵan elimiz úshin memlekettik rámizderdi qabyldaý rasynda da jeńil bola qoıǵan joq. Tıisti memlekettik organdar men mekemeler asa jaýapty isti jan-jaqty izdenispen, muqıat daıyndyqpen qolǵa aldy. Aldymen 1992 jyldyń basynda Joǵarǵy Keńestiń tóralqasy memlekettik sımvolıkany daıyndaý boıynsha jumys tobyn qurý týraly qaýly qabyldady. Osy qujatqa sáıkes arnaıy shyǵarmashylyq komısıa quryldy. Onyń quramyna belgili zańgerler men qoǵam qaıratkerleri kirdi. Kóp keshikpeı Eltańba, Tý jáne Ánuran jobalaryn jasaýǵa konkýrs jarıalandy, – dep atap ótti Áýezhan Shashaev.

Tarıhshynyń málimetinshe, rámizder jobalaryn jasaý konkýrsynda 600-den astam adam qatysqan eken. Memlekettik tý eskızderi beınelengen shyǵarmashylyq eńbekteri bar túsken ótinim 1200-di quraǵan. Sondaı-aq konkýrsqa bolashaq Eltańbanyń 245 sýret jobasy men 67 sýrettemesi jáne Ánurannyń 750 nusqasy usynylypty.

Esterińizge sala keteıik, Qazaqstannyń azattyǵyn aıshyqtaıtyn nyshandar osydan 28 jyl buryn bekitilgen bolatyn. Sodan beri atalǵan datany barsha otandastarymyz aıtýly mereke retinde atap ótip keledi.