Jaqynda Almaty qalasy soty sheshimimen Qazaqstan komýnıstik partıasy jabylǵany týraly aqparat qazaqstandyq BAQ-ta jarıalana bastady. Bul týraly «Qamshy» portaly «Azattyqqa» silteme jasaı otyryp habarlaıdy.

Elimizdegi árbir saılaý naýqany kezinde ǵana bas kóterip, belsendilik kórsetetin saıası partıalardyń arasynda aýys-túıis oryn alýy bek múmkin. Qazaqstan komýnıstik partıasynyń kenet jabylýy óz kezeginde saıası qurylymda jańa ózgerister bolatynyn ańǵartsa kerek-ti.

«Azattyqtyń» aqparatyna súıensek, komýnıstik partıany jabý týraly sheshimdi Almaty qalasy mamandandyrylǵan aýdanaralyq ekonomıkalyq soty qabyldaǵan.  Al partıanyń birinshi hatshysy sot sheshimin 10 táýlikten keıin biraq alǵan. Qazaqstan komýnıstik partıasynyń birinshi hatshysy Tóleýbek Maqyjanovtyń aıtýynsha, sottyń partıany jabý týraly sheshiminiń astarynda saıası mán jatyr. Degenmen, partıanyń ortalyq apparaty Semeı qalasynda ornalasqandyqtan almatylyq sot mundaı sheshimdi shyǵarýǵa quqyly emes eken. Osylaısha partıanyń basshylary aqyryna deıin kúresýge bel baılapty. Jaqyn arada appelásıalyq shaǵym túsirmekshi de eken.

 - Aqyryna deıin kúresemiz, BUU-nyń adam quqyǵy komıtetine deıin baramyz. Álgi sot prosesine Qazaqstan komýnıstik partıasy múshelerinen eshkim qatysqan joq. Partıanyń ortalyq apparaty Semeı qalasynda bolǵandyqtan, Almaty qalasy mamandandyrylǵan aýdanaralyq ekonomıkalyq soty mundaı sheshim shyǵara almaıdy. Budan erterekte ótken birinshi otyrysta prosesti Semeı qalasynda ótkizýdi suraǵanmyn. Sondyqtan Almatyǵa barýdan bas tarttym, - deıdi Tóleýbek Maqyjanov Azattyqqa.

Másele ushyǵy bylaı bastalǵan. QR Ádilet mınıstrliginiń partıa músheleriniń sany tizimde kórsetilgen mólshermen sáıkes kelmeıtindikten degen negizde jabylǵan-mys.  Tóleýbek Maqyjanovtyń aıtýynsha, kompartıa 58 myń adamnyń tizimin bergen, al mınıstrlik 38 myń adamnyń ǵana múshe ekenin alǵa tartqan. Bir qyzyǵy, partıa músheleriniń naqty sanyn bilý úshin eshqandaı uıym, quzyrly organdaǵylar qaıta sanaq júrgizbegen, tipti partıa jetekshelerine habarlaspaǵan da.  Al Qazaqstannyń saıası partıalar týraly zańyna sáıkes, partıany tirkeý úshin onyń kámeletke tolǵan 40 myń múshesi bolýy tıis.

Esterińizde bolsa, 2006 jyldary «Aqordalyq» saıası tehnologtardyń jobasy iske asyp, «Asar» partıasy jáne birneshe usaq partıalar bılikshil partıanyń qataryn keńeıtken edi. Ol kezde QR Prezıdenti Qazaqstandaǵy saıası partıalardyń birigýi munymen toqtamaıtynyn aıtqan-dy.  Iá, biz osyǵan deıin de saýdaǵa salynǵan saıası partıanyń lastanǵan saıasatyna kýá bolǵanbyz. Bir emes, birneshe márte.  Ideologıalyq básekesi joq «oıynshyq» partıalardyń bıleýshi partıanyń yǵyna jyǵylyp jatyp júrgizip júrgen saıasatyniń nátıjeli bolǵan biri de joq desek artyq aıtqandyq bolmas edi.  Saıası básekelestik  ornamaı jatyp, irili-usaqty partıalar bılik basyndaǵy partıalardyń quramyna qosylyp jatqandyǵy neni ańǵartady? Taǵy da partıalyq birigý saıasaty júrgizilmek pe? Onsyz da, Qazaqstandaǵy saıası elıta men bıshik partıalardyń jaǵdaıy Prezıdenttiń qas- qabyǵana baǵynyshty ekeni túsinikti. Qazaqstan kompartıasynyń ersi hám rasıonaldy túrde jabylyp qalýy nemese jaýyp tastaýy álemdegi ýranǵa eń baı jáne 50 jyldan bermen qaraı álemdegi munaı alpaýyttarynyń qatarynan kórinip júrgen Qazaqstannyń saıası partıalar keńistigindegi «uly birigý» ıdeıasyn ańǵartsa kerek. Bul kimge tıimdi? Bizdegi kóppartıaly júıe qurý maqsaty qaıda qalady?

Bul prezıdenttik partıanyń irilenýi – ıaǵnı, monopolıs partıanyń qurylýy, demokratıalyq qurylymnyń damýyna keri áserin tıgizbeı me?

Bılik tóńiregindegi usaq partıalardyń bıleýshi partıanyń quramyna kenet qosylýy – kezindegi keńestik partıanyń sulbasyn elestetetini belgili. Demek, ortalyq partıanyń irilenýi – totalıtarly júıeniń qaıta ornaıtynyn bildirmeı me?

Nurgeldi Ábdiǵanıuly