Hartıa ıdeıasynyń avtory, qoǵam qaıratkeri Aıgúl Soloveva aldaǵy saılaý prosesinde barlyq baqylaýshylardy biriktirýge shaqyra otyryp, osy qujat týraly aıtyp berdi.

Qazirgi kúni jeltoqsannyń basynda qurylǵan Hartıaǵa kún saıyn baqylaýshylar qosylyp jatyr. Osy oraıda biz saılaý prosesiniń barlyq qatysýshylaryna úndeý tastaımyz. Bul barlyq partıalarǵa, barlyq qoǵamdyq baqylaýshylarǵa, sondaı-aq osy saılaýdy uıymdastyrýshy memlekettik organdarǵa, ásirese OSK-ǵa qatysty. Saılaýdaǵy ádil jáne adal baıqaý týraly Hartıany jarıaladyq, - dep túsinderdi Aıgúl Soloveva.

Onyń aıtýynsha, qujat Adam quqyqtarynyń jalpyǵa birdeı deklarasıasynyń, BUU-nyń Azamattyq jáne saıası quqyqtar týraly halyqaralyq paktisiniń, Kopengagen keńesiniń qujatynda kórinis tapqan EQYU prınsıpteriniń, demokratıalyq saılaý standarttary týraly Konvensıanyń, elimizdiń Konstıtýsıasy men ulttyq zańnamany negizge ala otyryp jasaldy. 

Biz saılaý prosesine qatysýshylar retinde olardyń saqtalýyn qadaǵalaý jáne azamattardyń óz elin basqarýǵa qatysý quqyqtaryn iske asyrý arqyly saılaý quqyqtary men bostandyqtaryn qorǵaýdy qamtamasyz etý boıynsha qoǵamdyq sektor ókilderin tartýdy kózdeımiz, - deıdi qoǵam qaıratkeri.

Hartıanyń ustanymdary qandaı?

- saılaý prosesine ádil jáne adal baıqaý júrgizý, barlyq ishki jáne halyqaralyq baıqaýshylarmen ózara is-qımyl jasaý jáne yntymaqtasý;

- osy Hartıanyń erejelerine sáıkes el Konstıtýsıasyna, ulttyq zańnamaǵa jáne bılikke ókilettik halyqtyń erkine negizdelýge tıis degen halyqaralyq normalarǵa súıene otyryp áreket etý;

- halyqtyq erik bildirýdiń demokratıalyq ınstıtýttaryn jetildirýge yqpal etý, DIAQB baıqaýshylarynyń minez-qulyq kodeksin jáne obektıvtilik, anyqtyq, ashyqtyq, jaýapkershilik, jarıalylyq jáne zańdylyq qaǵıdattaryn ustaný;

- eldiń negizgi zańynda jáne quqyqtyq aktilerinde bekitilgen, halyqaralyq quqyqtyń jalpyǵa birdeı tanylǵan qaǵıdattary men normalaryna sáıkes keletin saılaý prosesi rásimderiniń saqtalýyn moıyndaý.

– Sonymen qatar, tıimdi qoǵamdyq jáne halyqaralyq baıqaýdaǵy saılaýdyń barynsha beıtaraptyǵyna qol jetkizý úshin saılaý prosesin uıymdastyrýǵa kómek kórsetý. Saılaý prosesiniń uıymdastyrylýyn baıqaý barysynda árbir azamattyń saılaý quqyqtarynyń kez kelgen buzylýyna den qoıý, qujattyq rastamasy bar obektıvti jáne dál aqparat, sondaı-aq, habarlanatyn aqparatty tekserý úshin jetkilikti aqparat berý. Sondaı-aq, baıqaý, zańnamany taldaý, saılaý aldyndaǵy naýqan monıtorıńi jáne saılaý daýlaryn qaraý baǵdarlamalaryn ázirleýge yqpal etýdi kózdeıdi, – dep atap ótti ol.

Aıgúl Soloveva saılaý prosesiniń barlyq qatysýshylary, ıaǵnı táýelsiz, halyqaralyq, partıalyq emes, partıalyq jáne BAQ-ty Hartıaǵa qosylýǵa shaqyrdy. Bul Hartıa ártúrli túsindirýlersiz biryńǵaı formatta qozǵalýǵa jáne naqty algorıtmmen alǵa jyljýdy usynady.