Shymkent qalasynyń ákimi Murat Áıtenov kezekti tikeleı efırde Memleket basshysynyń «Halyq birligi jáne júıeli reformalar - el órkendeýiniń berik negizi» Qazaqstan halqyna arnaǵan Joldaýynda aıqyndalǵan mindetterdi qala aýmaǵynda iske asyrýdyń júıeli tártibin jarıa etti.

Qala ákimi bul saıası qujatta memleket damýynyń strategıalyq basymdyqtary aıqyndalyp, ekonomıkalyq damý, densaýlyq saqtaý, bilim berý, óńirlik damý, taǵy basqa mańyzdy 7 baǵyt boıynsha iske asýy tıis mindetter belgilengenin atap ótti.

Qalanyń áleýmettik-ekonomıkalyq damýy Prezıdenttik Joldaý aıasynda qabyldanatyn Jalpyulttyq jospar boıynsha júzege asatynyn jetkizdi. Aıqyndalǵan basymdyqtardy tabysty iske asyrýǵa qalada barlyq múmkindikter bar ekenin atap ótken qala basshysy, bul baǵytta birqatar jumystardy júıeli atqarýǵa áleýetimiz jetetinin aıtty.

– Ekonomıkalyq ósimge qol jetkizýde kásipkerlikti qoldaýǵa 7 mlrd teńge baǵyttalyp, 2250 bıznes ókilderine qoldaý kórsetiletin bolady. «Bıznestiń jol kartasy» boıynsha 1 myń joba qamtylady. «Bıznestiń jol kartasy» jáne «Qarapaıym zattar ekonomıkasy» baǵdarlamalary aıasynda búginge deıin 57,4 mlrd teńgege 1 788 joba qarjylandyrylyp, 7,2 myń jumys orny ashyldy. Iaǵnı, qalada ashylǵan árbir úshinshi joba atalǵan baǵdarlama aıasynda iske asty.

«Qarapaıym zattar ekonomıkasy boıynsha bıylǵa josparlanǵan 80 jobanyń 61-i qarjylandyryldy. Qalanyń eksporttyq áleýetin arttyrýda «Juldyz» ındýstrıaldy aımaǵynda 200 mlrd teńgege 60 iri jobany, «Standart» jeke ındýstrıaldy aımaqta 180 mlrd teńgege 30 jobany iske asyrý múmkindigimiz bar. Halyqty azyq-túlik ónimimen tolyq qamtamasyz etý baǵytynda 2 agroındýstrıaldy aımaqtyń qurylysy bastaldy. Aýylsharýashylyq ónimderin tereń óńdeýde «Bozaryq» tamaq ónerkásibi ındýstrıaldy aımaǵy qurylyp, quny 23 mlrd teńgeni quraıtyn 21 joba iske asady, – dedi qala ákimi.

Shahar basshysy azyq-túlik taýarlarynyń baǵasyn turaqtandyrý, agroónerkásipti damytý sheńberinde 136 gektarǵa zamanaýı ónerkásiptik jylyjaı̆ keshenderi salynatynyn atap ótti. Munda 30 mlrd teńgege 20 joba júzege aspaq.

Búginde qalada 3 áleýmettik dúken jumys isteıdi. Jyl sońyna deıin qosymsha 7 áleýmettik dúken ashý josparlanýda. Sonymen qatar, 2025 jylǵa deıin 1 myń tósek oryndyq aýrýhana, 10 medısınalyq mekeme, 12 dárigerlik ambýlatorıa iske qosylmaq.

Qalanyń osy jáne ózge de múmkindikteri jóninde keńinen toqtalyp, tolyqqandy aqpar bergen qala ákimi, bilim berý, densaýlyq saqtaý, ınfraqurylymdyq damý, turǵyn úı qurylysy, sıfrlandyrý, buqaralyq sportty damytý, salaýatty ekojúıe túzý baǵyttary boıynsha belgilengen jumys kólemderine jeke-dara toqtaldy.

Turǵyndarmen tikeleı jeli barysynda azamattardan túsken saýaldarǵa jaýap berip, ózekti máselelerdi sheshýdegi josparly jumystardyń atqarylý barysyn baıandady.

Efırdi qorytyndylaı kele Murat Dúısenbekuly, Memleket basshysynyń Joldaýy memlekettik turǵydaǵy mejelerdi belgileıtinin atap ótip, el turmysyn túzeýge, azamattardyń ómir sapasyn arttyrýǵa qyzmet etetinin jetkizdi. Jumyla atqarǵan jumystyń nátıjeli bolatynyn aıtyp, turǵyndardy memlekettik mindetterdi birlese atqarýǵa shaqyrdy.