Separatızm babymen tergelip jatqan Petropavl qalasynyń úsh turǵynynyń málimdemesinde "Qazaqstannyń aýmaqtyq tutastyǵyn buzýdy nasıhattaý" belgileri bar ekeni anyqtaldy. Bul týraly Bas prokýror Berik Asylov habarlady. 

"2023 jylǵy 30 naýryzda Ulttyq qaýipsizdik komıtetiniń Soltústik Qazaqstan oblysy boıynsha departamenti «Petropavl qalasy eńbekshileriniń halyq keńesi» qurylǵany jónindegi vıdeony áleýmettik jelilerde ornalastyrý faktisi boıynsha QR Qylmystyq kodeksiniń 180-babynyń 2-bóligimen (separatıstik qyzmet) sotqa deıingi tergep-tekserý bastaǵan. Sol kúni quqyq qorǵaý jáne arnaıy memlekettik organdardyń tájirıbeli qyzmetkerlerinen vedomstvoaralyq jedel-tergeý toby quryldy. İs boıynsha proses prokýrorlary taǵaıyndaldy. Sotqa deıingi tergep-tekserý sheńberinde jedel-tergeý is-sharalary júrgizilýde. Alynǵan materıaldar boıynsha sot psıhologıalyq-fılologıalyq saraptamasy júrgizildi. Onyń qorytyndysy boıynsha materıaldarda Qazaqstan Respýblıkasyn ydyratýdy nasıhattaý, memleket qaýipsizdigine nuqsan keltirý, onyń aýmaǵynyń tutastyǵy men birligin buzýdy nasıhattaý belgileri bar", - delingen habarlamada.