Qytaıda joǵalǵan Álimnur Turǵanbaıdyń áıeli Gúldárıa Sherızat Almaty soty ózine aıyppul salǵanyn habarlady Azattyq radıosy. Bir kún buryn Gúldárıa Sherızat bala-shaǵasymen ákimdik aldyna baryp, ákimniń shyǵýyn talap etip, kúıeýin taýyp berýge kómektesýlerin suraǵan. Biraq aıtýynsha, ony polısıa ustap alyp, birneshe saǵat polısıada ustaǵan.

“Aıyppul tóleıtindeı jaǵdaıym joq, joldasymdy izdeımin be, álde aıyppulǵa aqsha izdeımin be? Odansha qansha táýlik bolsa da jatyp, sony ótep keteıin” desem “kámelet jasqa tolmaǵan balańyz bar eken” deıdi” dedi ol 7 tamyzda Azattyqqa.

Sot 6 tamyzda onlaın ótip, sýdıa Aldabek ony “beıbit jıyn ótkizý tártibin buzý” baby (488-bap, 7-bólik) boıynsha kináli dep tanyǵan.

Sot sheshiminde Sherızattyń “Táýelsizdik monýmenti aldynda joldasynyń sýretterin ustap alyp, ruqsatsyz sherý, pıket uıymdastyrǵany, osylaısha beıbit jıyn ótkizý tártibin buzǵany” jazylǵan. Sotta Sherızat taǵylǵan aıypty moıyndaǵan.

48 jastaǵy Álimnur Turǵanbaı 23 shildede Qytaıǵa jumys babymen ketken, sodan beri habar-oshar joq. Áıeli qasynda bolǵan adamdar ony Qytaı shekarasynda polısıa ustaǵanyn aıtqan. Týystary Qazaqstan men Qytaı organdarynan mardymdy jaýap ala almaǵan. Álimnur Turǵanbaı Qytaıdan otbasymen birge 2016 jyly kóship kelip, 2017 jyly Qazaqstan azamattyǵyn alǵan. 

Qazaqstan syrtqy ister mınıstrligi jaǵdaıdan habardar ekenin, Qytaıǵa saýal joldaǵanyn aıtqan.