مەملەكەت باسشىسى ن.نازاربايەۆتىڭ بىلتىر ءساۋىر ايىندا يران ەلىنە ساپارىنان كەيىن قازاقستان مەن يران كاسىپكەرلەرىنىڭ اراسىندا ىنتىماقتاستىق قارىم-قاتىناستار ورناي باستادى. كەيىن وبلىس اكىمى ا.كولگىنوۆ باستاعان ءبىر توپ دەلەگاسيا يران ەلىنە بارىپ، كاسىپورىندارمەن كەلىسسوزدەر جۇرگىزدى. ناتيجەسىندە اقجايىق اۋدانىندا ورنالاسقان  «باتىس ماركا لامب» ج ش س يران يسلام مەملەكەتىنە جىل سوڭىنا دەيىن 1500 توننا توڭازىتىلعان مارقا ەتىن ەكسپورتتاۋ جونىندە كەلىسىمشارتقا قول قويعان بولاتىن. شىلدە ايىندا اتىراۋ اۋەجايى ارقىلى العاشقى پارتيا جىبەرىلسە، كەشە  يران مەملەكەتىنە مارقا ەتىنىڭ ەكىنشى پارتياسى  جول تارتتى. بۇل جولى ءونىم تەگەرانعا تىكەلەي ورال حالىقارالىق اۋەجايى ارقىلى جىبەرىلدى.

 «باتىس ماركا لامب» ج ش س - تاۋلىگىنە 1400 باس مارقا سويىپ، ۆاكۋۋم كاپتاماسىندا بولشەكتەلگەن ەت وندىرەتىن كەشەن.  اتالمىش جوبانىڭ قۇرىلىسى 2013 جىلى باستالىپ، 2015 جىلى ىسكە قوسىلعان بولاتىن.  بۇگىندە 80-نەن استام ادامدى تۇراقتى جۇمىسپەن قامتىپ وتىرعان كاسىپورىن رەسپۋبليكا كولەمىندە سوڭعى تەحنولوگيالارعا ساي ۇساق مال ەتىن وڭدەيتىن جانە ءونىمى ەكسپورتقا باعىتتالعان العاشقى ارنايى كەشەن بولىپ تابىلادى.

كاسىپورىن بىلتىرعى جىلى رەسەي فەدەراسياسىنا 180  توننا مارقا  مال ەتىن ەكسپورتتاسا، بيىل جىل سوڭىنا دەيىن قوسىمشا تاعى 50 توننا مارقا ەتىن جەتكىزۋدى  جوسپارلاپ وتىر.

ءبىز ەكولوگيالىق تازا ءونىم شىعارامىز. سوندىقتان يران ەلىندە ءبىزدىڭ ءونىم جوعارى باعالانادى. بۇگىن مىنە، يراندىقتارمەن اراداعى كەلىسىمنىڭ اياسىندا ەكىنشى مارتە توڭازىتىلعان ەت جونەلتىپ وتىرمىز. يران كاسىپكەرلەرىنىڭ ءوز تالاپتارى بار. ولارعا مارقا ەتى كەرەك، ءارى ەركەك مال بولۋى قاجەت. ءبىز ولاردىڭ  تالابىن تولىق قاناعاتتاندىرا الامىز. ءبىزدىڭ ءونىم ساپاعا قويىلاتىن تالاپتارعا تولىقتاي جاۋاپ بەرەدى. ال شيكىزات ماسەلەسىندە ەشقانداي قيىندىق جوق. وبلىستىڭ شارۋا قوجالىقتارىنان، جەكە يەلىكتەگى مالدى قابىلدايمىز. بارلىق ۆەتەرينارلىق-سانيتارلىق قاداعالاۋ تالاپتارى ساقتالالىپ، ەتتى ەكسپورتتاۋعا مەملەكەتتەن رۇقسات الىنادى. الدا وزگە دە مەملەكەتتەرگە ەت ونىمدەرىن ەكسپورتتاۋ جوسپارىمىزدا بار، - دەيدى «باتىسماركالامب» ءجشس-نىڭ ديرەكتورى رۋسلان تەمىربولات. 

ال يراندىق ۆەتەرينار مامان ناسەر كاريمي:

- اقجايىق اۋدانىنداعى «باتىس ماركا لامب» كومپانياسىنىڭ ءونىمى ۇنادى. بارلىق نورمالار قاتاڭ قاداعالانادى ەكەن. سوندىقتان ەكى ەل اراسىنداعى ىسكەرلىك بايلانىستى نىعايتۋعا تىرىستىق، - دەپ ءوز پىكىرىمەن ءبولىستى.

ماماندار باتىس قازاقستان وبلىسىنىڭ اۋىل شارۋاشىلىعى سالاسىنىڭ الەۋەتى جوعارى دەپ باعالايدى.  ءقازىردىڭ وزىندە ءوڭىرىمىزدىڭ بۇل سالاسىنا قىزىعۋشىلىق تانىتۋشى مەملەكەتتەر بار، ولارمەن سەرىكتەستىك ماسەلەسى جونىندە كەلىسىمدەر جۇرگىزۋلۋدە.