الماتى قالاسىندا اكىم اپپاراتىنىڭ «Open Almaty» قوعامدىق قابىلداۋ الاڭىندا مەملەكەتتىك قىزمەتتەردىڭ جارمەڭكەسى بولىپ ءوتتى، دەپ حابارلايدى Qamshy.kz اقپارات اگەنتتىگى.

اتالمىش ءىس-شارانى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى بويىنشا دەپارتامەنتى مەن الماتى قالاسىنىڭ اكىمدىگى ۇيىمداستىردى.

مەملەكەتتىك قىزمەتتەر تۇرلەرىنىڭ جارمەڭكەسىنە ساۋلەت جانە قالا قۇرىلىسى، دەنساۋلىق ساقتاۋ، ءبىلىم، ازاماتتىق حال اكتىلەرىن تىركەۋ، جەر قاتىناستارى جانە باسقا دا باعىتتار بويىنشا مەملەكەتتىك قىزمەتتەر كورسەتەتىن 23 مەملەكەتتىك ورگان قاتىستى.

اتالعان شاراعا جالپى 922 ادام كەلىپ، ونىڭ 727ء-سى وزدەرىنە قاجەتتى مالىمەتتەر الدى، ال 195 ادامعا تىكەلەي قىزمەت كورسەتىلدى.

جارمەڭكەنىڭ نەگىزگى ماقساتى – حالىققا كەڭەس بەرۋ، ادىستەمەلىك كومەك كورسەتۋ جانە دە مەملەكەتتىك قىزمەتتەردى ناسيحاتتاۋ. سونىمەن قاتار، حالىققا كورسەتىلەتىن مەملەكەتتىك قىزمەتتەردى ۇسىنا ءتارتىبىن جانە «ازاماتتارعا ارنالعان ۇكىمەت» مەملەكەتتىك كورپوراسياسىنىڭ «ەلەكتروندى ۇكىمەت» پورتالى ارقىلى كورسەتىلەتىن قىزمەتتەر تۋرالى كەڭىنەن ءتۇسىندىرۋ بولىپ تابىلادى.

مەملەكەتتىك ىستەر جانە سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى بويىنشا دەپارتامەنت باسشىسى بايقانوۆا ايگۇل بۇل شارانىڭ نەگىزگى ماقساتىنا توقتالىپ ءوتتى.

«بۇگىن ءبىز مەملەكەتتىك قىزمەتتەر جارمەڭكەسىن وتكىزىپ جاتىرمىز. ونىڭ ماقساتى – حالىققا مەملەكەتتىك قىزمەتتى قالاي الۋ كەرەكتىگىن كەڭىنەن ءتۇسىندىرۋ، تاراتۋ. توعىز ايدىڭ ەسەبى بويىنشا الماتى قالاسىندا 9 ميلليوننان استام مەملەكەتتىك قىزمەت كورسەتىلدى. ونىڭ 60%-ى عانا ەلەكتروندى ۇكىمەت جانە حالىققا قىزمەت كورسەتۋ ورتالىقتارى ارقىلى كورسەتىلىپتى. ول – وتە تومەن كورسەتكىش. ال قالعان 40%-ى قىزمەتتى مەملەكەتتىك ورگاندارعا بارىپ الىپ جاتىر. بۇل – وتە ىڭعايسىز جانە دە شەنەۋنىك پەن حالىق اراسىندا كەزدەسۋ بولعاندىقتان سىبايلاس جەمقورلىققا سەپتىگىن تيگىزۋى مۇمكىن. كەزىندە، حالىققا قىزمەت كورسەتۋ ورتالىقتارى قوعامداعى جەمقورلىقتى جويۋ ماقساتىندا اشىلعان.

قازىرگى تاڭدا مەملەكەتتىك قىزمەتتەردىڭ بارلىعى اۆتوماتتاندىرىلىپ جاتىر. سونى ەلەكتروندى ۇكىمەتتىڭ باعىتىن، سول ارقىلى مەملەكەتتىك قىزمەتتى الۋدىڭ دۇرىس جولىن كورسەتۋ ءۇشىن بۇگىنگى ءىس-شارانى ۇيىمداستىرىپ جاتىرمىز»، - دەيدى بايقانوۆا ايگۇل.

مەملەكەتتىك قىزمەتتەر جارمەڭكەسىن وتكىزۋدىڭ ماڭىزدىلىعىن اتاپ وتكەن دەپارتامەنت باسشىسى بۇل شارانىڭ حالىققا كوپتەگەن پايداسىن تيگىزەتىندىگىن ايتادى.

ونىڭ ايتۋىنشا، جارمەڭكە باستالعاننان ەكى ساعاتتىڭ ىشىندە ەكى جۇزگە جۋىق ادام كەلگەن.

ايتا كەتەر بولساق، جالپى، الماتى قالاسىندا 478 مەملەكەتتىك ورگان مەملەكەتتىك قىزمەتتەردى كورسەتەدى، ۇسىنىلاتىن قىزمەتتەردىڭ جالپى سانى 353ء-تى قۇرايدى.

بۇگىنگى تاڭدا مەملەكەتتىك كورپوراسيا جانە «ەلەكتروندى ۇكىمەت» پورتالى ارقىلى مەملەكەتتىك قىزمەتتەردىڭ 60%-ى كورسەتىلەدى.

جارمەڭكەگە  كەلۋشىلەردىڭ باسىم كوپشىلىگى  سالىق تولەمدەرىن جۇرگىزۋدىڭ ءتارتىبى مەن شارتى، ادۆوكاتتىق جانە ناتوريالدىق قىزمەت بويىنشا ليسەنزيالار الۋ، جەر تەلىمدەرى، جىلجىمايتىن مۇلىكتەردى رەسىمدەۋ تۋرالى سۇراقتار قويدى.

كوپشىلىك تاراپىنان ەلەكتروندى سيفرلى قولتاڭبا، مەكەنجايى جانە سوتتالماعاندىعى تۋرالى انىقتاما الۋ، جىلجىمايتىن مۇلىكتى تىركەۋ قۇقىقتارى، مەديسينا ۇيىمدارىنا تىركەلۋ جانە ەلەكتروندى قىزمەتتەردىڭ وزگە دە تۇرلەرى بويىنشا ساۋالدار كوپ  ءتۇستى.

40 ادامنان مەديسينالىق ۇيىمدارعا تىركەۋ بويىنشا ءوتىنىم بەرىلىپ، ولارعا ەلەكتروندى سيفرلى قولتاڭبا العان سوڭ قىزمەت كورسەتىلدى.

مۇنداي  مەملەكەتتىك قىزمەت جارمەڭكەسى قالانىڭ بارلىق اۋدانىندا جالعاساتىن بولادى. جاقىن ارادى تۇركسىب جانە ناۋرىزباي اۋداندارىندا جارمەڭكە وتكىزۋ جوسپارلانعان.