جۇڭگو ءتوراعاسى سي سزينپين 12 ماۋسىمدا سينگاپۋردا اقش پرەزيدەنتى  دونالد ترامپپەن جانە سولتۇستىك كورەيا باسشىسى كيم چەن ىنمەن امەريكا-سولتۇستىك كورەيا سامميتىندە كەزدەسۋى مۇمكىن. بۇل تۋرالى وڭتۇستىك كورەيانىڭ اقپارات قۇرالدارى حابار تارتقان.

ونداي جاعدايدا كورەي تۇبەگى سوعىسىن اياقتاپ، 1953 جىلى بەيبىتشىلىك كەلىسىم شارتىنا قول قويعان ەلدەر باسشىلارى العاش رەت قايتا كەزدەسكەن بولادى. كەزدەسۋ اياسىندا تولىقتاي بەيبىت كەلىسىم قاراستىرىلۋى مۇمكىن. 27 ساۋىردەگى ەكى كورەيا اراسىنداعى جوعارعى دەڭگەيلى كەزدەسۋدە «كورەي جارتى ارالدارىن بىرىكتىرۋ جانە بەيبىت گۇلدەندىرۋ تۋرالى Panmunjom دەكلاراسياسىنىڭ» 3 باپ، 3 تارماعىندا بەيبىتشىلىك كەلىسىمىنە 65 جىل تولعاندا وڭتۇستىك پەن سولتۇستىك كورەيا كورەي سوعىسى اياقتالعانىن جاريالايتىنى ايتىلعان. قازىرگى ۋاقىتتا ەكى ەل اراسى تەحنيكالىق تۇرعىدا ءالى دە سوعىس جاعدايىندا.

ايتا كەتسەك، ترامپ بەيسەنبى كۇنى كيم چەن ىنمەن كەزدەسۋى 12 ماۋسىمدا وتەتىنىن مالىمدەگەن بولاتىن. ءاقۇيدىڭ ۇلتتىق قاۋىپسىزدىك كەڭەس جونىندەگى كەڭەسشىسىنىڭ ايتۋىنشا اتالعان لوكاسيا سينگاپۋردىڭ بەيتاراپتىلىعى مەن كەلىسسوزدىڭ قاۋىپسىزدىگى ءۇشىن تاڭداپ الىنعان.

ەسكە سالساق، كيم چەن ىن ايەلى لي سول چجۋدى ەرتىپ 25-28 ناۋرىزدا ءوزىنىڭ شەتەلگە العاشقى ساپارىن جاساپ بەيجىڭگە كەلىپ كەتكەن. ال، 7-8 مامىردا قىتايدىڭ سولتۇستىك-شىعىسىنداعى داليان قالاسىندا تاعى دا سي سينپينمەن كەزدەسۋ جاسادى.