وڭتۇستىك قازاقستان وبلىسىندا «QAZAQSTAN» ۇلتتىق تەلەارناسىنىڭ «Men qazaqpyn» تەليەۆيزيالىق مەگا جوباسىنىڭ اۋدانارالىق ىرىكتەۋ كەزەڭى اياقتالدى. مامىر ايىنىڭ 17-جۇلدىزىندا بايدىبەك، سوزاق اۋداندارىنان باستاۋ العان سايىس ايماقتاعى 14 اۋداندى تولىققاندى قامتىپ، 29-مامىر كۇنى شىمكەنتتىك ونەرپازداردى سارالاۋمەن قورىتىندىلاندى. اتالعان جوباعا وبلىس اكىمى جانسەيىت تۇيمەبايەۆ قولداۋ ءبىلدىرىپ، بايقاۋدىڭ وڭىردە جوعارى دەڭگەيدە وتۋىنە مۇرىندىق بولىپ وتىر. بۇگىن بۇل تۋرالى وقو وڭىرلىك كوممۋنيكاسيالار قىزمەتىندە وتكەن بريفينگتە «Ontustik» تەلەارناسىنىڭ ديرەكتورى باۋىرجان بەردىمۇراتوۆ مالىمدەدى. 

قازاق xالقىنىڭ ءتول ونەرى، سونىڭ ىشىندە جىر-تەرمە مەن كۇيدى بۇگىنگى زامان تالابىنا ساي جاڭارتىپ، ناسيحاتتاۋعا باعىتتالعان جوبادا 18 بەن 40 جاس ارالىعىنداعى ونەرپازدار ب ا ق سىنادى. 

باسپا ءسوز ءماسليحاتىنا قاتىسقان وبلىستىق مادەنيەت جانە حالىق شىعارماشىلىعى ورتالىعىنىڭ ديرەكتورى نۇرلان ءادىلحانوۆتىڭ ايتۋىنشا، بايقاۋعا 14 اۋدان مەن شىمكەنت قالاسىنان جالپى 213 ۇمىتكەر قاتىسقان.

«وبلىستاعى بارلىق اۋداننان دارا شاۋىپ ۇزدىك شىققان 40 ونەرپاز كەلەسى كەزەڭگە جولداما الدى. ەندى 5-ماۋسىم كۇنى شىمكەنت قالاسىندا وتەتىن بايقاۋدىڭ قورىتىندىسى بويىنشا رەسپۋبليكالىق جارىسقا ءۇش ونەرپاز عانا جولداما الادى. وبلىستىڭ جارىستا ءار سالا بويىنشا ارنايى ماماندار تورەلىك جاساپ، كىل مىقتىلاردى سۇرىپتايتىن بولادى»، - دەدى نۇرلان ىدىرىس ۇلى. 

ۇلتتىق جوبانىڭ وڭىردەگى ىرىكتەۋ كەزەڭدەرى، بايقاۋعا قاتىسىپ جاتقان ونەرپازدار، جەڭىمپازدار تۋرالى اقپارات جانە جالپى جارىستىڭ ءوتۋ بارىسىن «Ontustik» تەلەارناسى ۇدايى تىكەلەي ەفيردە كورەرمەندەرگە جاريالاپ كەلەدى. 

ايتا كەتەرلىگى، جوبانىڭ رەسپۋبليكالىق اينالىمىندا جەڭىسكە جەتكەن جەڭىمپازدار "جىلدىڭ ەڭ ۇزدىك ءداستۇرلى ءانشىسى"، "جىلدىڭ ەڭ ۇزدىك تەرمەشىسى" جانە "جىلدىڭ ەڭ ۇزدىك كۇيشىسى" اتالىمدارى بويىنشا ماراپاتتالاتىن بولادى.