وسكەمەندەگى دوستىق ءۇيى — قوعامدىق كەلىسىم ورتالىعىندا «قازاق تىلىندەگى 100 جاڭا وقۋلىق» جوباسىنىڭ اياسىندا وبلىستاعى قازاقستان حالىقتارى اسسامبلەياسى عىلىمي-ساراپتامالىق توبىنىڭ وتىرىسى ءوتتى.

جاستارعا باعدارلامانىڭ ماڭىزىن ءتۇسىندىرۋ ماقساتىنداعى جيىنعا دوستىق ءۇيى-قوعامدىق كەلىسىم ورتالىعىنىڭ ەتنومادەني بىرلەستىك جەتەكشىلەرى مەن بەلسەندىلەرى، اسسامبلەيانىڭ قوعامدىق كەلىسىم كەڭەسىنىڭ، انالار كەڭەسىنىڭ، عىلىمي-ساراپتامالىق توبىنىڭ، وبلىستاعى «جاڭعىرۋ جولى» جاستار شتابىنىڭ مۇشەلەرى مەن جوعارى وقۋ ورىندارىنىڭ ستۋدەنتتەرى قاتىستى.

-«جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى قوعامدا قىزۋ تالقىلانىپ جاتىر. ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنداعى بۇل جوبانى جاستار اراسىندا كەڭىنەن ناسيحاتتاۋىمىز كەرەك،-دەدى وبلىستاعى قازاقستان حالىقتارى اسسامبلەياسى حاتشىلىعىنىڭ مەڭگەرۋشىسى اسقار نۇرعازييەۆ.- بۇل جوبا الداعى بىرنەشە جىلدا گۋمانيتارلىق ءبىلىمنىڭ بارلىق باعىتتارى بويىنشا الەمدەگى ەڭ جاقسى 100 وقۋلىقتى ءارتۇرلى تىلدەردەن قازاق تىلىنە اۋدارىپ، جاستارعا دۇنيەجۇزىندەگى تاڭداۋلى ۇلگىلەردىڭ نەگىزىندە ءبىلىم الۋىنا مۇمكىندىك جاسايدى.

– ادام قانشاما ءتىل بىلگەنىمەن، وزىنە قاجەتتى اقپاراتتى ءوزىنىڭ انا تىلىندە العانعا نە جەتسىن، – دەيدى وڭىرىمىزگە بەلگىلى ساياساتتانۋشى ليليا ستولياروۆا. – سوندىقتان الەمدىك بەستسەللەرلەردى مەملەكەتتىك تىلگە اۋدارۋ – ماڭىزدى، قاجەتتى، ەڭ باستىسى دەر كەزىندە جاسالعان قادام بولدى. ارينە، بۇل باعىتتاعى جۇمىستار ءالى جالعاسىن تابادى.