الماتى وبلىسىنىڭ دەنساۋلىق ساقتاۋ باسقارماسى مەملەكەتتىك ەمحانالاردا مەنينگوكوك ينفەكسياسىنا قارسى  اقىلى ۆاكسينالاۋ جۇرگىزۋ مۇمكىندىكتەرىن قاراستىرىپ جاتىر، دەپ حابارلايدى  Qamshy.kz اقپارات اگەنتتىگى.

بۇل تۋرالى ەلدىڭ باس سانيتاريالىق دارىگەرى جانداربەك بەكشين ءمالىم ەتتى. ونىڭ ايتۋىنشا اقىلى ۆاكسينالاۋ جۇرگىزۋدىڭ ۆاكسينانىڭ باعاسىن ارزانداتۋعا اسەرى بولۋى مۇمكىن.

بەكشيننىڭ مالىمەتى بويىنشا، قازىرگى تاڭدا ەكى جەكەمەنشىك ۇيىمدا ءۇش ەكپە سالۋ پۋنكتى بار. ولار جىل سايىن قاجىلىققا باراتىندارعا سالىناتىن ۆاكسينانى ساتىپ العان.

"ولارعا 4600 دوزا ۆاكسينا ءتۇستى. بۇل جەكە مەنشىك ۇيىمدار ساتىپ العان ۆاكسينا مولشەرى. مەن بىلسەم، جەكە ۇيىمداردا ءبىر ۆاكسينا باعاسى - 22500 تەڭگە. ءبىز وسى كومپانياعا تاعى دا ۆاكسينا الۋىن وتىندىك. ءقازىر دەنساۋلىق ساقتاۋ باسقارماسى مەملەكەتتىك ەمحانالاردا اقىلى ۆاكسينالاۋ جۇرگىزۋ مۇمكىندىكتەرىن قاراستىرىپ جاتىر. سەبەبى ەمحانالاردا باعانى تۇراقتاندىرۋعا بارلىق مۇمكىندىكتەر بار. ەگەر كوتەرمە باعامەن 17 500 تەڭگە بولسا، ەمحانالاردا 19 500 تەنگەدەن اقىلى ۆاكسينا جۇرگىزىلەدى"، - دەدى بەكشين.

دارىگەر ۇلتتىق كۇنتىزبە بويىنشا وبا، ديفتەريا سىندى ەمدەۋدىڭ باسقا مۇمكىندىكتەرى مەن پروفيلاكتيكا ءتۇرى قاراستىرىلماعان ينفەكسيالارعا ۆاكسينا جۇرگىزىلەدى. ال مەنينگوكوك ينفەكسياسىنا ەپيدەمياعا قارسى شارالار ارقىلى پروفيلاكتيكا جۇرگىزۋگە بولادى دەپ ءتۇسىندىردى.

"مۇمكىندىك بولعان جاعدايدا اقىلى ۆاكسينا جۇرگىزۋگە بولادى. مۇنى اركىم ءوزى شەشەدى"، دەپ اتاپ ءوتتى جانداربەك بەكشين.

ەستەرىڭىزگە سالساق، بۇگىن ەلجان ءبىرتانوۆ مينيسترلىكتىڭ مەنينگوكوك ۆاكسيناسىنىڭ قىمباتتاۋىنا جول بەرمەيتىنىن مالىمدەگەن بولاتىن.