2026 جىلعى 18 قاڭتاردا رەسپۋبليكالىق العاشقى مەديسينالىق-سانيتارلىق كومەك (امسك) ورتالىعىنىڭ باسشىسى ايگۇل قاسىموۆا ومىردەن ءوتتى، دەپ حابارلايدى Qamshy.kz.
«بۇل – بۇكىل سالا ءۇشىن ورنى تولماس، اسا اۋىر قازا. ايگۇل قاسىموۆانىڭ باسشىلىعىمەن رەسپۋبليكالىق العاشقى مەديسينالىق-سانيتارلىق كومەك ورتالىعىنىڭ بازاسىندا پيلوتتىق جوبالار ازىرلەنىپ، ىسكە اسىرىلدى. كەيىن بۇل جوبالار جۇيەلى رەفورمالاردىڭ نەگىزىنە اينالىپ، حالىق ءۇشىن مەديسينالىق كومەكتىڭ قولجەتىمدىلىگىن ارتتىرۋعا مۇمكىندىك بەردى. ايگۇل قۇباشيەۆنا دەنساۋلىق ساقتاۋ سالاسىنىڭ دارىندى ۇيىمداستىرۋشىسى، بىلىكتى مەنەدجەر، مەملەكەتتىك ويلاۋ قابىلەتى بار جانە جاۋاپكەرشىلىك سەزىمى جوعارى كاسىبي مامان رەتىندە ەستە قالادى»، – دەپ جازدى اقمارال ءالنازاروۆا.
«ونى شىنايى ىنتا-جىگەر، ماماندىعىنا دەگەن ادالدىق جانە دارىگەر مەن باسقارۋشىنىڭ ميسسياسىن تەرەڭ ءتۇسىنۋ قاسيەتتەرى ايرىقشا سيپاتتايتىن. ول جانى كەڭ، اشىق، ادامدارعا جاناشىر، قولداۋ كورسەتىپ، شابىتتاندىرىپ، ۇجىمدى سوڭىنان ەرتە بىلەتىن تۇلعا بولدى. ونىڭ جارقىن بەينەسى ارىپتەستەرىنىڭ، شاكىرتتەرىنىڭ جانە ونىمەن بىرگە ەڭبەك ەتكەن بارلىق جانداردىڭ جۇرەگىندە ماڭگى ساقتالادى. مارقۇمنىڭ تۋعان-تۋىستارىنا، جاقىندارىنا، ارىپتەستەرىنە جانە بۇكىل مەديسينالىق قاۋىمداستىققا شىنايى كوڭىل ايتامىن. ءبىز سىزدەرمەن بىرگە قايعىرامىز. جارقىن بەينەسى ماڭگى جادىمىزدا»، – دەپ جازدى اقمارال ءالنازاروۆا.
