سيريا اراب رەسپۋبليكاسىنىڭ پرەزيدەنتى احماد اش-شاراا ناۋرىز مەيرامىن مەملەكەتتىك دەڭگەيدە اتاپ ءوتۋ تۋرالى جارلىققا قول قويدى. ەندى 21 ناۋرىز ەل اۋماعىندا رەسمي اقىلى دەمالىس كۇنى بولىپ ەسەپتەلەدى.
سيريانىڭ مەملەكەتتىك SANA اگەنتتىگىنىڭ حابارلاۋىنشا، پرەزيدەنت قول قويعان قۇجاتتىڭ بەسىنشى بابىندا ناۋرىز مەيرامى ۇلتتىق مەرەكەلەر تىزىمىنە ەنگىزىلگەن. وسى شەشىمگە سايكەس، 21 ناۋرىزدا مەملەكەتتىك مەكەمەلەردىڭ قىزمەتكەرلەرى جالاقىسى ساقتالاتىن دەمالىسقا شىعادى.
جارلىق ماتىنىندە ناۋرىز كوكتەمنىڭ كەلۋىن، بەيبىتشىلىك پەن ءوزارا سىيلاستىقتى بىلدىرەتىن ورتاق مادەني مەرەكە رەتىندە سيپاتتالعان. مەرەكە سيريا اراب رەسپۋبليكاسىنىڭ بۇكىل اۋماعىندا بىردەي اتاپ وتىلەدى.
سونىمەن قاتار، قۇجاتتا كۇرد ءتىلى اراب تىلىمەن قاتار ۇلتتىق ءتىل مارتەبەسىنە يە بولاتىنى كورسەتىلگەن. بۇعان قوسا، ەتنيكالىق نەمەسە تىلدىك ەرەكشەلىكتەرىنە بايلانىستى كەمسىتۋدىڭ كەز كەلگەن تۇرىنە زاڭ جۇزىندە تىيىم سالىناتىنى اتاپ وتىلگەن.
بۇل قادام سيريادا ۇزاق جىلدارعا سوزىلعان قاقتىعىستان كەيىن قولعا الىنعان رەفورمالار اياسىندا قابىلداندى. بيلىك بۇل شەشىم قوعامداعى بىرلىكتى كۇشەيتىپ، ەلدەگى كوپەتنوستى قۇرىلىمنىڭ قۇقىقتارىن مويىنداۋعا باعىتتالعانىن مالىمدەدى.
