ءبىر كەزدەرى الەم اۆتونارىعى دەسە Toyota، Honda، Volkswagen، Ford Motor Company سياقتى الپاۋىتتار ەسكە تۇسەتىن. ال جۇڭگو كولىكتەرى ارزان، ساپاسى تومەن، كوشىرمە ءونىم رەتىندە قابىلداناتىن. الايدا سوڭعى بىرنەشە جىلدا جاعداي تۇبەگەيلى وزگەردى.

ءقازىر الەمنىڭ ءىرى اۆتوكومپانيالارى قىتايدىڭ تەحنولوگيالىق قارقىنىنا ىلەسە الماي جاتقانىن اشىق ايتا باستادى. 

ەلەكتروموبيل داۋىرىندە جۇڭگو العا شىقتى

جۇڭگو بۇگىندە ەلەكتر كولىگى، اككۋمۋلياتور ءوندىرىسى، كولىك باعدارلامالىق جۇيەلەرى، جاساندى ينتەللەكتپەن باسقارۋ، اۆتوماتتاندىرىلعان ءوندىرىس سالالارىندا الەمدىك جەتەكشى كۇشتەردىڭ بىرىنە اينالىپ كەلەدى. 

ماسەلە تەك ەلەكتروموبيلدە ەمەس.

جۇڭگو كولىكتى مۇلدە جاڭا تەحنولوگيالىق ونىمگە اينالدىرىپ جاتىر. كولىك ەندى «دوڭگەلەكتى كومپيۋتەرگە» اينالۋدا. 

بۇگىنگى جاڭا قىتايلىق كولىكتەر سمارتفونمەن بايلانىسادى، ۇيدەگى اقىلدى قۇرىلعىلارمەن جۇمىس ىستەيدى، ينتەرنەت ارقىلى جاڭارىپ وتىرادى، جاساندى ينتەللەكت كومەكشىلەرىن قولدانادى. ياعني قازىرگى اۆتوموبيل: جاي قوزعالتقىش پەن تەمىر ەمەس، باعدارلامالىق جۇيەگە اينالىپ بارادى.

Xiaomi نەبارى ەكى جىلدا كوشباسشىلار قاتارىنا كىردى

Xiaomi كومپانياسى العاشقى ەلەكتر كولىگىن تەك 2024 جىلى شىعارعان. سوعان قاراماستان، 2026 جىلى قىتايداعى ەڭ كوپ ساتىلاتىن برەندتەردىڭ بىرىنە اينالدى. 

كومپانيا زاۋىتتارىندا اۆتوماتتاندىرۋ دەڭگەيى وتە جوعارى. كەي ءوندىرىس جەلىلەرىندە ءار 76 سەكۋند سايىن ءبىر كولىك دايىن بولىپ شىعادى. 

قىتايلىق زاۋىتتار باتىستى تاڭعالدىردى 

جاپونيانىڭ Honda كومپانياسىنىڭ باسشىسى قىتايداعى جاڭا بۋىن زاۋىتتارىن كورگەننەن كەيىن «بۇلارمەن باسەكەلەسۋ وتە قيىن» دەپ مالىمدەگەن. ال Ford Motor Company باسشىسى «بۇل ءبىزدىڭ ءومىرىمىز ءۇشىن كۇرەس» دەپ اشىق ايتتى.

جۇڭگو نەگە تەز دامىپ كەتتى؟

ساراپشىلار بىرنەشە نەگىزگى سەبەپتى اتايدى.

بىرىنشىدەن — مەملەكەتتىك قولداۋ

جۇڭگو ۇكىمەتى:
ەلەكتر كولىگى وندىرىسىنە،
اككۋمۋلياتور تەحنولوگياسىنا،
ءوندىرىس ينفراقۇرىلىمىنا
ونداعان ميلليارد دوللار ينۆەستيسيا سالدى.

ەكىنشىدەن — ىشكى باسەكە وتە كۇشتى

قىتايدا:
BYD
Nio
XPeng
Huawei
Xiaomi
بىر-بىرىمەن وتە قاتتى جارىسۋدا.
سول سەبەپتى يننوۆاسيا جىلدام ءجۇرىپ جاتىر. جۇڭگو ىشىندەگى وندىرىستىك حابقا اينالعان پروۆيسيالار اراسىندا ءوزارا اسەكەلەستىك وتە كۇشتى. سونىمەن قاتار، جۇڭگو جاڭا تەحنولوگيالىق ەكوجۇيە قۇرۋدا.

باتىس ەندى قىتايدان ۇيرەنە باستادى.
ءبىر كەزدەرى جۇڭگو باتىستان تەحنولوگيا الاتىن.

ءقازىر كەرىسىنشە جاعداي بايقالادى. مىسالى: Volkswagen قىتايلىق XPeng كومپانياسىنىڭ باعدارلامالىق جۇيەلەرىن قولدانا باستادى. كەي باتىس كومپانيالارى قىتايلىق پلاتفورمالاردى ءوز كولىكتەرىنە ەنگىزىپ جاتىر. 

الەمدىك نارىقتاعى كۇش ورتالىعى وزگەرۋدە

بۇرىن:

گەرمانيا — ينجەنەرلىك ساپامەن،
جاپونيا — سەنىمدىلىكپەن،
اقش — تەحنولوگيالىق جاڭاشىلدىقپەن
تانىلعان ەدى.

ال ءقازىر ەلەكتر كولىگى وندىرىسىندەگى نەگىزگى كۇش ورتالىعى بىرتىندەپ قىتايعا اۋىسىپ بارا جاتىر.

ەۋروپا مەن اقش قورعانۋعا تىرىسۋدا

ەۋروپا وداعى جۇڭگو كولىكتەرىنە جوعارى كەدەندىك باج ەنگىزۋدە. اقش-تا كەي قىتايلىق كولىكتەرگە سالىناتىن تاريف 100 پايىزدان استى. 

الايدا ساراپشىلار مۇنداي شەكتەۋلەر قىتايدىڭ ءوسۋىن تولىق توقتاتا المايدى دەپ ەسەپتەيدى. 

بۇل قازاقستانعا قانداي ساباق بەرەدى؟

قازاقستان ءۇشىن نەگىزگى ساباق: بولاشاقتا تەك شيكىزاتقا سەنۋ جەتكىلىكسىز. 

جۇڭگو تەك كولىك شىعارعان جوق، تولىق وندىرىستىك تىزبەك قۇردى، تەحنولوگيا، باعدارلامالىق جۇيە، اككۋمۋلياتور، جاساندى ينتەللەكت، روبوت تەحنيكاسىن ءبىر ەكوجۇيەگە بىرىكتىردى. 

قىتايدىڭ اۆتوموبيل سالاسىنداعى سەرپىلىسى — جاي عانا كولىك ءوندىرىسىنىڭ ءوسۋى ەمەس. بۇل — الەمدىك ونەركاسىپتىك كۇشتىڭ بىرتىندەپ ازياعا اۋىسىپ جاتقانىن كورسەتەتىن ۇلكەن وزگەرىس.

ال بولاشاقتا اۆتوموبيل جاي كولىك ەمەس، جاساندى ينتەللەكتپەن جۇمىس ىستەيتىن جوعارى تەحنولوگيالىق قۇرىلعىعا اينالۋى مۇمكىن.