يراننىڭ جوعارعى كوشباسشىسى اياتوللا ءالي حامەنەي اقش-تىڭ بۇرىنعى پرەزيدەنتى دونالد ترامپتى «قىلمىسكەر» دەپ اتاپ، تەگەرانداعى جاپپاي نارازىلىقتارعا ۆاشينگتوننىڭ تىكەلەي قاتىسى بار ەكەنىن مالىمدەدى. بۇل – حامەنەي تاراپىنان نارازىلىق كەزىندەگى ادام شىعىنىنا العاش رەت اشىق پىكىر ءبىلدىرۋى.

17 قاڭتار كۇنى مەملەكەتتىك تەلەارنا ارقىلى سويلەگەن سوزىندە حامەنەي انتيۇكىمەتتىك ميتينگىلەر سالدارىنان «بىرنەشە مىڭ ادام قازا تاپقانىن» ايتتى. ونىڭ سوزىنشە، اقش بيلىگى شەرۋشىلەردى اشىق قولداپ، ولاردى ارەكەتتەرىن جالعاستىرۋعا شاقىرعان.
«اقش پرەزيدەنتى بۇل كوتەرىلىس كەزىندە جەكە ءوزى ۇندەۋ جاساپ، ميتينگىلەردى قولدايتىنىن، ءتىپتى اسكەري قولداۋ كورسەتۋگە دايىن ەكەنىن ايتتى»، – دەدى يراننىڭ جوعارعى كوشباسشىسى.

حامەنەي نارازىلىققا شىققانداردى «اقش-تىڭ جاياۋ اسكەرلەرى» دەپ اتاپ، ولاردىڭ مەشىتتەر مەن ءبىلىم بەرۋ مەكەمەلەرىن قيراتقانىن، سونداي-اق شەتەلدەن جەتكىزىلگەن قارۋ-جاراق قولدانعانىن العا تارتتى. 

سونىمەن قاتار، سوڭعى يران شاحىنىڭ ۇلى رەزا پەحليەۆي اقش-تى رەجيمنىڭ «اسكەري قۇرىلىمدارىنا» نۇكتەلىك سوققى جاساۋعا شاقىردى. Politico دەرەگىنشە، ول ۆاشينگتوندا ءبىرقاتار كەزدەسۋ وتكىزىپ، بيلىك اۋىسقان جاعدايدا وتپەلى كەزەڭدى باسقارۋعا دايىن ەكەنىن بىلدىرگەن.

ايماقتاعى شيەلەنىس ديپلوماتيالىق مالىمدەمەلەرگە قاراماستان ساقتالىپ وتىر. امەريكالىق ب ا ق اقش-تىڭ تاياۋ شىعىسقا قوسىمشا اسكەري كۇشتەر جىبەرۋدى قاراستىرىپ جاتقانىن حابارلايدى.