تۇركىستان قالاسىنا ەرەكشە مارتەبە بەرىلەدى. ءتيىستى زاڭ جوباسىن بۇگىن سەنات دەپۋتاتتارى ماقۇلدادى.
بۇگىن سەناتتا تۇركىستانعا قاتىستى ەكى زاڭ جوباسى قارالدى: "تۇركىستان قالاسىنىڭ ەرەكشە مارتەبەسى تۋرالى" جانە "قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇركىستان قالاسىنىڭ ەرەكشە مارتەبەسى جانە شەت ەلدەگى مادەنيەت ورتالىقتارى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى".
"قاراستىرىلىپ وتىرعان زاڭنىڭ ماقساتى - تۇركىستان قالاسىنىڭ قازاقستان رەسپۋبليكاسىنىڭ رۋحاني-مادەني جانە تاريحي ورتالىعى رەتىندەگى ەرەكشە مارتەبەسىن ايقىندايتىن قۇقىقتىق نەگىزدەردى رەتتەۋ. ...تۋريزم سالاسىن دامىتۋ ماقساتىندا تۇركىستان قالاسىنىڭ اكىمدىگىنە كاسىپكەرلىك سۋبەكتىلەرى شىعىندارىنىڭ ءبىر بولىگىن وتەۋ بويىنشا ءبىرقاتار قۇزىرەتتەر بەرىلەدى، ونىڭ ىشىندە:
- تۋريستىك قىزمەت وبەكتىلەرىن سالۋ جانە رەكونسترۋكسيالاۋ كەزىندە؛
- جول بويىنداعى سەرۆيس نىساندارىن سالۋ بويىنشا؛
- سىيىمدىلىعى سەگىز ورىننان اساتىن كولىك قۇرالدارىن ساتىپ الۋ بويىنشا جانە ت.ب.
بۇل تۇزەتۋلەر تۋريستىك ينفراقۇرىلىم مەن قىزمەتتەردى ودان ءارى جەتىلدىرۋدى قامتاماسىز ەتۋگە مۇمكىندىك بەرەدى"، - دەدى سەناتور باۋىرجان قانييەۆ.
سونداي-اق، قوجا احمەت ياساۋي كەسەنەسى ماڭىنداعى قۇرىلىس ماسەلەسى تالقىلاندى.
"كەسەنە اينالاسىنداعى قۇرىلىستىڭ ءبىرىڭعاي ستاندارتتارىن جانە تۇركىستان قالاسىنىڭ اۋماعىندا ساۋلەت پەن قالا قۇرىلىسىنىڭ ءبىرىڭعاي ستيليستيكاسىن قامتاماسىز ەتۋ ءۇشىن نورمالار كوزدەلگەن. وسىلايشا، جەرگىلىكتى وكىلدى جانە اتقارۋشى ورگاندار قالانىڭ ساۋلەت كەلبەتىن قالىپتاستىرۋ جانە قالا قۇرىلىسىن جوسپارلاۋ قاعيدالارىن ازىرلەۋگە جانە بەكىتۋگە جاۋاپتى بولادى"، - دەدى سەناتور.
ودان بولەك تۇركىستان قالاسىنىڭ اكىمدىگىنە بارلىق ساناتتاعى تاريح جانە مادەنيەت ەسكەرتكىشتى انىقتاۋ، زەردەلەۋ، ساقتاۋ، جەرگىلىكتى جەردىڭ تاريحي-ساۋلەتتىك تىرەك جوسپارلارى مەن كارتا-سحەمالارىن جاساۋ بويىنشا قۇزىرەتتەر بەرىلمەك.
پىكىر قالدىرۋ