Шымкентте сапасыз балмұздақтан уланғаны туралы шағым түсірген 97 пациент ауруханадан шықты, деп хабарлайды Qamshy.kz ақпарат агенттігі Қазақпараттың дерегін негізге ала отырып.

«Бүгінгі таңда зардап шегушілер шығарылып жатыр. Десе де, әлі де 88 адам ауруханада, 97-сі шықты. Менің ойымша, алдағы 1-2 күнде зардап шеккендердің бәрі де үйіне қайтады», - дейді ОКҚ-да өткен баспасөз мәслихатында ҚР Денсаулық сақтау министрлігі Қоғамдық денсаулық сақтау комитетінің төрағасы Жандарбек Бекшин. Сонымен бірге, ол лабороториялық жұмыстардың нәтижесі туралы айтты.

«Бұған өнімнің сальмонеллез және болар-болмас дәрежеде стафилокок қоздырғыштарын жұқтыруы себеп болған. Бұл нақты анықталғаны», - деді еліміздің бас санитарлық дәрігері. Еске сала кетсек, Жандарбек Бекшин бұған дейін Қазақстандағы балмұздақ сататын нысандардың барлығы тексерілетінін жария еткен болатын.

Айта кетсек, Шымкентте жұмсақ балмұздақтан адамдар уланып қалған болатын. Бұған дейін Денсаулық сақтау министрлігі бұл жағдайды бақылауға алғанын хабардар еткен еді. Бұдан кейін облыс әкімі Жансейіт Түймебаев уланған адамдар түскен ауруханаға барып, пациенттер үшін барлық жағдайды жасауды тапсырған болатын.