Кемерово облысының бұрынғы губернаторы, 73 жастағы Аман Төлеев Кемерово облысының халық депутаты болып сайланды, деп хабарлайды Qamshy.kz ақпарат агенттігі ТАСС сайтына сілтеме жасап.

«Бүгін Кемерово облыстық сайлау комиссиясының отырысы өтті. Онда төртінші шақырылымдағы Кемерово облыстық халық депутаттары кеңесінің бос мандатын «Единая Россия» партиясының Кемерово өңірлік бөлімшесінен Төлеев Амангелді Молдағазыұлына беру мәселесі қаралды. Бос депутаттық мандатты оған беру туралы шешім қабылданды», — деді сайлау комиссиясының өкілі.

Кемерово облысын 1997 жылдан бері 20 жыл басқарған Аман Төлеев 1 сәуірде РФ президенті Владимир Путиннен өзін отставкаға жіберуді сұрады. Владимир Путин Кемерово облысы губернаторы Аман Төлеевтің мерзімінен бұрын отставкаға кету туралы өтінішін қабылдады. Ресей президенті аймақ басшысының міндетін уақытша атқару үшін вице-губернатор Сергей Цивилевті қойды.