Қазақстандық кәсіпқой боксшы, орта салмақта WBA (Super), IBO, WBC және IBF тұжырымдары бойынша әлем чемпионы Геннадий Головкин мен америкалық боксшы Ванес Мартиросян салмақ өлшеу рәсімінен өтті, деп жазады Qamshy.kz ақпарат агенттігі.

Генаның салмағы 160 фунт болса, Ванес 159,6 фунт болды. Яғни қазақстандық боксшы 72,574 кг, америкалықтың салмағы 72,393 кг-ды тартты. Салмақ айырмашылығы 181 грамм ғана. Орта салмақтағы боксшылар шектеуі 160 фунт болып саналады.

Ертең, 6 мамыр күні таңда қос боксшының арасындағы кездесу өтеді.

GGG бұл кездесуден 1 миллион доллар көлемінде сыйақы алса, Ванес Мартиросян 225 мың доллар табысқа кенеледі. Ал жекпе-жектен түсетін қаржы бұл табысқа кірмейді. Оны боксшылар бөлек алатын болады.

Ванес Мартиросян тегі армениялық боксшы. Ол 4 жасқа толғанда отбасы АҚШ-қа қоныс аударған. Ал бокспен 7 жасынан бастап шұғылдана бастаған. Әкесінің өзі әуесқой боксшы болған. Ұлының да бокста биік белестерді бағындырғанын қалаған.

Ол кәсіпқой бокстағы барлық жекпе-жектерін бірінші орта салмақта өткізген. 33 жекпе-жекте қатарынан жеңіске жеткен. 2012 жылы кубалық Эрисланди Ларамен тең түседі. Араға бір жыл сала америкалық боксшы Деметриус Андрадеге ұпай айырмасымен жол беріп, алғаш рет жеңіледі.

2015 жылы отандасы Джермелл Чарлодан жеңілген. 2016 жылы кубалық Эрисланди Лараға қарсы кездесу өткізіп, ұпай айырмасымен ұтылған. Одан бергі 2 жыл ішінде шаршы алаңға шықпаған.

Америкалық боксшы 20 жекпе-жегінде қарсыласын нокаутпен ұтқан. Ал бұл нәтижесін Геннадий Головкинмен салыстыруға келмейді. Отандасымыз 38 жекпе-жек өткізіп, тек Сауль Альвареске қарсы кездесуінде ғана тең түсті. 33 жекпе-жегінде қарсыласын нокаутпен ұтқан.

Айта кетейік, Головкин мен Мартиросян арасындағы кездесу АҚШ уақытымен 5 мамыр күні Карсон қаласында (Калифорния штаты) StubHub спорт кешенінде өтеді. Астанада уақытымен жекпе-жек 6 мамыр күні шамамен 9:00-де басталады. 

Қазіргі уақытта бұл кездесуді бірде бір Қазақстандық телеарналар Головкин мен Мартиросян арасындағы кездесуді көрсететінін хабарламады. Бұған дейін Головкиннің кездесуін QazSport және Qazaqstan арналары тікелей эфирден көрсеткен болатын. 

Тікелей эфирде бұл кездесуді HBO, "Матч ТВ", "Матч! Боец" және BoxNation арналары тікелей эфирде көрсетеді. 

Кездесудің тікелей эфирінің сілтемесі жекпе-жек басталарға дейін шығады. Сілтемелер жекпе-жек кезінде де шығатынына назар аударуларыңызды сұраймын. Сонымен қатар сіздер де жекпе-жектің сілтемесін пікір ретінде қалдыра аласыздар.