« ...  Қазіргі денсаулық сақтау ісі қымбатқа түсетін стационарлық емге емес, негізінен аурудың алдын алуға бағытталуға тиіс».

ҚР Президенті Н. Назарбаевтың  «Төртінші өнеркәсіптік революция жағдайындағы дамудың жаңа мүмкіндіктері» Жолдауынан

Орал қаласындағы  «Park  Hotel»  қонақүй кешенінде «Сау бала – бақытты ана»  атты республикалық  әлеуметтік-медициналық  семинар өтті. Аталмыш шара перзенттеріне екпе салдырмаған ата-аналарға иммунопрофилактикалық  вакцинаның  тиімділігін түсіндіру мақсатында ұйымдастырылды.

Жиынға  ҚР  Денсаулық сақтау министрлігі  қоғамдық денсаулық сақтау комитетінің бас сарапшысы Нұршай Әзімбаева, ҚР Денсаулық  сақтау министрлігі СЭСжМ ҒПО  департаментінің эпидемиолог дәрігері Лена Қасабекова, сондай-ақ  БҚО қоғамдық денсаулық сақтау департаментінің басшысы  Жайдар  Құрманов пен облыстың өкіл имамы Еркебұлан Қарақұлов қатысты.

Соңғы жылдары вакцинаға бірқатар ата-аналардың қарсылық танытқаны мәлім. Айта кетсек, облыс бойынша жалпы 959 бала екпе алмаған. Иммунопрофилактикалық вакцинаға қарсылық танытқан ата-аналардың 76,1%-ы діни себептерді желеу етсе,  жеке көзқарастары бойынша 14,4%, ал екпенің тиімділігіне 9,4%-ы сенімсіздік танытқан. Сала мамандарының айтуынша, кей ата-аналар  ғаламтордағы түрлі арандатушы ақпарттарға сеніп, ұл-қыздарына вакцина салдырудан бас тартқан.

• Балаларға екпе жасау – медицинаның үздік жетістіктерінің бірі. Екпе арқылы миллиондаған бала өлімнен, мүгедектіктен аман қалуда. Алайда соңғы кезде екпеге қарсы шығатындардың қарасы көбейді. Әсіресе, Алматы, Ақтөбе, Батыс Қазақстан облыстарында екпеге қарсы ата-аналар көп.  Біздің бүгінгі мақсатымыз – сол ата-аналармен  арнайы кездесіп, олардың екпе туралы үрейлі ойларын сейілту, - деді  ҚР Денсаулық сақтау министрлігі қоғамдық денсаулық сақтау комитетінің бас сарапшысы Нұршай Әзімбаева.                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                            

Содан соң БҚО   қоғамдық  денсаулық сақтау департаментінің басшысы Жайдар Құрманов  екпенің пайдасын насихаттау туралы  өңірдегі  атқарылған жұмыстарға тоқталды. Оның айтуынша,  2016 жылы облыс бойынша 160  бала екпе алмаса, былтыр  бұл көрсеткіш 134-ке азайған.   Сондай-ақ 2015 жылы  облыста ата-анасы екпеден бас тартқан төрт жасар бүлдіршін туберкулез дертіне шалдықса, 2017 жылы балалар арасында екі көкжөтел оқиғасы тіркелген.

Бір кездері белең алған  қауіпті індеттер екпенің нәтижесінде жойылғандығы туралы  ҚР Денсаулық сақтау министрлігінің эпидемиолог дәрігері  Лена Қасабекова  нақты деректер арқылы түсіндірді.

- Екпенің нәтижесінде әлем бойынша белең алған шешек дерті жойылды.  Жалпы, медицинада екпенің нәтижесінде көптеген аурулардың алдын алуға болатындығы дәлелденді.  Айта кетсек, 2005-2006 жылдары республикада қызылша дертімен науқастанғандар саны  1700-1800 болса, 2017 жылы бұл дертпен ешбір науқас тіркелмеген. Сондай-ақ қызамық  бойынша да жыл сайын еліміздегі 2000-3000  тұрғын ем алып жүрсе, бүгінгі таңда аталмыш дертпен науқастанғандар жоқ. 1995 жылдары елімізде дифтерия, яғни күл ауруы жаппай белең алғаны белгілі. Жылына 1000-нан аса адам қауіпті дертті жұқтыратын. Қазір ол аурудан да құтылдық.  Соңғы дерек  2008 жылы ғана тіркелген. Сонымен қоса 1998 жылға дейін В вирусты гепатитімен жылына 3500-4000  адам науқастанса, бүгінде  ересектер арасында 90-100  жағдай ғана тіркеліп отыр, - деді Лена Құралғазықызы.  Ал өңіріміздің өкіл имамы Еркебұлан Қарақұлов екпенің ислам шариғатына қайшы емес екенін түсіндірді.