ҚР қорғаныс және аэроғарыш өндірісі министрі Бейбіт Атамқұлов Байқоңыр ғарыш айлағы «азаматтық болуы мүмкін» деген ақпаратқа жауап берді.

«Иә, Байқоңырдан Ресей әскерін түгел шығару мәселесінің талқыланып жатқаны рас. Алайда екіжақты келісім әлі болған жоқ, тек осы бағыттағы жұмыс жалғасып жатыр», - деді министр мәжіліс парламентінің үзілісінде.

Сонымен қатар, Атамқұлов мұндай шешімнің Қазақстан үшін тиімді екенін де айтты. Мәселен Ресей сарбаздары Байқоңырдан кетер болса, онда ғарыш айлағынан мол табыс табуға болады екен. Себебі бүгінде жер серіктерін ұшыра алмай жатқан мыңдаған компаниялар бар.

Осылайша, 2018 жыл Байқоңыр тарихындағы әскери парақтың жабылып, оның басқаша қырынан дамуына әкелетін табысты жыл болмақ деп болжайды министр.