Қазақстанда 1 шілдеден бастап базалық зейнетақы толықтай берілетін болады деп хабарлайды Qamshy.kz ақпарат агенттігі.

Бұл туралы ҚР еңбек және халықты әлеуметтік қорғау вице-министрі Светлана Жақыпова баяндады.

Вице-министрдің сөзінше, қазір елімізде базалық зейнатақы алатын 2 миллион 148 мың зейнеткер бар.

"Егер зейнеткердің еңбек өтілі 10 жыл немесе одан кем, не мүлде болмаса оған ең төменгі күнкөріс деңгейінің 54 проценті, яғни 15 мың 274 теңге төленеді. Яғни 10 жылға дейін – бұл кепілдендірілген көлем. Қазақстанда базалық зейнетақыны бұл сомадан төмен ешкім алмайды. Ал егер еңбек өтілі 10 жылдан асса, онда тағы 2 пайыз үстеме қосылады. Мәселен, 11 жыл еңбек өтілі барлар төменгі күнкөріс деңгейінің 56 процентін алатын болады. Егер еңбек өтілі 28 жылды құраса, күнкөріс деңгейінің 90 пайызына жуықтайды", — деді Жақыпова ОКҚ-де өткен баспасөз мәслихатында.

Светланада Жақыпова, сонымен қатар, шілдеден бастап 100 пайыз базалық зейнетақы көлемін 2 миллион зейнеткердің қаншасы алатынын айтты.

"Бүгінде 2 миллион 148 мың адамның 44,5 проценті ең төменгі күнкөріс деңгейінің 100 пайызын алатын болады. Абсолютті мәнде айтсақ, 940 мыңға тарта зейнеткерге 28 284 теңге төленеді. Тағы 43-44%-ы, яғни 931 мыңы  74 пайыздан 90 пайызға дейін алады.Тек 120 мың зейнеткер ғана күнкөріс деңгейінің 54 процентін алады. Себебі бұл азаматтардың еңбек өтілі 10 жылдан кем", — деп нақтылады министр орынбасары.