Американың Колорадо штатының Хайлендс-Ранч елді мекеніндегі STEM School Highlands Ranch мектебінде атыс болды деп хабарлайды Qamshy.kz ақпарат агенттігі CNN телеарнасының таратқан мәліметтеріне сүйеніп.

Оқиға орнында 8 адам жарақат алып, бір оқушы қайтыс болды. Күәгерлердің айтуынша, екі оқушы мектепке қару алып кіріп, екі жақтан оқ жаудыра бастаған.  

Оқиға жергілікті уақыт бойынша 14:00-де болған (астана уақытымен 2:00 – ред.). Атыс болған мектепке жеткен төтенше жағдайлар қызметкерлері дереу оқушыларды эвакуациялаған. Телеарнаның деректеріне сүйенсек, мектепте барлығы 1850 адам оқиды.

Округ  шерифі Дуглас Тони Сперлоктің айтуынша, полиция оқиға орнына екі минуттың ішінде жеткен.

Сонымен қатар күдікті екі адам ұсталды. Олардың екеуі де оқушы.Құқық қорғау органдары бұл іске тағы үшінші адамның қатысы бар болуы мүмкін деген деректі жоққа шығармайды. Қазіргі таңда іздестіру жұмыстары жүргізіліп, оқиғаның мән-жайы тексеріліп жатыр. Әзірге күдіктілердің не себепті бұлай жасағаны белгісіз. Сонымен қатар, автотұрақтан күдіктілердің көлігі анықталған.

«Мен мектептен жүгіріп бара жатқан адамдарды байқадым да,  дене шынықтыру сабағы болар деп ойладым. Бірақ мектептен барлығы қаша бастады», - дейді мектептің маңында тұратын куәгердің бірі.

Естеріңізге сала кетсек, STEM School Highlands Ranch мектебі 1999 жылы 20 сәуірде дәл осындай қайғылы оқиға болған «Колумбайн» мектебінің жанында орналасқан.

Ұсынған: Маржан Сәбет