Бүгін Ысқақ Егембердиев "Атырау-Ақпарат" медиа-холдингінің жаңа директоры болып тағайындалды, деп хабарлады Атырау облысының коммуникациялар қызметі.

"Атырау-ақпарат" ұжымына жаңа басшыны Атырау облысы әкімнің орынбасары Бақытгүл Хаменова таныстырып, қызметіне сәттілік тіледі.

Ысқақ Егембердиев​ 1983 жылы дүниеге келген. Білімі – жоғары.

2000-2004 жылдары Әл-Фараби атындағы Қазақ ұлттық университетінің Журналистика факультетін бітірген.​ Одан кейін 2005-2007 жылдары Әл-Фараби атындағы Қазақ ұлттық университетінің журналистика магистрі біліктілігі мен академиялық дәрежесін алған.

Еңбек жолын 2000 жылы Қарағанды облысы Жезқазған қаласының​ "Сарыарқа", "Мысты өңір" ​ газеттерінде тілші болып бастаған.

2003-2004 жылдары "Қазақ университеті",​ "Жас Алаш”" газеттерінің тілшісі қызметтерін атқарған.

2005-2019​ жылдары аралығында​ "Хабар" агенттігінде сценарист, редактор, шеф-редактор, продюсер, жоба жетекшісі болып еңбек еткен.

2019 сәуірінен бастап "Атырау-Ақпарат" ЖШС-і директорының орынбасары қызметін атқарып келді.

Қазіргі уақытта "Атырау – Ақпарат" медиахолдингі 2 облыстық, 7 аудандық газетті, 11 сайтты және үлкен баспахананы біріктіріп отырған үлкен құрылым.

Қазіргі уақытта холдингте дәстүрлі журналистикамен бірге, интернет медиа дамып келеді.