Ішкі істер министрлігіне әйелдер мен балаларды зорлық-зомбылықтан қорғау жөніндегі арнайы бөлімшелер штатын қалпына келтіруді тапсырамын. Бұл туралы ұлттық қоғамдық сенім кеңесінің 5-отырысында президент Қ.Тоқаев мәлімдеді.

Мемлекет басшысы әйелдерге қарсы зорлық-зомбылық оларды қоғамға толыққанды аралсудан айыратынын, отбасы институтына теріс әсер ететінін айтты.

– Бұл өзекті мәселені мемлекеттік органдар мен үкіметтік емес ұйымдардың ортақ күш-жігерімен ғана шешуге болады. Мұнда ІІМ-нің 1999 жылы құрылған әйелдер мен балаларды зорлық-зомбылықтан қорғау жөніндегі арнайы бөлімшелеріне басты рөл біріліп отыр. Олар полицияның азаматтық қоғаммен өзара іс-қимылының тиімді буыны болуы керек. Алайда бір кездері олардың штат санының жартысына жуығы қысқартылды. Сондықтан Ішкі істер министрлігіне әйелдер мен балаларды зорлық-зомбылықтан қорғау жөніндегі арнайы бөлімшелер штатын қалпына келтіруді тапсырамын, –  деді президент.

Тоқаев сондай-ақ әйелдер мен балаларға қарсы зорлық-зомбылық қылмыстары бойынша әйел тергеушілерді мамандандыруды ұсынған кеңес мүшесі Айгүл Орынбектің бастамасын атап өтті.

Оның айтуынша, бұл жәбірленушілерге біржақты және әдепсіз көзқарас фактілерін болдырмауға мүмкіндік береді.