Нұр-Сұлтанда әйел баласымен 12 қабатты тұрғын үйдің балконынан секірмек болған, деп хабарлады қалалық полиция департаменті. 

"22 қазан күні сағат 17:30-да Кубрин көшесінің бойында полиция капитаны Қайрат Нариманов көп қабатты үйдің балконынан аяғын салбыратып тұрған әйелді байқаған. Оның қолында баласы болған. Ол секіру ниетімен балконның қанатында отырған. Оны байқаған полицей дереу кіреберіске қарай жүгіріп, жоғары көтерілген. Әйелдің оны байқамай тұрғанын пайдаланып, полиция қызметкері әйелді ұстап қалды" делінген хабарламада. 

21 жастағы жас әйел мұндай қадамға отбасылық жанжалдан кейін барғанын айтөан. Оның қолында бір жарым жасар баласы болған.

– Ол күні мен бір тәуліктік кезекшіліктен кейін демалыста едім. Балаларыммен балабақшадан қайтып келе жатып, үрейленіп тұрған азаматтар мен балконның қанатында отырған әйелді байқадым. Ойланбастан кіреберіске қарай жүгірдім, осы кезде менімен бір куәгер лифтіге бірге кірді. Қуанышқа орай, әйелді аман алып қалдық, – деді полиция капитаны Қайрат Нариманов. 

Бүгінде жас ананы осындай жағдайға жеткізген жұбайына қатысты қорғау нұсқамасы шығып, отбасы қатаң бақылауға алынды. Әйелмен профилактикалық әңгіме жүргізіліп, психологиялық көмек көрсетілді.