Қос бүйрегі бірдей семіп, ауыр сырқатқа душар болған дарынды жас күйші-ұстаз Бекзат Мұстафаевқа Белорусь мемлекетінде ота жасау үшін қомақты қаражат қажет. Өнерлі жігітке қаржыны жинау оңай болмай тұр. Сондықтан жас күйші шарқ ұрып ақша табумен әлеп. Қолынан келері қара домбырасымен күй шертіп, көпшілікті қайырымдылық концертіне шақыру. Сондай іс-шаралардың бірі 27 ақпан күні Алматыдағы А.Жұбанов мектеп-интернатының үлкен залында өтеді.

Бекзат ота жасату үшін былтыр Белорусьте арнайы тексерістен өтіп, донорлық трансплантациялаудың кезегіне тұрып келген. Ол сапарға жұмсалған қаржы да Бекзатқа маңдай тер, тынымсыз еңбектің, жүрегі жұмсақ, қолы ашық жомарт та мейірімді жандардың арқасында жиналды. 

Дарынды жігіт алдымен шапқылап жүріп, өнердегі үлкен-кіші әріптестерінің қолдауымен, былтыр мамыр айында "Аңсау" деп аталатын онлайн форматта концерт берді. Мұнымен тоқтамай құзырлы министрліктерге ұсыныс-тілек хаттармен шықты. Соның нәтижесінде, маусым айында "Мен сені сүйемін, Өмір!" атты қайырымдылық концертін өткізді. Оған "Отырар сазы" фольклорлық-этнографиялық оркестрі және жекелеген танымал өнер тұлғалар, сонымен бірге өзінің баулып жүрген таңдаулы шәкірттері қатысты. Өнерпаздың бұл концерті "АБАЙ TV" телеарнасынан көрсетілді.

Осынау үлкен іс-шараның бәрін Бекзат аптасына үш күн Диализ орталығына барып, жасанды қан тазарту процесін басынан кеше жүріп, кей күндері 200-ге дейін көтерілген қан қысымына төзе жүріп атқарды.

Ауыр сырқатты жеңу жолында Бекзат кезекті рет қара домбырасын қолына алмақ. 27 ақпан күні "Аманат" өнер орталығы мен өзі түлеп ұшқан А.Жұбанов атындағы өнер мектеп-интернаты ұжымдары қолдап, қолғабыс жасауымен "ӨМІР-ӨЗЕН АҒАДЫ..." атты қайырымдылық концерт өткізілмек.

Концерт Алматы қаласында Дарынды балаларға арналған А.Жұбанов мектеп-интернатының үлкен концерт залында сағат 15:00-де басталады.

Концертті өткізуге "Аманат" өнер орталығының жетекшісі, ҚР Еңбек сіңірген қайраткері, дәстүрлі әнші Сәуле Жанпейісова мұрындық болып отыр. Кеште өнер орталығының ұстаздары және үздік шәкірттері өнер көрсетеді. Кіру тегін. Тек келушілер талантты күйшінің өнерімен сусындап, қолдау ретінде Бекзаттың есеп-шотына әркім мүмкіндігінше ақша аударса, болғаны.

Дарынды өнерпаздың отасына қаржы жинауға атсалысамын деген жандар үшін төменде Бекзаттың есеп-шоттарының реквизиттері көрсетілген:

РЕКВИЗИТТЕР:

МҰСТАФАЕВ БЕКЗАТ ДӘУРЕНҰЛЫ

KASPI GOLD: 4400 4301 6544 0931

HALYK BANK: 4405 6397 6384 0350