Белгілі ақын, қоғам қайраткері, Қазақстанның Еңбек ері Мұхтар Шахановтың 80 жылдық мерейтойы қарсаңында Алматыда Ұлттық құндылықтар ассоциациясы қоғамдық ұйымының ұйымдастыруымен "Жігерлендіру" атты форум өтті.

Іс-шара модераторы журналист Арман Құдайберген форум атауы ақынның өлеңімен аттас қойылуы кездейсоқ еместігін, Мұхтар Шахановтың шығармашылығы мен қайраткерлігі ұлттың ұпайын түгендеу, мүддесін қорғауда әркімге әрдайым жігер сыйлайтынын атап өтті.

"Форумды өткізу туралы ой туындағанда ел алдында жүрген азаматтардың басын бір жерге тоғыстыру қиынға соғатынын айтып, ойларынан айнытпақ болғандар, көңілге күдік ұятқандар кездесті" деген ол бүгінгі форум ұлттық мәселе дегенде түрлі көзқарас, алуан ұстанымдағы азаматтар, зиялы қауым өкілдері бір жерге жинала алатыны көрсеткенін мәлімдеді.

Форум мерейтой иесіне сөз беруден басталды. Мұхтар Шаханов жиналғандарға өзін әлсіз ақын санайтынын айтып, келушілерге алғыс білдірді. Артынша бірауыз өлең оқыды.

Ізінше форумға арнайы шақырылған спикерлер ақынның шығармашылығында арқау еткен, қайраткерлік қызметінде айналысқан мәселелер туралы сөз сөйледі.

Ақын, филология ғылымдарының докторы Бауыржан Жақып қолына қалам ұстаған кез келген ақын Мұхтар Шахановтың шығармашылығына соқпай кетпейтінін атап өтіп, күзде ақынның мерейтойы жазушылар одағы деңгейінде кең көлемде аталып өтілетінін жеткізді. Қазақстанның еңбек сіңірген қайраткері Асылы Осман ақынның қазақ руханиятындағы орны мен оның дамуына сіңірген еңбегі туралы айтты.

Өнертанушы Ерлан Төлеутай Мұхтар Шахановтың ақындық принципі мен мінезіне тоқталып, билікке ұдайы батыл мәлімдемелер жасап, ұсыныстар білдіріп отырғанына, халыққа ұнамсыз саясатын сынап, ойын ашық жеткізуден тайсалмағанына назар аударды.

Қоғам белсендісі Мұхтар Тайжан ақын белсене араласқан қоғамдық-саяси істер туралы сөз қозғады. Ол Мұхтар Шаханов Кеңес билігі кезінде Желтоқсан оқиғасына баға беру, оның шындығын айту мәселесін биік мінберлерден көтергенін, Наурыз мерекесін тойлау үрдісін жандандыруға күш салғанын, тәуелсіздіктің алғашқы жылдары мемлекеттік тіл мәселелесі туралы батыл мәлімдемелер жасағанын атап өтті.