Ақпан айынан бері қамауда отырған белсенді, саясаткер, тіркелмеген Демократиялық партияның жетекшісі Жанболат Мамайдың ісі сотқа жіберілді. Бұл жөнінде белсендінің әйелі Инга Иманбай хабарлады.
"Бүгін Жанболат Мамай мен адвокаттарына айыптау актісі беріліп, оның ісі Бостандық аудандық сотына қылмыстық кодекстің үш бабы бойынша жіберілді. Қаңтар бойынша 400 бап (заңсыз митинг ұйымдастыру), 378 бап (полицияға тіл тигізу), 274 бап (несиелік амнистия бойынша жалған ақпарат тарату). Жанболат өзіне тағылған айыптың ешқайсын мойындамайды, өзіне қатысты істің барлығын саяси жала деп бағалайды", деп жазды Инга Иманбай facebook парақшасында.
Инга Иманбай Жанболат Мамайдың ісі бойынша көптеген адам құқығы жөніндегі халықаралық ұйымдарға жүгінген. Адам құқығы саласындағы халықаралық Human Rights Watch және Amnesty International ұйымдары мәселеге назар аударып, белсендіні қудалаудың саяси астары бар екенін хабарлап, билікті Мамайды босатуға шақырған.
Жуырда Инга Иманбай Еуропарламент отырысына онлайн қатысып, ол жерде де Мамай ісін айтқан. Ал одан бір күн бұрын Жанболат Мамайға тағылған "жаппай тәртіпсіздік ұйымдастырды" деген айып "Бейбіт жиын өткізу тәртібін бұзу" бабымен (400-бап) алмастырылған. Инга Иманбай билік мұндай қадамға халықаралық қысымнан кейін барды деп санайды.
Пікір қалдыру