Жыл соңына дейін өңірді газбен қамту деңгейі 56,5 пайызға жетеді. Бұл туралы Жетісу облысының әкімі Бейбіт Исабаев президент қабылдауында мәлім етті.

Облыс әкімінің айтуынша, аймаққа 188,2 миллиард теңге инвестиция тартылып, бірқатар перспективті инвестициялық жоба іске асырылып жатыр. Олардың қатарында Кербұлақ ауданындағы металлургия комбинаты, «Қорғас – Шығыс қақпасы» арнайы экономикалық аймағындағы «Қазақстан-Қытай халықаралық өнеркәсіп қаласы» индустриалды паркі, Жоңғар қақпасы аумағындағы қуаты 1 ГВт болатын жел электр станциясы сияқты ірі жобалар бар.

– Жыл соңына дейін өңірді газбен қамту деңгейі 56,5 пайызға жетеді. 2028 жылға қарай Жетісу облысы көгілдір отынмен толық қамтылады деп күтіліп отыр. Соңғы 2 жылда облыста 86 әлеуметтік инфрақұрылым нысаны салынып, жөндеуден өтті, – деді Бейбіт Исабаев.