Ақ Ордада үш сағат бойы Үкімет мүшелерімен кеңейтілген кеңес өткізген Елбасы Нұрсұлтан Назарбаев министрлер кабинетіне маңызды міндеттер артылып отырғанын айтты. Бұл туралы «Қамшы» порталы хабарлайды.

Жиында негізгі әңгімеге ел Үкіметінің экономикалық дағдарыс жағдайындағы жұмысы арқау болды.

«Әрекет ететін, қызықты уақыт келді. Реформалар уақыты, елді, экономиканы жаңа сатыға көшіретін өзгерістер уақыты. Сондықтан да, сендердің көздері осы жұмыс деп жанып тұруы керек. Сендер үлкен өзгерістер жасайын деп тұрсыңдар. Қаз балапандарының қанаты шыққанда иықтары ауырады. Міне, біз осындай сәтте тұрмыз. Әрі қарай ұшуымыз үшін осы ауыртпалыққа шыдауымыз керек» деді Елбасы Үкімет мүшелеріне қарата.

Осыларды айта келе, Елбасы бүгінде барлық әлем бастан кешіп отырған экономикалық қиындықтарға қарамастан, қазақстандықтардың жұмыс істеуге қажетті мүмкіндіктерге ие екенін, бастарында баспаналары, астыларында көліктері, үстелдерінде жейтін астары бар екенін де атап өтті. Жақында ғана Қазақ хандығының 550 жылдығын атап өтілгені туралы сөз етіп отырып, мәдениет министрінен: «Бұрын қалай өмір сүрдік, қазір қандаймыз?» деп сұрады. Бұл сұраққа Арыстан Мұхамедиұлы: «Қазір қазақстандықтар бақытты шақта өмір сүруде» деп кесіп жауап берді.