Астанада өткен Үкіметтің кеңейтілген отырысында «Самұрық-Қазына» әл-ауқат қорының басқарма төрағасы Өмірзақ Шөкеев қорда біршама өзгерістер жасауды ұсынды. Бұл туралы «Қамшы» порталы хабарлайды.

Ө. Шөкеев қорды өзгерту шеңберіндегі ойда бар дүниелерді жүзеге асыру үшін тәртіптің қажет екенін айтты. "Өзгертулер шұғыл әрі тікеден-тік орындалу үшін", - деді қордың басшысы.

"Ол тәртіпті кім орнатады?", - деп сұрады Н. Назарбаев. "Өзгертулер тәртібі дегенім ғой, бүкіл холдинг бойынша сондай команданы тікеден-тік жіберу үшін менде құқықтың болғанын қалаймын", - деп жауап берді Өмірзақ Шөкеев.

"Сені тыңдамай ма?", - деп сөзін жалғады Президент. "Тыңдамайды дегенде, мысалы, мен өкілдіктер бойынша (Шетелдегі "Самұрық-Қазына" - Авт.) бір жыл бұрын басқарма шешімін шығардым, бірақ түрлі себептермен ол өкілдіктер әлі жабылған жоқ", - деді Ө. Шөкеев.

"Сен жассың, білімдісің, күшің тасып тұр, саған өкілеттілік берілді, қызметің бар, сен мені тыңдамайды деп шағымданбақшысың ба? Тыңдаудың өзі ыңғайсыз. Кім тыңдамайды, ал айт? "Самұрық-Қазынада" Өмірзақты кім тыңдамайды?", - деп сұрады Мемлекет басшысы. "Ол жерде мүдде жетерлік, маған сіздің бір ауыз сөзіңіз керек, болды", - деп жауап берді Ө. Шөкеев.