Internette jaqynda ǵana «qarjy jymqyrdy» dep tutqyndalǵan Tuńǵyshbaı Jamanqulovtyń, qamaýǵa alynardan birneshe kún buryn Elbasyna arnap jazǵan vıdeo málimdemesi paıda boldy, dep habarlaıdy «Qamshy» portaly QazAqparatqa silteme jasap.
Vıdeoda akter Mádenıet mınıstri Arystanbek Muhamedıulymen bas arazdyǵynyń bolǵanyn, fılmge bólingen qarajatty «Qazaq eli» serıalyna aýdaryp jibergenin, Talǵat Jánibekovtiń shalys basyp, mınıstrdi aıyptap aǵat qylyq jasaǵanyn, óziniń Eńlik Sydyqovany qorǵap, jýrnalıske vıdeo suhbat bergenin, Arystanbek Muhamedıulymen túsinisý úshin Astanada kezdeskenin, keshirim suraǵanyn moıyndaı otyryp, biraq mádenıet mınıstriniń mámileden bas tartqanyn, «bala-shaǵań qańǵyryp qalady» dep qoqan-loqqy kórsetkenin, qısynsyz aıyp taǵyp, talap qoıǵanyn aıtqan.
Eske salsaq, 2 qarasha kúni «69 mıllıon teńge jymqyrdy» degen aıyppen Halyq artısi, tanymal akter Tuńǵyshbaı Jamanqulov qamaýǵa alyndy. Buǵan deıin Jamanqulov prodúserlik etetin "Fenıks" kórkem fılmine qatysty daý týyndap, birneshe tekserý bolǵan.
Kıno men teatr sahnasynda júzdegen ról somdaǵan akter Jamanqulov buǵan deıin Mádenıet jáne sport mınıstrin aıyptaǵan edi. Oǵan Eńlik Sydyqova esimdi qyzdyń mınıstrdi aıyptaǵan málimdesi túrtki bolǵan bolatyn.
Tuńǵyshbaı Jamanqulovtyń Elbasyna arnaǵan vıdeodaǵy «arasha suraý haty»:
«Asa qurmetti Prezıdent myrza! Qadirli Elbasy! Qymbatty Nursultan Ábishuly!
Men Tuńǵyshbaı Jamanqulov, ózińiz jaqsy biletin, Qazaqstannyń halyq ártisi Memlekettik syılyqtyń laýreaty, Qazaq ónerine qal-qadirinshe qyzmet etip júrgen baýyrlaryńyzdyń birimin.
Osy vıdeo arnaý arqyly suhbat júrgizýime bir másele bolyp tur. Ol - Mádenıet mınıstri Arystanbek inimizdiń meniń túbime tóndirip otyrǵan qara bulttary jaıynda. Ózińiz bilesiz, men 2 jyl buryn sizdiń qabyldaýyńyzda bolǵanda Arystanbek ekeýmizdiń aramyzdaǵy qarym-qatynas jaıynda suraǵanyńyzda, Men, sizdiń kadryńyz bolǵandyqtan, mınıstrlik jumysyn endi bastap jatqandyqtan artyq eshteńe aıtpaǵan edim. Óıtkeni, ol, eldiń qadiri, sizdiń qadirińizge baılanysty bolǵandyqtan, jumysty jańa bastaǵan soń jaýapty isteıtin shyǵar degen oıda boldym.
Árıne, basqa jumystarynyń bári jaqsy bolyp jatqan shyǵar. Biraq, meniń tóńiregimde bolyp jatqan yńǵaısyz jaǵdaılardy sizdiń qulaǵyńyzǵa shaldyryp, esińizge salǵandy jón kórip otyrmyn:
Mine bir jyldan asty. Arystanbek Muhamedıuly meniń barlyq jumystarymnyń aldyna tosqaýyl qoıyp, túsirile bastaǵan kınoma shekteý jasap, memlekettiń bólgen aqshasyn bizge jiberttirmeı, ár túrli syltaýlardy aıtyp, toqtatyp, aqyry ol aqshanyń toqsannan astam prosentin «Qazaq eli» serıalyna aýdaryp jiberdi. Bul másele jóninde maǵan ózi erterek aıtsa, maǵan osy kerek bolyp jatyr dese, men eshqandaı da qarsylyq bildirmes edim, óıtkeni bul elimizdiń abyroı úshin túsirilip jatqan dúnıe.
Biraq, kúnde erteńmen, erteń, taǵy birazdan keıin, aqsha jiberem tosasyzdar degen syltaýmen soza kelip, aqyry aıaǵy osyndaı boldy. Keıinderi bizdiń tóńiregimizdegi jumys istep júrgen jıyrma shaqty adam aılyqsyz qalyp, asa qıyn jaǵdaıda júrgen kezde «Fenıks» fılminiń rejıseri jáne senarı avtory Talǵat Jánibekov degen baýyrymyz jastyqpenen, ashýmenen baıqamaı teledıdardan aýyr sóz aıtyp qoıdy. Onyń ózine «uıat boldy» dep aıtqan bolatynmyn. Keıinirek túsiniskendeı bolyp edi, biraq báribir sotqa berip onyń júnin jyqty.
Sol kezderde aıaq astynan «Óner akademıasynda» oqyǵan bir qyzdyń vıdeo málimdemesi shyǵyp, aıǵaı-shý shyǵyp ketkenin jurt biledi. Men jeti qaryndastyń aǵasy bolǵandyqtan, meniń de qyzym bolǵandyqtan, bul qyz bala jylap jatyr, osyǵan qysym jasalyp jatyr degen sózder aıtylǵan soń jýrnalıspin dep kelgen bir qyzǵa «ondaı ósekti estip edim» dep vıdeo ıntervú berip qoıyp edim. Ol kinámdi moıyndaımyn.
Biraq, men keıin Arystanmen túsinispek bolyp aldyna baryp sóılesken kezderdiń bárinde «maqul, maqul» dep meniń sózimdi quptamaı, isimdi ońǵa bastyrmaı qoıdy. Keıin, qysastyqpen qastandyq jasap meniń basqaryp otyrǵan «Qazaqstan teatr qaıratkerleri» odaǵyn ydyratyp, onyń Almatydaǵy teatr dırektorlarynyń bárine qoqanloqy jasap, «odaqtan shyǵyńdar» degen áńgime júrgizip, osyndaı yńǵaısyz jaǵdaı jasady. Almatyda alty teatr boldy, elimizdegi basqa óńirlerdegi 48 teatrdyń qyzmetshileriniń bári meniń jaǵymda. Olar meniń bul odaqty qalaı kótergenimdi biledi. Sondyqtan maǵan degen olardyń yqylasy erekshe.
Bul – Sizdiń arqańyzda maǵan kelgen abyroı-ataq dep esepteımin. Men árbir artyq sózimde elimizge eshqandaı da nuqsan keltiretin sóz aıtqan emespin. Sizge degen erekshe yqlasymdy ylǵı da aldyma sóz qyp aıtyp júremin. Sizdiń elimizge sińirgen eńbegińizdi ylǵı da aspandatyp júremin. Qazir bizdiń qazaq memleketi jer dúnıege máshhúr bolǵan úlken memleket bolǵanyn maqtanyshpen aıtyp júremin. Men eshqandaı bir saıası toptarǵa, basqa da bir ósek áńgimege aralasqan emespin. Eshqandaı hattarǵa, qoldaýlarǵa qol qoıǵan emespin. Tek sizdiń ǵana saıasatyńyzdy qoldap, sizdiń qasyńyzda júrýdi armandap júrgen Óner adamymyn.
Biraq, keıigi kezde Arystanbek Muhamedıuly óziniń múmkindikterin paıdalanyp, sol fılmge bir jyldan astam jaratylǵan qarjyny jerge shashtyńdar dep, nahaqtan kiná taǵyp, bir emes onshaqty ret teksertip, aqyr aıaǵy bas prokýratýraǵa aryz jazyp, Bizdi astanalyq qarjy polısıasyna teksertip jatyr. Mine onshaqty kún boldy, qarjy polısıasynyń eń bir qatal tergeýshileri kelip, meniń tóńiregimdegi adamdardy bopsalap, zorlap, Bolmaǵan nárseni boldy deýge deıin jetkizip, qatty qınap jatyr. 2 áıel adamdy otyrǵyzyp, 3 kúnnen beri olardy bolmaǵan nárselerdi boldy dep aıtqyzyp jatyr. Bundaı yńǵaısyz jaǵdaıdy sizge aıtýyma týra kelip otyr.
Endi, keshe ǵana, 26 qazan kúni, meni burynǵy shákirtim, Áýezov teatry Erlan Bilál men óziniń mınıstrliktegi «Qazaq áýenderi» dep atalatyn aksıonerlik qoǵamnyń prezıdenti Asqat Maıamerov ekeýi meni Arystanbek shaqyryp jatyr, sóıleskisi keledi, mámlege kelgisi keledi dep Astanaǵa alyp bardy. Túste ushyp baryp, keshke deıin kútip otyryp, keshki saǵat jeti jarym, segizderde «Kafestar» degen restoranda kezdesip, bir saǵattaı áńgimelestik. Men sol jerde ózimniń jibergen kishkentaı qateligimdi, álgi qyzdy qoldap, «uıat bolǵan» eken degen sózim úshin keshirim suradym. Biraq, ol ony qabyldamaı, meni ol jerde túsinisýshilikke, mámlege emes, maǵan qoqanloqy jasaý úshin, meni paıdalanyp, álgi qyzdy taýyp alyp «aıtqanyn teristep, menen keshirim suraıtyn» vıdeo málimdeme jasatasyń dep kúshtedi. Men ol qyzdy bilmeıtinimdi, kórmegenimdi aıttym. Ol meni tyńdaı ma, men uıymdastyrmasam qalaı bolady degen sózime kónbeı, «Men seni qurtamyn, adamdaryńnyń bári kináni seniń moınyńa artyp jatyr, erteń sottalasyń, 6 jylǵa otyrasyń, áıeliń, bala-shaǵań qańǵyryp qalady» degen sıaqty qoqanloqylar jasady. Osynyń bárin men jasym úlkendikpen, betpaqtanbaı ózimdi ustap túsinistikpen tynysh otyrdym. Biraq, álgindeı sózderden keıin, anaý qyzdy uıymdastyrǵan sensiń, ony jazǵan, jazdyrǵan sen degen naqaq kúıe jaqty. Sen saıasat jaǵyna kettiń, sen oppozısıonerlerge de qosylyp jatsyń degendi aıtty. Men tipti tilden qalyp óte qıyn jaǵdaıda otyrdym. Osyndaı sózderdi aıtyp, «saǵan 2 kún ruqsat beremin, 2 kúnde jańaǵy tapsyrmany oryndamasań, qyzdy taýyp teledıdar arqyly keshirim suratpasań basyńa «kún týady»» dep meni qorqytyp, bopsalap osyndaı jaǵdaıǵa jetkizdi, AǴA!
Men sizden Qazaqstan Respýblıkasynyń azamaty retinde, ózińiz meniń ónerimdi jaqsy kóretin inińiz retinde Maǵan azamattyq qorǵan bolýyńyzdy, arasha túsýińizdi suraımyn. Óıtkeni osynsha jyldardan beri jınaǵan abyroı ataǵym, halyqtyń maǵan degen súıispenshiliginen aırylyp uıatqa qalaıyn dep otyrmyn. Árıne, meniń eshqandaı jazyǵym joqtyǵyn basa aıtqym keledi. Múmkindigińiz bolsa meni qabyldap, kózbe-kóz sóılesseńiz dep edim. Aldyn ala 2-3 ret osy jaıynda arasha suraǵan hattarymdy sizge jiberip edim, jetpegen kórinedi. Ókinishke oraı, sizge osy vıdeo suhbatymdy jetkizbekpin. Arasha bolyńyz AǴA! ÓTİNEM SİZDEN!
Bizdiń jazyǵymyz joq, tek qana jaqsy kıno túsireıik. Qazaqstannyń abroıyn kótereıik, Qazaqstan kosmonavtıkasynyń abyroıyn dúnıejúzilik jaǵdaıǵa jetkizeıik degen izgi úmitimniń aıaqasty bolǵanyna qapaly bolyp otyrmyn. Men Arystanbekti onsha jaý kórmeımin. İstep jatqan jumystary bar shyǵar. Aramyzda qandaı qara mysyqtyń júgirgenin, ne sebep bolǵanyn túsine almaı dalmyn. Ony ózińiz bilesiz. Meni onsha unatyńqyramaıtyn tulǵaly azamattardy maǵan qarsy qoıyp, 6 teatrdyń dırektorymen qosa Asanáli aǵamyzdy maǵan qarsy qoıyp, Meniń syrtymnan ǵaıbat sóz aıtqyzyp osyndaı nársege baryp júr. Bul aldymen bizdiń elimizge syn. Mádenıetimizge ónerimizge syn bolady, túptep kelgende sizdiń abroıyńyzǵa syn bolama dep alańdaımyn. Maǵan kómektesińiz aǵa, arasha túsip, qorǵan bolýyńyzdy ótinip suraımyn.
İnińiz Tuńǵyshbaı Jamanqulov.»
Aıta keter bolsaq, 2 jyl buryn, 2014 jyl 21 tamyzda Memleket basshysy Teatr qaıratkerleri odaǵynyń tóraǵasy Tuńǵyshbaı Jamanqulovty qabyldady.
Kezdesýde teatr ónerin damytýdyń negizgi aspektileri, teatrlardyń repertýar saıasaty jáne olardyń shyǵarmashylyq deńgeıin odan ári kóterý máseleleri qaraldy.
Nursultan Nazarbaev eldegi mádenıet pen óner salasynyń júıeli damýyn ataı kele, tarıhı taqyryptarǵa arnalǵan qoıylymdardyń mańyzdylyǵyn aıtqan bolatyn.
