Jumysqa da, otbasyna da, bala tárbıesine de úlgerip, bárine ýaqyt taba biletin qaısar kelinshek, ortańyzǵa syıly tulǵa bolǵyńyz kele me? Endeshe dál sondaı jannyń keńesine qulaq túrińiz. Tanymal telejúrgizýshi, aıaýly jar, asyl ana, QR Eńbek sińirgen qaıratkeri Gúlmıra Daırabaımen týǵan kúni qarsańynda áńgimelesýdiń sáti túsken edi. Syr-suhbatty siz de oqyp, oı túıińiz.
— Gúlmıra hanym, týǵan kúnińiz qutty bolsyn! Soǵan qaramastan bizben áńgimelesýge keliskenińizge raqmet. «Qazir sabaqqa kirip ketemin» dedińiz. Jastardy telejýrnalıstıkanyń qyr-syryna úıretip júr ekensiz. Áńgimeni osy mektebińizden bastasaq. Kóbine kimder kelip tálim alady, ereksheligi nede?
— Negizi bul joba 4-5 jyl buryn teorıa júzinde bastalǵan bolatyn. Biraq ýaqyttyń tyǵyzdyǵyna, grafıktiń bos bolmaýyna baılanysty praktıkaǵa bıyl ǵana endi. Bıylǵy jyly qańtar aıynan bastap osyny endi bir ret berip kóreıin dep qolǵa aldym. Minekı, 9-maýsymǵa jalǵasyp jatyr. Iaǵnı, oǵan suranys bar degen sóz. Ol semınar bir kúndik, eki kúndik emes, bir aılyq. Aı saıyn jańa top keledi. Olardyń ishinde, tipten shetelden kelip oqyǵan stýdentter boldy. Mysaly, Túrkıadan, sosyn Anglıada oqyp júrgen qazaq qyzy keldi. Ol shetelde oqyp júrse de, «Meniń sol jaqta alyp jatqan oqýyma sizdiń dárisińiz kómektesedi, osyny ótýim kerek» dep ákesinen ruqsat surap, bir aılyq eńbek demalysyn alyp, meniń sabaǵyma qatysty. Men buny ne úshin aıtyp otyrmyn? Bizde kóbine qoljetimdi nárseniń ózin armandaıdy da, qoıa salady. Al negizi múmkin emes nárse joq. Adam degen umtylys jasasa, qolynan keledi. Osy bir sabaq berip kóreıin dep bastaǵan dúnıem, mine 9-maýsymǵa sozylyp jatyr. Bul ózim úshin úlken bir ósý dárejesi dep qabyldaımyn. Sebebi men de jastardan úırenemin, kóp nársege basqasha kózqaraspen qaraımyn. Qazirgi jastar óte talantty. Búgingi zamanǵa saı alǵyrlyqty, oı-óristerin baıqaǵan kezde ishteı óziń bir tolysasyń. Barlyq adam talantty bolyp týylady. Biraq ol talantty der shaǵynda, kerek ýaqytynda paıdalana bilý kerek. Mysaly, bir top kelesi topqa uqsamaıdy. Meniń dáris berip jatqan mektebimde aı saıyn keletin oqýshylardyń sany elýden tómen bolǵan emes. Barlyǵymyz topyrlap oqımyz. Barlyǵynyń atyn jatqa bilemin. Bir-birimizdiń týǵan kúnderde, merekelerde quttyqtap, toılaımyz. Qazir meniń osy toǵyz maýsymda 450 stýdentim bolypty.
— Olardyń arasynda osy sala boıynsha qyzmetke turyp jatqandar kóp pe?
— Iá, qazir aıta ketetinim, bir qyzymyz «Habar24» arnasyna ornalasty, bireýi qazir «Habarda» júrgizýshi. Endi biri «Qazaqstan-Qostanaı» arnasynyń júrgizýshisi atandy. Keshe ǵana taǵy bir oqýshym «NTK» telearnasyna bekitildi. Qaırat Aıdash degen oqýshym «Qazaqstan» ulttyq arnasynda jańalyqtardy júrgizip júr. Maqtanǵanym emes, shúkir, birazy jaqsy nátıjemen qýantyp jatyr.
—Erekshe, maqtan tutatyn shákirtterińiz bar ma?
— Iá, buryn mektepsiz tárbıelegen shákirtterim – Janserik Beıseev, Irına Ten, Rýslan Bólebaı boldy, Lázzat Tanysbaı. Bylaı qarap tursań, menen de asyp ketken shákirtterim bar. Óziniń ustazynan asyp ketý degen – birinshi meniń jeńisim. Men onymen maqtanamyn. Shákirtiniń jeńisin kórgen adam ol – naǵyz ustaz bolyp atalady. Sol sebepti men búginde daıyndaǵan stýdentterim úshin óte qýanyshtymyn. Kýrstyń segizinshi maýsymynda sondaı sabyrly,baısaldy bir jigit oqydy. Óziniń turaqty jumysy bar, jaqsy tabysy bar, biraq telearnaǵa, medıa salasyna qatysy joq. Sol keterinde «Men bul jerge telejuldyz bolý úshin, jýrnalıs bolý úshin kelgen joqpyn, ózimdi-ózim ashý úshin keldim. Qazir men bastyǵyma óz oıymdy aıta alamyn. Pikirimdi kez kelgen adamǵa jetkize alamyn. Prezentasıa jasap, dokladymdy oqyp, baıandama jasaı alamyn. Búnyń bári siz úıretken dáristiń arqasynda. Siz soǵan úlken úles qostyńyz!» dep aıtyp ketti. Iaǵnı, kez kelgen sabaq, kez kelgen kýrs, kez kelgen master klass ol adamnyń ómirine bári bir óz septigin tıgizedi. Bir tobymda Aıgerim degen kóp balaly ana boldy. Ol maǵan ınstagram paraqshasyna jekege jazyp jiberipti, «Meniń jasym 44-te, kóp balaly anamyn, ata-enemmen turamyn, balalyq kezimde jýrnalıs bolsam, telearnada istesem degen armanym bar edi. Biraq aýylǵa kúıeýge shyqtym, balaly boldym, ekinshi, úshinshi dep, sóıtip bes balaly boldym. Odan ata-enemdi qımadym. Sóıtip, ómirimniń bári ótip ketken sıaqty boldy. Qazir maǵan kesh pe?» dep surady. «Joq, kesh emes». Qazir sol kisi telearnada jumys isteıdi. Kórdińiz be? «Ómirim kúrdeli ózgerdi, ómirim alańsyz ózgerdi. Enem meni jumystan kelgende kútip otyrady. Baqytty ǵumyr syıladyńyz» dep, sondaı bir óziniń jyly sózderin aıtty. Adam «Men 44-ke keldim, ómir bitti» deýi durys emes. Kerisinshe, búkil Eýropa, Amerıka júrgizýshilerdi tek qyryq jastan bastap qana alady. Sol kezden bastap qana efırge shyǵýǵa quqyń bar. Oǵan deıin sen áli ómirdiń tájirıbesinen ótýiń kerek, bilimniń tájirıbesinen ótýiń kerek. Kádimgideı qajetti qor jınaý kerek adam. Bizdegi baǵdarlamalardy qarasańyz, shıki, aýdıtorıaǵa jetpeı jatady. Óıtkeni ony júrgizip otyrǵan jas qyz mynaý qıyn ómirdi súrgen joq. Ol dúnıege bala ákelgen joq, ony omyraý sútimen baǵyp kórgen joq. Baǵdarlamaǵa shaqyryp alyp, «Siz nege eneńizben turmaısyz?» degen sıaqty suraqty qoıady. Sebebi ol ony áli ótken joq qoı. Ómirlik mektepti kádimgi ýnıversıtetti bitirgennen de eń keremet mektep dep esepteımin. Qazirgi tobymda oqyp jatqan Arman degen jigit bar. Jasy 40-ta. 6 balanyń ákesi. Keshe ǵana baspanaly boldy. «Úı satyp aldym, úıim bar, balalarym bar, jasym 40-qa keldi, endi óz armanyma da ýaqyt bolsyn dedim. Keshigip kelgen joqpyn ba? Mende múmkindik bar ma?» dep ol da osy suraqty qoıdy. Biraq qarasam, boıynda óner tunyp tur, túri keremet, ana jigitke qarap alty balasy bar dep aıtpaısyz. Bala-shaǵasymen osy kúnge deıin úısiz turdy. Biraq búginde oǵan qol jetkizdi. Keshegi ótken fotosessıa men ıntervú praktıkalyq sabaǵymyzda meniń baıqaǵanym, kamerada ózin óte erkin ustaıdy. Qońyr daýysy, oqyǵan kitaby, berer aqparaty bar. Ondaı júrgizýshiler bizdiń telearnalarda bolýy kerek. Bizde aqsaq, reıtingisi joq, tek jyltyraq baǵdarlamalar óte kóp. Onyń ǵumyry da qysqa. Ol jyl-jylt etip shyǵady da, jabyla qalady. Eshkimniń esinde qalmaıdy.
—Esińizde qalǵan eń qymbat syılyq qandaı?
— Ózim «Eńbek — bárin jeńbek» degendi jıi aıtamyn. Áke-sheshemiz eńbekqor bolýǵa baýlyp ósirdi. Eńbegińdi adal jáne taza, úlken abyroımen jasasań, shynynda da, tynysh uıqtaısyń. Tek ózińe senesiń! Eger sen óz jumysyńdy 100 paıyz durys jasasań, seniń ornyńdy eshkim tartyp ala almaıdy. Meniń ustanymym solaı. Tamaq isteseń de, baýyrsaq pisirseń de, ózińniń qyzmetiń bolsa da adal jasa. Meniń eń úlken alǵan syılyǵym – Aqordada Elbasynyń maǵan tapsyrǵan «QR Eńbek sińirgen qaıratkeri» ataǵy. Ony kóp bizde jýrnalıser bilmeýi múmkin. Bizde sahnaǵa keshe ǵana kelip, bir ánmen tanymal bolyp, osy ataqty alyp jatqandar bar. Biraq Elbasy Nursultan Ábishuly jarlyǵymen osy jýrnalıser arasynan meni elep tabystady. 2012 jyldyń 10 jeltoqsany áli kúnge esimde. Árıne, bul – meniń eńbegime berilgen, meniń ata-anama berilgen baǵa. Sol kezde ákemniń kóz jasyn kórip: «Papa, nege jylap jatyrsyz? Qýanbaısyz ba?» dep aıtqanymda, «Óz ýaqytynda alǵanyńa qýanyp turmyn» degeni bar. Iaǵnı, kez kelgen dúnıeni óz ýaqytynda alǵan durys. Mysaly, menimen birge jetpiske kelgen Aqushtap Baqtygereeva sol qurmetti ataqty aldy. Sonda qasynda 39 jastaǵy men sýretke túsip jatqanda artqy jaqqa qaraı tyǵylýǵa tyrystym. Bizde qazir kóbi alǵa turyp, Elbasymen birge sýretke túsýge umtylady ǵoı. Al myna kisiniń jasy úlken-aý, maǵan qaraǵanda elý jyldaı tájirıbesi bar-aý degen oı keıde umytylyp ketedi. Sondaı maıtalman bizdiń myqtylarymyz, alda kele jatqan bizdiń qalamgerlerimiz turǵan kezde, alǵa shyǵyp, sýretke túskenim bul – dórekilik, meniń áke-sheshemniń maǵan bere almaǵan tárbıesi bop kórinedi. Ondaı kórinisti men kórsetpeýim kerek. Qazir kópshiligi ınstagramǵa salyp, bárine jarıalap jatady. Árıne, Elbasynyń qolynan alǵannan keıin maqtanady ǵoı. Biraq men jarıalamaımyn. Ol meniń eńbegimniń jemisi. Ómir boıy menimen qalatyn statýs. Muny elimizdiń birinshi adamy maǵan usyndy, ıaǵnı, men oǵan laıyqtymyn. 1994 jyly «Halyq ártisi» ataǵy alynyp, sonyń ornyna «QR Eńbek sińirgen qaıratkeri» ataǵy engizildi. Demek bul – qazirgi tańdaǵy «Halyq ártisi» dárejesimen teńdes ataq. Men ózimniń úlken baǵamdy aldym. Rızamyn.
— Óz salańyzda jetistikke jetýińiz, bıikke kóterilýińiz ákeńizdiń arqasynda degen tárizdi qańqý sózder estip qalmaısyz ba?
— Ondaı bolǵan joq. Árıne, ákem Qyzylorda oblysynda úlken dárejeli qyzmette istedi. Biraq men oqýǵa altyn medalmen kelip, ózim túsip, bir aıdan keıin jumys taýyp aldym. Ákem – Qyzylordada, men – Almatyda. Jumysty tapqanda men emes, meni taýyp aldy. Kóshede jaı kele jatqan jerimnen toqtatyp, sizdi osylaı-osylaı shaqyraıyq dedi. Baıaǵyda rejıserler talanttardy kósheden izdeıtin.
Meniń ákemniń jazýshylyq qabileti óte zor. Qyryq tórt kitaptyń avtory. Kóptegen úlken basylymdardyń basy-qasynda júrgen qalamgerlerdiń biri, Jazýshylar Odaǵynyń múshesi, «Qurmet» ordeniniń ıegeri. Sol sebepten, qannan beriletin dúnıe eshqaıda ketpeıdi dep oılaımyn. Men mysaly, jýrnalısıka mamandyǵyn bitirgen joqpyn. Halyqaralyq bólimde, tarıh fakúltetinde bilim aldym. Qazaqta aýdarymy joq «tektilik» degen uǵym bar. Búgingi jetistigim úshin ata-anama rızamyn. Oıynshyqtyń ornyna kitappen oınap, sony oqyp, oǵan talasyp, túnge deıin oqyp tastaýǵa tyrysyp, sondaı atmosferada óskennen keıin múmkin jýrnalısıkaǵa jaqyn bolǵan shyǵarmyn. Oryssha oqysam da, bir oryssha baǵdarlama júrgizip kórmeppin. Áli kúnge deıin qazaq baǵdarlamalaryn júrgizemin. 1991 jyly Sherhan Murtazanyń shákirti boldym. Sher aǵa áli kúnge deıin «Qazaqstan» ulttyq arnasynyń qara shańyraǵyna kelip jatsa, «Meniń Gúlmırashym qaıda?» dep izdeıdi. Ol kisiniń izdep kelgeniniń ózi men úshin úlken bir baǵa dep esepteımin.
— Elge aktrısalyq qyryńyzben de tanylyp qaldyńyz. Kınoǵa shaqyrtýlar jıi túse me? Qansha kınoǵa tústińiz?
— Negizi usynystar óte kóp. Teleserıaldarǵa da, kórkem fılmderge de túsip jatyrmyn. Ermek Tursynov, Talǵat Temenov, Asqar Uzabaev syndy myqty rejıserlermen jumys istedim. Jalpy eń birinshi rejıserim – Asqar Uzabaev. Ol búgingi rejıserlardyń ishindegi talaby zor, kózi ótkir, óz isin biletin, sheber maman dep bilemin. Alǵash komedıalyq janrdaǵy «Výzery» serıalynda basty keıipkerdiń anasy, ákimniń áıelin oınadym. Odan keıin Ermek Tursynovtyń kınosyna tústim. Sosyn Talǵat Temenovtyń týyndysyna qatystym. Odan soń qyrǵyz rejıseriniń «Jedel járdem» atty serıalyna tústim. Ol kisi meniń qandaı qyzmet isteıtinimdi, kim ekenimdi bilgen joq. Eger rejıser myqty bolsa, men oılaımyn, kóp nárseni ózgerte alady. Men baıqaýǵa ekinshi rólge kelip turyp, basty rólge ótip kettim. Biraq men ony suraǵan joqpyn. Baıqaýdan keıin siz laıyqtysyz dedi. Sonda men «Nesimen men sizge laıyqtymyn? Meniń ýaqytym joq, ýaqytym tyǵyz. Únemi túsirilim alańynda bola almaımyn, úsh aıda men sizdiń jumysyńyzǵa kedergi keltiremin» degenimde ol kisi: «Sonshama sizdiń jumysyńyz qandaı jumys, ýaqytyńyz bolmaıtyndaı?» dep surady. «Men telearnada, osyndaı-osyndaı jumysym bar, júrgizýshiligim bar, «Tańsholpannyń» dıerktorymyn» degen kezde «Munyń bárin ózimiz sheshemiz, bastysy siz kelisesiz be?» dedi. Sol kezde men ózime bergen baǵa esebinde muny qabyldadym. Sol Aıbek esimdi rejıserge óte rızamyn. Tegi menikine óte uqsas, Daıyrbekov. Jasaǵan kınotýyndylary óte myqty. Jáne mynaý sońǵy 2015 jyly úlken bir rezonansqa aınalǵan, jaqsy teleserıaldardyń biri, ekshn janrynda túsirilgen týyndy – «Arnaıy ókilder» serıalynda oınadym. Ol ómirden alynǵan hıkaıaǵa negizdelgen, 8 bólimnen turady. Táýelsizdikke arnalǵan teleserıal. Teleserıaldy kóbine áıel qaýymy kóredi ǵoı. Al bunyń aýdıtorıasy – tek er azamattar. Árıne, er azamat teledıdar kórgende onyń qasynda januıasy bolady. Ol kórermenin tárbıeleıtin, patrıottyq sezimin oıatatyn jaqsy bir týyndy boldy dep esepteımin. Onda men basty keıipkerdiń áıelin somdadym. Sol telehıkaıadan keıin «Qazaqstan» UTA Beıneqor bóliminiń basshysy Moldabek aǵamyz erinbeı meniń kabınetime kelip, «Telefonmen aıta salýyma da bolatyn edi, Gúlmıra, biraq myna kınony kórip, sizge rıza bolǵandyǵym sonshalaqty, kabınetińizge kelip rızashylyǵymdy aıtqym keldi» dedi. Jasaǵan jumysyńnyń osyndaı nátıjesin kórgende, árıne, boıyńdy qýanysh bıleıdi. Onyń aqshasy emes, osy tárizdi jyly sózder mańyzdy shyǵar dep oılaımyn.
— Bir áńgimeńizde, «balalaryma qatalmyn» depsiz.Televızıa salasynda belgili bir grafık joq ekeni anyq. Túsirilim ýaqyty kún-túnge qaramaıdy. Osyndaı tyǵyz jumys kestesinen otbasyńyzǵa, bala-shaǵańyzǵa ýaqytty qalaı tabasyz ? Qalaı únemdeısiz?
— Ýaqytty taba almaıtyn adam ol túk istemeıtin adam dep esepteımin. Ýaqytty tabý kerek barlyǵyna. Tamaq isteýge de, ydys jýýǵa da, kınoǵa barýǵa da. Qazir men otbasymyzben senbi kúni qandaı kınoǵa baratynymyzdy bilemin. Barlyǵyn otbasymyzben aqyldasamyz. Bizde kádimgi dástúr, birinshi ata-anamyzdyń úıine baryp, tamaǵymyzdy iship, solardyń amandyǵyn bilip qaıtamyz. Sosyn tústen keıin ózimizdiń «kóńil-kóterý» baǵdarlamamyz bastalady. Jeksenbi kúni baratyn jıyn-toılarymyz bar degendeı. Onyń barlyǵyn josparlaımyz. Qazir ýatsap jelisi degen jaqsy boldy. Onyń ishinde ata-analardyń chaty, muǵalimderdiń chaty, ony qoıa berip ujymdastardyń, týysqandardyń chaty bar. Barlyǵymyz baılanystamyz. Bul jerde qazirgi tehnologıanyń damyǵan zamany da bárine úlgerýge óziniń úlesin tıgizip jatyr dep oılaımyn. Sol sebepti men barlyǵyna úlgeremin.
— Kóbinde jumysta, jumys babymen shetelde jıi júresiz. Jaryńyzdyń buǵan kózqarasy qandaı? Ol kisi tarapynan qyzǵanysh bolmaı ma?
— Bilmeımin, bolatyn shyǵar (kúlip). Ondaı suraq qoıýǵa ózim jol bermeıtin shyǵarmyn. Sebebi adamnyń júris-turysyna baılanysty ǵoı bári. Nege ondaı másele týyndaıdy? Turmysqa shyǵardyń aldynda bárin aıtqanmyn. «Segiz kún úıge qonbaýym múmkin, tamaqty ýaqytynda jasap úlgermeýim múmkin. Sonyń barlyǵyna kózqarasyń qalaı?» degen kezde, «Onda turǵan eshnárse joq, barlyǵyn birge sheshemiz» dedi. Sondyqtan ondaı artyq másele ortada týyndamaıdy. Qaıta bir-birimizdi qoldaýǵa tyrysamyz. Ol kisimen kezdeskenimniń ózi qyzyq bolǵan. Bir-aq ret kezdesip, ekinshisinde sóz aıtqan. Úshinshisinde kelisimimdi bergenmin, sonymen boldy. Ýaqyt ta joq kezdesýge.
— Sizde qorqynysh bolǵan joq pa, birden kelisim berip, turmys qurýǵa?
— M-m, negizi… kóp teksere berseń, kóp nárse shyǵa beredi (kúlip). Kóp nárseni bilmeı shyqqan jaqsy. Uzaq júrse, kóńili qalyp qoıady. Sebebi adam aqyldy bolsa, barlyǵyn túzep alady. Ol da bir adamnyń balasy. Eshqandaı qıyndyq joq dep oılaımyn. Bári adamǵa baılanysty.
— Ataq-dárejeńizdi, dańqyńyzdy paıdalanǵan kezińiz boldy ma?
— Joq, men negizi óte kishipeıilmin. Kerisinshe, paıdalansam, men baıaǵyda mınıstrdiń orynbasary ne mınıstrdiń ózi bolyp otyratyn edim. Oǵan meniń bilimim de, tájirıbem de, tilim de jetedi. Menedjerlik qabiletim de bar. Biraq men ony paıdalanbaǵan ekenmin. Osy qarashańyraǵymdy, osy telearnamdy qatty jaqsy kórgenim sonshalyqty, basqa nárseni oılaýǵa ýaqyt joq. Bul da meniń bir ómirim. Televızıa meniń otbasymnan da buryn paıda boldy. Sol sebepten bólip jara almaımyn. Óz jumysymdy aqsha tólemese de jasaýǵa daıynmyn. Kóshede júrsem, apalarym, ájelerim, atalarym júrgizbeıdi. O, kisilerdiń bir aýyz batasy, tilegi, ózimniń kishipeıildiligim, qarapaıym tárbıem jolymdy ashyq qyp turǵan shyǵar dep oılaımyn, tfaı-tfaı, shúkir. Keıde baıqaımyn, keıbir áriptesterim qasyńnan ótip bara jatyp amandasýdy umytyp ketedi. Nemese umytyp ketken sıaqty túr jasaıdy. Ony jaı ǵana juldyz bolǵan sáti dep esepteımin. Ol da ótkinshi dúnıe, ótedi de ketedi. Al qarapaıym bolsań, bárine syıly bolasyń, janyń tynysh bolady. Endi ataǵymdy paıdalaný degen oıyma da kirip-shyqpapty (kúlip). Paıdalansam, túsindińiz ǵoı, portfeli bar bir basshy bolyp otyratyn edim tóbede.
— Ózińizge arnaıy kútim jasaısyz ba?
— Sony osy ýaqytqa deıin, 40-tan asqansha oılanbappyn. Dıeta ustaý, betke azannan keshke deıin birnárse jaǵý degen joq. Biraq osy jaqynda betime qarap, birnárseler jasap edim, ózime-ózim unap júrmin sońǵy kezde (kúlip). Qazir de kerek emes shyǵar. Biraq sán salondaryna jıi baratyn qurbylarym «Gúlmıra júr, Gúlmıra júr» dep shaqyrǵasyn, kóńilin qaldyrmaıyn dep erip barǵanmyn. Sóıtip, unap qaldy (kúlip). Seni bireý ýqalaıdy, sıpalaıdy. Betińe maska, pıllıng deıdi, solardy jaǵady. Bir rahat eken. Aınadan ózimdi qarasam, shynynda da áseri baıqalady. Uıqyń qanǵan sıaqty, kóziń jaınap turady. Betiń názik, balǵyn. Sóıtip osyndaı bet kútimderin ózim tapqan sheberim jasap júr. Oǵan da barǵanym aldyńǵy aptada ǵana, týǵan kúnim kele jatqandyqtan, ózime bir qaraıynshy dedim. (kúlip) Buǵan deıin qaraǵan joqpyn. Jalpy kóbi dıeta ustaısyz ba, 6-dan keıin tamaq jeısiz be dep jatady. Men kerisinshe, efırde aryq kórinip qalmaıyn dep, kóbirek jeýge tyrysamyn. Men ózim zertteý jasap kórdim. Mı neǵurlym kóp jumys jasasa, maı kletkalary paıda bolmaıdy. Eki saǵat qana uıyqtaımyn dedim, ǵoı. Mımen kóp jumys isteımin, ol qashan maıǵa aınalady sonda? Aınalmaıdy! Jumys istep tur ǵoı. Sondyqtan maǵan fıtnes te, tamaqqa shekteý de kerek emes.
— Sizdikindeı jumys kestesi bolmasa da, kóp ýaqytyn januıasyna arnasa da shaǵym aıtatyn qyz-kelinshekter kezdesip jatady. Sol kisilerge sizden keńes bolsyn, baqytty otbasynyń kilti nede?
— Menińshe, adam úıde otyryp-aq jumys tabýǵa bolady. Tigin tikseńiz de, toqyma toqysańyz da. Jaı ǵana manty pisirip, ony keńselerge aparyp berseńiz de, ol da kádimgi tabys. Ony súıispenshilikpen jasasańyz, suranys tipti kóbeıedi. Instagramǵa bir jarıalasańyz, qanshama tapsyrys keledi. Men eki-aq saǵat uıyqtaımyn ǵoı. Keıde bir bes saǵat uıqtasam ǵoı, shirkin, dep armandaımyn. Sonda úıdegiler, balalarym aıaıdy. Súıikti jumysyńmen aınalysyp, bar nıetińdi, kóńilińdi soǵan bólgen kezde artyq dúnıege ýaqyt bolmaıdy. Ósek aıtýǵa, bireýdi jamandaýǵa, ınstagramda otyryp erigip, bireýdiń júregin aýyrtatyn dúnıe jazýǵa qolyń tımeı qalady. Adam negatıvti ózi shaqyryp alady! Men mysaly, tańerteń úıden shyǵamyn da, eńsemdi kóteremin. Aspanǵa qaraımyn, kún joq bolsa da, ony bar dep elestetip, taza aýany kóbirek jutyp alamyn da, jaı ǵana kete beremin. Kele jatyp, tanysymdy jolyqtyryp qalsam, durystap amandasamyn. Jaı «Eı, qalaısyń?» dep ótip ketpeımin. Durystap amandasý – júrekpen amandasý. Asyǵyp tursań da «Jaǵdaıyńyz jaqsy ma?» dep sura. Bálkim oǵan kómek kerek, bálkim sizdiń jaı ǵana jyly sózińiz ol adamdy bir qıyndyqtan qutqarady. Ondaıdy, árıne, qazirgi qoǵamda jaǵympazdyq dep túsinýi múmkin. Meıli, oılaı bersin. Ol sol adamnyń oı-órisi. Ol sonymen óziniń oı-órisi tómendigin baıqatady. Men odan uıalmaımyn, ol ózi uıalsyn. Men kerisinshe, uıalamyn, keıde… ózderi bireýdiń kóńildesi bolyp nemese otbasy bolmaı turyp, otbasyǵa qatysty bir nárselerdi jasap, «eı, osynyń…» dep men týraly áńgime aıtqandaryna…. Adam degen ózi jaqsy bolýy kerek qoı, bireý týraly aıtý úshin. Ózi jan-jaǵyn jamamaı júrip, bireýdi jamandaý – uıat. Qarapaıym ǵana mysal, úıdegi kútýshim, toǵyz jyl balalaryma bas kóz bolyp keledi. Men jaman bolsam, ol osynsha ýaqyt menimen turatyn ba edi? Mine, suraq! Minezim ózime unamaıdy. Tik, betke aıtamyn. Bireýge aramdyq jasamaımyn, qara-aq ekenin birden aıtamyn da, kete beremin. Shynaıylyq bolǵany durys. Qyz-kelinshekterge aıtarym, jumys bolmasa da úıdiń tirshiliginiń óz bitpeıdi ǵoı, sony bir úlken súıispenshilikpen jasasa eken deımin. Men úıde asty keremet ázirleımin, qolymnan kelmeıtin taǵam túri joq. Qamyrdy erekshe súısinip jasaımyn. Meniń jasaǵan tamaǵym, ájeptáýir molynan daıyndasam da, tez bitip qalady. Sondaıda anamnan: «Az jasap qoıdym ba?» dep suraımyn ǵoı. «Joq seniń tamaǵyń tátti, sodan tez bitip qalady» deıdi. Demek ne nárseni de mahabbatpen jasaý kerek. Nege qazanda jelinbeı qalyp qoıǵan tamaq dámsiz? Ony demek yqylaspen jasamaǵan. Jumysyn da solaı jasaıtyndar – turaqty emes. Meniń prınsıpim solaı. Úıde otyryp, tamaq istemeıtin kelinshekterge tań qalamyn. Kerisinshe, úıdiń berekesin kirgizip otyrmaı ma? Eń bastysy, áıelder bosansyn, balalar kóp bolsyn. Ómirleri jaqsy bolsyn, joldastary myqty bolsyn!
— Áńgimeńizge raqmet!
Suhbat Ikerim.kz saıtynan alyndy
