QR Aqparat jáne komýnıkasıalar mınıstri Dáýren Abaev Almatyda ótken IX «Medıa quryltaıda» Sheneýnikterge «BAQ-tan «tumshalanyp» júretin ýaqyty ótti» dep eskertti.
«Hanymdar men myrzalar, memlekettik organdardyń jabyq bolǵan mezgili ótip barady dep sizderdi sendire alamyn. Sizder de, bizder de qazirgi ýaqytta memlekettik organdardyń tıimdiligi onyń BAQ-pen baılanysymen anyqtalatyn bolatynyn jaqsy túsinemiz. Bul — qazirgi ýaqytta bar mindetti talap. Sondyqtan, memorgan jabyq bolǵan, mınıstrdiń jabyq bolǵan ýaqyttary ótip barady. Bul — qalypty úrdis», — dedi mınıstr óz sózinde.
Kelesi jyly medıa naryq jáne onyń qatysýshylary týraly aqparat jaryqqa shyǵatynyn eskerte ketetinin eskerte ketken Abaev, «Eshteńe de qupıa emes. Biz qansha BAQ bar ekenin, qaısysy qaı salada jumys jasaıtynyn jaqsy bilemiz. Biz de, sizder de bizdegi san jaǵynan kóp BAQ-tyń jartysy jumys istemeıtinin nemese tek qaǵaz júzine ǵana bar ekenin bilemiz», — dedi.
Aıta keter bolsaq, Konferensıa qatysýshylary 2016 jyly medıa naryǵynyń jaǵdaıyn talqylady. Sharaǵa Qazaqstannan jáne shet elderden 200-den astam delegat jınalǵan. Arnaıy qonaǵy retinde QR Aqparat jáne komýnıkasıalar mınıstri Dáýren Abaev shaqyryldy. Konferensıada Qazaqstan medıasyndaǵy jarnamalyq naryq ta aıtyldy.
Eske salaıyq, qazir QR BAQ týraly zańǵa ózgeris engizý máselesi talqylanyp jatyr. 2 qarashada «QR-nyń keıbir zańnamalyq aktilerine aqparat jáne komýnıkasıa máseleleri boıynsha ózgerister men qosymshalar engizý» týraly zań jobasynyń jumys tobynyń otyrysy ótken bolatyn. Osyǵan deıin mınıstrdiń Esquire.kz bergen suhbaty qazaq tiline aýdarylyp, «Qamshy» portalynda jarıalanǵan edi.
Taqyrypqa tuzdyq retinde buǵan deıin Qazaqstanda túrli máselelerge baılanysty jýrnalıser sheneýnikterdi, depýtattardy sózge tartý úshin arnaıy hat jazyp, aptalap kútetin. Tipti «ustap alyp jatsa da» qasha jóneletin sheneýnikter jetkilikti. Bıylǵy jyldyń kóktem aılarynda jer máselesine baılanysty prezıdent ún qatqanǵa deıin tanymaly jáne aty-jónin eshkim bilmeıtin depýtattar kameradan qashyp júrdi. Al, İshki İster Mınıstri Qalmuhanbet Qasymov ylǵı da jýrnalıserden qashyp júretinimen tanymal.
