Qazaqstan ekonomıkalyq turǵyda damý úshin elge ınvestısıa tartyp, zaýyt-fabrıkalar salyp, aýyl sharýashylyǵyn aıaqtan nyq turǵyzýy mańyzdy. Sonda ǵana ekonomıkasy ár taraptandyrylǵan memleket básekege qabiletti bola alady. Básekege qabiletti elmen ózge respýblıkalar sanasyp, teń dárejede iskerlik qarym-qatynas ornatqysy keledi. Árıne, aýyl sharýashylyǵynda eń mańyzdy nárse – mal tuqymdary men ósimdik sorttaryn asyldandyrý. Asyldandyrylǵan mal men ósimdik mol ónim beredi. Osy maqsatta «Agrobıznes 2020» baǵdarlamasy iske qosylyp, kóptegen tirlikter atqaryldy. Sonyń bir aıqyn dálelin Túrkistanda kórdi. Túrkistanda dástúrli túrde ótetin «Aq kerýen» maqta terimi sharasy kezinde joǵary sapaly «túrkistan» maqta suryby shyǵarylǵany aıtylyp, jurtshylyqqa tanystyryldy. Osylaısha, Qarashyq aýyldyq okrýgindegi «Turan» sharýa qojalyǵynda ótken jıynǵa kelgen qatysýshylar, aldymen, maqta alqaptaryn aralaýdan bastady. 

Bıologıa ǵylymdarynyń doktory A.Sultanov pen Aýyl sharýashylyǵy ǵylymdarynyń kandıdaty Á.Álıev sorttardyń erekshelikteri týraly áńgimelep berdi. Ereksheligi sol, bul maqta talshyǵynyń uzyndyǵy kádimgi suryptaǵy maqtaǵa qaraǵanda áldeqaıda joǵary. Iaǵnı, «Túrkistan» maqtasynyń talshyǵy 4-úlgige jatady. Maqtanyń bul túri toqyma ónerkásibinde keńinen paıdalanylady. Endi túrkistandyq kásipkerler Ońtústiktegi toqyma kásiporyndaryn jergilikti shıkizatpen qamtýǵa tolyq kepildik bere alady.Aıta keteıik, túrkistandyq maqtashylar bıyl 17 myń tonna shıtti maqta jınaýǵa nıetti. Qala ákiminiń orynbasary T.Musaevtyń aıtýynsha, Túrkistanda ótken jyly 3500 gektar jerge maqta egilse, bıyl bul kórsetkish 6600 gektarǵa ulǵaıǵan. Mine, osylaısha Túrkistan maqtany asyldandyryp, elge óz eńbegin sińirýde. 

rgmedia.kz