«Qazaq eli telehıkaıasy» kórermenimen jaqyn arada qaýyshatyn boldy dep habarlaıdy «Qamshy» portaly. Qazaq handyǵynyń 550 jyldyǵyna oraı jaryqqa shyǵýy tıis teletýyndy 2015 jyly kórermen nazaryna usynylýy tıis edi. Buǵan deıin kınonyń basy-qasynda júrgen belgili azamattar fılmniń jaryqqa shyǵýyna túrli datalardy berip kelgenimen, keshiktirilgen bolatyn.

Aıta ketetin bolsaq, telehıkaıa qyrýar qarjy bólinse de «jetpeı qalyp», bólimderi sany da qysqartylǵan bolatyn.

Telehıkaıanyń qashan jáne qalaı jaryqqa shyǵatynyn Mádenıet jáne Sport mınıstri Arystanbek Muhamedıuly óziniń Fasebook paraqshasynda jazdy.

«Qurmetti dostar!

Búgin Astana qalasyndaǵy "Qazaqstan" ortalyq konsert zalynda "Qazaq Eli" serıalynyń kınonusqasy – "Almas qylysh" fılminiń tusaýkeseri ótti. Bul aýqymdy tarıhı jobanyń avtory – QR Prezıdenti N. Á. Nazarbaev. Fılm QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy "Qazaqfılm" AQ "CentaurusRustemAbdrashevproduction" JSHS-niń qatysýymen túsirilgen.

Elbasy qazaqstandyq buqaralyq aqparat quraldaryna bergen suhbatynda: "Kereı men Jánibek –Shyńǵys hannyń urpaqtary. Olar 550 jyl buryn Shýdyń boıynda Qazaq handyǵyn qurdy. Sonyń bári bizdiń jastarǵa, bizdiń urpaǵymyzǵa tamyrymyzdyń tereń ekenin kórsetedi. "Tamyry tereń qara emen, qasqaıa kúter daýyldy" degen naqyl bar. Tamyryń tereń bolsa, qandaı daýyl bolsa da qasqaıa kóteresiń. Tarıhymyzdy zerttep, halqymyzdyń tarıhymyz týraly bilimin arttyrý qajet", - degen bolatyn. 
Fılm týraly: HV ǵasyrdyń orta tusy. Qara teńiz jaǵalaýynan Mońǵolıaǵa deıingi Eýrazıa keńistiginde bir kezde zor qýatty ımperıa bolǵan Altyn Orda qulaǵannan keıin birneshe jeke handyqtar quryldy. Olardyń ishinen qazirgi Qazaqstannyń aýmaǵyn jaılap jatqan Aq orda erekshelendi. Aq orda bıligi Shyńǵysqannyń nemeresi, Joshynyń úlken uly Orda Ejenniń áýletine tıesili boldy. Arada ýaqyt óte kele Shaıbanıtterdiń kishi tarmaǵynan shyǵatyn Ábilqaıyr óz bıligin kúsheıtip, jeke handyq qurdy. Ol kóshpendilerge qatygez, aıaýsyz saıasat ustanǵan bolatyn.
1460 jyl. Orda Ejennińupaqtary– Kereımen Jánibektiń aınalasyna birikken ondaǵan myń kóshpendiler aqsaqaldar keńesinde sheshim qabyldap, Ábilqaıyrdan bólinip shyǵady. Sultandar Moǵolstannyń shekarasyna deıin jetkende, jergilikti bıleýshi Esen-buǵa olarǵa qonys berýge kelisedi. Esimi ańyzǵa aınalǵan abyz Asanqaıǵy da kóshke ilesip, bólinip shyǵýǵa sebep bolǵan oqıǵalardy jyryna qosady.
Jánibek pen Kereı Ábilqaıyrdyń handyǵynan bólinip, óz ulystaryn qurýǵa bekindi. Kereı men Jánibekke qosylǵan rýlardyń basshy-bıleri quryltaı ótkizedi. Eń aldymen, judyryqtaı jumylǵan yntymaq kerek ekenin eskergen olar Kereıdi han saılap, Qazaq handyǵynyń qurylǵanyn pash etedi. 
 Fılmniń senarıi İlıas Esenberlınniń "Almas qylysh" romanynyń negizinde jazylǵan. 
 Fılmniń rejıseri – Qazaqstan Respýblıkasynyń Eńbek sińirgen qaıratkeri, kınorejısser, senarıst jáne sýretshi Rústem Ábdirashov. Ol "Quraq kórpe", ""Qaladan kelgen qyz", "Stalınge syılyq", Elbasy joly kınoepopeıasynyń: "Balalyq shaǵymnyń aspany", "Ot-ózen", "Temirtaý", "Tyǵyryqtan jol tapqan" atty kınotýyndylarynyń avtory.
Fılmniń túsirilim jumystary Almaty jáne Almaty oblysynda ótken. Túsirilimniń bir bóligi "Qazaqfılmniń" pavılondarynda qurylǵan dekorasıalarda, sonymen qatar kınostýdıanyń aýmaǵynda sýretshiler turǵyzǵan Shaıbanshahtyń saraıynda ótken. Fılmdi jasaýǵa 500-den astam adam jumyldyrylǵan, olardyń 200-ge jýyǵy túsirilim tobynyń músheleri. Túsirilimder bes aıǵa sozylyp, 30 nysan paıdalanylǵan.

"Almas qylysh" fılmi jalpyulttyq prokatqa 2017 jyldyń qańtar aıynan bastap shyǵady.

Qoıýshy-rejısseri: Rústem Ábdirashov
Senarı avtorlary: Smaǵul Elýbaı, Tımýr Jaqsylyqov, Rústem Ábdirashov
Qoıýshy sýretshileri: Ómirzaq Shmanov, Sábıt Qurmanbekov, Edil Núsipov pen Jannat Baımuqanovanyń qatysýymen
Qoıýshy operatorlary: Sapar Koıchýmanov, Aleksandr Plotnıkov jáne Andreı Maslov.
Bas prodúseri: Arman Ásenov
Fılmniń prodúseri: İńkár Ábdirash
Kompozıtory: Ábilqaıyr Ábdirash
Basty rólde: Qaırat Kemalov, Erkebulan Daıyrov, Dosqan Joljaqsynov, Iisbek Ábilmájınov, Aıan Ótepbergen, Meıirǵat Amangeldın, Nıazbek Shaısultanov, Bekbolat Tileýhan, Arman Qoja, Shuǵyla Saparǵalı, Madına Esmanova, Qarlyǵash Muhamedjanova, İńkár Ábdirash, Dinmuhamed Aqymov jáne basqalar.»