Mańǵystaý oblysynyń Beıneý aýdanyndaǵy J.Kaldyǵaraev atyndaǵy orta mektepte 8-shi synyp oqýshysy Ǵalymjan Kúzembaevqa «Órtte kórsetken qaısarlyǵy úshin» atty medali saltanatty jaǵdaıda tabys etildi dep habarlaıdy www.inform.kz. Mektep oqýshysy órt tutanǵan úıde qalyp qoıǵan kórshisiniń balalaryn aman alyp qalǵan. «2016 jyldyń 7 qarashasy kúni jergilikti saǵat 11-50 mınýttar shamasynda Beıneý aýylyndaǵy turǵyn úıde órt oryn alǵandyǵy jóninde habar kelip tústi. Oqıǵa ornyna Mańǵystaý oblystyq Tótenshe jaǵdaılar departamentiniń «Órt sóndirý jáne apattan qutqarý jumystary qyzmetiniń» №6 órt sóndirý bóliminiń brıgadasy attandy. Órt tutanǵan kezde úı ishinde 2010, 2011, 2012 jyldary týǵan balalar qalyp qoıǵan. Olarmen kórshi turatyn oqýshy, balalardyń órtengen úıdiń terezesinen shyǵýyna kómektesip, olardy aman alyp qaldy. Oqıǵa ornyna kelgen mamandar órttiń oryn alýyna jatyn bólmedegi úıde paıdalanylatyn tehnıkalyq qurylǵylardyń sebep bolǵandyǵyn anyqtady»,-dep habarlady Mańǵystaý oblystyq Tótenshe jaǵdaılar departamentiniń baspasóz hatshysy Gúlnár Qojabekova. Ǵalymjanǵa sondaı-aq qutqarýshylardan alǵys hat pen baǵaly syılyq tabys etildi. «QR azamatyna laıyqty áreket, al, osy áreketke basqa emes mektep oqýshysynyń barýy bizdiń elimizde patrıotızmge baǵyttalǵan urandarmen emes, óz isin naqty áreketimen kórsete alatyn urpaqtyń ósip kele jatqandyǵynyń belgisi. Ǵalymjan - naǵyz úlgi bolarlyq azamat!»,-dedi Mańǵystaý oblystyq Tótenshe jaǵdaılar departamentiniń basshysy Qýanar Bazarbaev. Osy kúni Mańǵystaý oblystyq Tótenshe jaǵdaılar departamenti tarapynan Táýelsizdiktiń 25 jyldyǵyna oraı «Mektep oqýshysy» degen ataýmen uıymdastyrylǵan sýretter baıqaýynyń jeńimpazdary da maratapattaldy.