Keshe UQK qyzmetkerleri komıtetti 2001-2006 jyldary basqarǵan Nartaı Dútbaev pen Nurlan Hasen jáne Erlan Nurtaev degen eki azamatty ustaǵan bolatyn. Bul oqıǵa qoǵam nazaryn aýdaryp, qyzý talqyǵa negiz boldy.

Dútbaevqa jáne onymen birge ustalǵan eki azamatqa ázirge «Memlekettik qupıalardy jarıa etti» jáne «Laýazymdyq ókilettikterin asyra paıdalandy» degen aıyptar taǵylyp otyr. Tergeý organdary resmı habarlamadan basqa, atalǵan istiń mán-jaıyn ashyp aıtpady.

N. Dútbaevtiń UQK-ni bes jyl ýaqyt basqarǵanyn, ol jyldary elde saıası mańyzy bar iri oqıǵalardyń bolǵanyna qarap, onyń tutqyndalýynan saıası sebep izdeýshiler de joq emes.

Máselen, Dútbaevpen birge UQK abaqtysyna jabylǵan Nurlan Hasenniń 2013 jyly Qazaqstannyń Italıadaǵy elshiliginde saıası máseleler jóninde keńesshi bolyp qyzmet atqarǵany aıtylýda. Sol 2013 jyly N. Hasenniń ústinen Rım prokýratýrasy qylmystyq is qozǵaǵany belgili bolyp otyr. Corriere della Sera habarlaýynsha, Italıada Qazaqstan elshiligi qyzmetkerine qatysty tergeý amaldary júrgen. Rım prokýratýrasy N. Hasendi jáne elshiliktiń taǵy eki qyzmetkerin qazaqstandyq eks-bankır M. Áblázovtiń áıeli Alma Shalabaevany Italıadan Qazaqstanǵa ekstradısıalaý máselesine baılanysty tergegen. Italıa prokýratýrasy Qazaqstannyń quqyqqorǵaý organdary júrgizgen bul operasıany zańsyz dep tanyp, adam urlyǵymen teń dep baǵalaǵan.  Keıin A. Shalabaevanyń qaıtadan Qazaqstannan shyǵyp ketýine múmkindik jasalǵanymen, tergeýdiń qalaı aıaqtalǵany ázirge belgisiz.

N. Dútbaevtyń ustalýyn M. Áblázovpen baılanystyrýdaǵy basty sebep – osy. Esterińizge salsaq, keshe ustalǵan N. Dútbaevtiń qazir qamaýda otyrǵan Muhtar Jákishevpen (eks-bankır M. Áblázovpen dostyq qarym-qatynasy bar – red.) baılanysyna qatysty vıdeo jarıalanǵan bolatyn.