Mınıstrde adam, ol da tamaqtanýy kerek. Lajy bolsa toıymdy jáne densaýlyqqa paıdaly bolsa. Ol halyqqa qyzmet etip júrgen adam ǵoı.
caravan.kz mınıstrler qaıda túski asyn iship, ol qansha turatynyn bildi. Sonymen qatar, assortımentimen, bılik, parlament jáne qarapaıym halyq tutynatyn asqanadaǵy tamaqtardyń baǵasyn bilip qaıtty.
Meıramhanaǵa barmaıyn dese, halyqtan qorqady
Eń aldymen biz Astananyń Sol jaq jaǵalaýyndaǵy memlekettik qyzmetkerler men halyq qalaýlylary otyratyn aımaqta ornalasqan meıramhanaǵa kirdik.
Joǵary sanatty meıramhananyń tabaldyryǵynan attap, sheneýnikterdiń bul meıramhananyń turaqty tutynýshylary ekenin bildik. Olar kúndelikti túski asyn osy meıramhanada ishedi eken.
«Ádette bizge Mınıstrler úıinen depýttar, dıplomattar, «QazMunaıGaz» kásipkerleri keledi. Máselen, Zaǵıpa óziniń depýtat qurbylarymen otyrady. Keshke kınodan shyqqannan keıin, otbasymen keledi. Jańa jylda ázirshe olardy kórmedim. Ketip qalǵan shyǵar. Nurlan Smaǵulov pen Bolat Ótemuratovtar meıramhanamyzǵa kelip dám tatqan. A.Másimov pen Jaqsybekovti kórmedim» deıdi «rokko-barokko» stılindegi meıramhananyń ákimshisi Marlen.
Marlen ıtalıandyq belgili dızaınerdi emes, rokoko jáne baroko sáýlettik stılin aıtqan bolar. Meıramhana qabyrǵasynda joǵary shendi azamattar ózin sypaıy ustap, shaı pulǵa únemi jomarttyq tanytady.
«İsker, sypaıy, kúndiz kóbine ishpeıdi (alkogól). Keshkisin mundaı sanattaǵy qonaqtar sırek keledi. Biz ortalyqta, Baıterektiń janynda ornalasqanbyz ǵoı. Múmkin qorqatyn shyǵar. Malaızıa, Izraıl, Shveısarıa, qytaılyqtar, fransýzdar bizdiń turaqty qonaqtarymyz» deıdi Marlen.
«Kóptegen adamdar bizge kelýge qorqady. Bálkim ınterer úrkitetin shyǵar. Biraq baǵalarymyz aıtarlyqtaı qorqynyshty emes» dep sózin jalǵastyrdy Marlen.
«Qorqynyshty baǵa emes» eken. Máselen sharap – 570 myń teńge jáne fýa-gra 12 myń teńge. Salattardyń baǵasy - 1 800-den, qoı etinen jasalǵan taǵamdar – 2 800-den bastalady, jylqy etinen jasalynǵan tamaq – 5 myń teńge turady.
«Eń qymbat sharapqa reseılikter, ýkraındyqtar tapsyrys beredi. Óz otandastarymyz da qymbat sharapty jaqsy kóredi. Ótken jyly ýkraındyq top mıllıonnan asatyn sommaǵa tapsyrys berdi. Eń qymbat sharap ishti. As 100 myńǵa shyqty. Bizde eýropalyq taǵamdardy daıyndaıdy. EKSPO aldynda barlyǵy alǵa jyljyp jatyr. Biz de as mázirimizdi tolyqtyryp jatyrmyz. Halyqty endi mıdıalarmen tań qaldyra almaısyń. Daǵdarysqa baılanysty baǵany 20-25% tómendetip jatyrmyz. Meıramhanamyzdy barlyq halyq sanattaryna qoljetimdi etkimiz keledi» dep aldaǵy josparymen bólisti meıramhana ókili.
Gollıvýdtan Maıamıǵa deıin
«Juldyzdy» ataýy bar basqa meıramhanaǵa keldik. Mańdaıshadaǵy jazý men meıramhana bir-birine rasymen-aq sáıkes kelip tur. Belgili bolǵandaı, munda da joǵary baǵany qaltasy kóteretin VIP-tutynýshylar keledi.
Mázir tek baǵasy turǵysynan ǵana emes, taǵamdardyń ataýynan da, keletin qonaqtaryń shekteýsiz múmkindikterin bildirip turǵandaı.
«Gollıvýd», «Italáno», «Maıamı» salattary (3800-den 7 myńǵa deıin), “Pate Fýa De Parı” jeńil tamaqtary (2 100), rolldar «Blek Bıf Sıgara» (4900), baldarkókten jáne shópten jasalynǵan nan planshedegi teńiz taraqgúldiler (6 800 tenge) turady. Tamaqtyń ataýynyń ózinen tábet ashylady.
«Ǵanı Qasymov, bilim mınıstri Erlan Saǵadıev, mádenıet mınıstri Arystanbek Muhamedıuly bizdiń turaqty qonaqtarymyz. Depýtattardy kostúmderine taǵyp alǵan belgiden bilemin. Sonymen qatar, Ilá Ilın, ánshi Almas Kishkenbaev ta kelgen» deıdi daıashy Damır.
Baǵa qýantty, sapasy kóńil qaldyrdy
Al premer-mınıstr men onyń komandasy qaıda tamaqtanady? Baqytjan Saǵyntaevtyń taǵamdaǵy qalaýlaryn bilýge múmkindik bolmady. Sebebi mınıstrler kabınetiniń jınalysynan keıin baspasóz qyzmetiniń ókili premer-mınıstrdi jýrnalıserden barynsha qorǵap baqty.
Al aýyl sharýashylyǵy mınıstri Asqar Myrzahmetov Úkimet úıinde nemese mınıstrlikte tamaqtanatynyn bildik.
«Ne bar, sony jeımin. Úkimet úıiniń asqanasynda túski as 2 myń teńgege shyǵady. Al keshki asty únemi úıde ishemin» dep aǵynan jaryldy Asqar Isabekuly.
Úkimet úıiniń as mázirine biz de baǵa berdik. Tamaqtardyń baǵasy kóz qýantady. «Aqserke» salaty – 135 teńge, grek salaty – 199 teńge, etpen daıyndalǵan harcho sorpasy – 256 teńge, qara óriktegi qoı eti - 464 teńge, palaý – 380 teńge turady. Mázirde sút ónimderi de bar. 250 gram aırandy 83 teńgege satyp alýǵa bolady.
Al tamaqtardyń sapasy kóńilden shyqpady. Dámin tatyp kórý úshin satyp alǵan 56 teńgelik botqa óte suıyq bolyp shyqty. Al kúrish pen etten jasalynǵan bálish qatty kúıip ketken. Barlyǵy shaımen qosqanda 215 teńgege shyqty.
Aıtpaqshy, árbir ústelde durys tamaqtaný týraly jadynama jatyr. Bul VIP-tamaqtar usynatyn jerlerdiń joralǵysy. Depýtattarǵa botqanyń paıdasy men fast-fýdtyń zıanyn eskertedi.
Ýaqyt tapshylyǵy men qamqor áıelder
Úkimet múshelerine qaıtyp oralaıyq. Qarjy mınıstri Bahyt Sultanov ýaqyt tapshylyǵyna baılanysty, kóbine Úkimet úıinde tamaqtanady.
«Nemese áıeli oǵan tamaq salyp berip jiberedi» deıdi Iýlıana Jıhor.
Biz qarjy mınıstri úshin qýanyshtymyz. Sebebi barlyǵynda birdeı mundaı qamqor áıel joq.
Burynǵy ulttyq ekonomıka mınıstri Erbolat Dosaev «QazMunaıGazdyń» janynda ornalasqan meıramhanaǵa barǵandy jón kóredi.
Mınıstrler kabınetiniń burynǵy basshysy, qazirgi UQK tóraǵasy Kárim Másimov buryn Astananyń Oń jaq jaǵalaýynda ornalasqan qonaq úıdiń meıramhanasynda tamaqtanǵan eken. Kárim Másimovtiń as talǵamyn bilmedik. Onymen qosa ulttyq qaýipsizdikke jaýap beretin adamnyń as mázirine ne kiretinin kópshilik bilmegeni de abzal.
Ulttyq banktiń burynǵy tóraǵasy, qazirgi «Astana» halyqaralyq qarjy ortalyǵynyń basqarýshysy Qaırat Kelimbetov ártúrli derekkózden alynǵan málimet boıynsha, burynda Oń jaqtaǵy jaǵalaýda ornalasqan meıramhanalarda ádette ıtalıandyq taǵamdarǵa tapsyrys beredi eken.
Mınıstrler kabınetine jaqyn júrgen adamdardyń aıtýynsha, sheneýnikter pısserıaǵa barǵandy unatady.
Investısıa men damý mınıstriniń orynbasary Albert Raý keshki asyn ishpeıdi. Tek shaımen ǵana shekteledi. Al túski asty jumys ornynan shalǵaıda ornalasqan japondyq meıramhanada ishedi.
«Túski asqa 40 mınýt jumsaımyn. Úzilis kezinde jumys istep úlgeremin. Ortasha chek 4,5 myń teńgege shyǵady» deıdi Albert Raý.
Daǵdarys, basqa da faktorlar parlament asqanasyndaǵy taǵam baǵasyna áser etpedi. Salattar – 114-ten 198 teńge aralyǵynda. Suıyq taǵamdar 266 teńgeden qymbat emes. Qoıý tamaqtar – 400 teńge kóleminde. Qus etinen daıyndalǵan káýap - 673 teńge turady. Al kókserke 626 teńgege shyǵady.
Mınıstrler úıindegi asqanada baǵa VIP tamaqtaný mekemelerindegi baǵadan ózgerek. Memlekettik qyzmetkerlerdiń ózi mázirdegi taǵam alýandylyǵy joq, al baǵasy qymbat ekenin birneshe jyldan beri aıtyp keledi.
«Jarty suıyq tamaq, garnırmen et jáne kompot – 800 teńge turady. Bir aptada túski tamaqqa 4 myń teńge ketedi. Kóbi aqshasyn únemdeý úshin tamaqty úıden alyp keledi. Úsh jyl boıy tamaq baǵasy ózgermeı keledi. Al astyń porsıalary men tamaq alýandylyǵy ózgerissiz. Grek salaty, fransýz eti mázirde joq. Turaqty tutynýshylar úshin qymbat dep sheshken bolar» dep topshylaıdy memlekettik qyzmetker.
Memlekettik qyzmetkerler demalys kúnderi Oń jaq jaǵalaýda dámdi taǵamdardan dám tata alady. Ońtústik astananyń ataýy qoıylǵan kafe áli kúnge deıin halyq arasynda zor suranysqa ıe. Sebebi baǵasy da jaqsy, tamaqtary da dámdi.
Laǵman men basqa da taǵamdar - 350 teńge, qoıý taǵam ortasha eseppen - 400, 500 teńge turady. Eń qymbat taǵam qýyrdaq. Ol – 900 teńge turady. Salattar 380 teńgeden aspaıdy.
Sheneýnikter, depýtattar men qatardaǵy azamattardyń ómir súrý deńgeıi jer men kókteı. Ekeýi eki álemde turyp jatyr. Biri qara nandy mise tutsa, endi biri túski asqa fýa-gra men arqan balyq jeıdi.
Aýdarǵan: Ásem Álmuhanbet
