Óreli sóz ustaǵandardyń eldi de ustaıtyny tarıhtan belgili. Biz munda tobyrdy aıtyp otyrǵan joqpyz nemese sózdiń kıesin bilmeıtin «qalamgersymaqtardy» da aıtyp otyrǵan joqpyz. Kimniń qalamǵa súıenip turǵanyn, kimniń qalamdy súıep turǵanyn oqyrman men ýaqyt belgileıdi. Bizdiki «Qazaq ádebıeti» deıtin altyn teńizde qaı qalamgerdiń qandaı eskek ustap júrgendigin, qaı arnada aǵyp jatqanyn búgingi oqyrman tarazysyna salý. Oqyrman oıyn dóp basyp, qyzý talqylanǵan qýatty sózdiń ıesin der shaǵynda baǵalaı bilip, kitabyn shyǵarýǵa «Qamshy» saıty qal-qaderinshe tyrysyp baǵady. Ádil tóreshi bolýǵa sizde tyrysyp kórińiz óreli oqyrman!

Men seni Táńirden suradym, mama, Osy arýdyń qursaǵyna bitemin dep. Men sen úshin talaı jyladym, mama, Aqynnyń anasy bop ótedi dep.   Men seni jubata almaımyn, mama, Araıly bir tańyń atady dep. Men bul ómirdi unata almaımyn, mama, Qabyrǵama bar muńy batady kep.   Men ómirdi sonda da súıippin, mama, Syzdaıdy tek ishte, jaram ǵana. Men bar muńnan bıikpin, mama, Men úshin alańdama!   Bul ómirde qaı aqyn jaryǵan, mama? Júrgen soń taǵdyrdyń ótinde kóp. Bar bolmysym ózińnen daryǵan, mama, Sen ǵaryshty týǵanyńa ókinbe tek.   Sen meni qazaqqa syıladyń, mama, Ǵajaptardan qaǵylsań da. Men seni azapqa qımadym, mama, Qansha jyl saǵynsam da.   Áıtpese, bilseń ǵoı, janym, mama, İshim meniń – sheksiz álem. Bul meniń sorym ári baǵym, mama, Janarymdaǵy óksik óleń.   İshim meniń gúlderge toly ǵoı, mama, Nurǵa da toly júregim aq. Bizdiń taǵdyr – azap joly ǵoı, mama, Áıteýir tilegim aq.   Ákem – Táńir, óziń – Umaısyń, mama, Al, men – Qudaıdyń balasymyn. Sen báribir maǵan unaısyń, mama, Kózimdegi qarashyǵym..!  

  Jetinshi ákem ishimde meniń, Jylaıdy aspan tezinen. Sansyz belgi. Túsinbegenmin, Baıqamaǵanmyn, Sezinem.   Bóten sezim, Ózge paıymmen, Óte me eken tegi ómir. Endi kimmen, qandaı oıynmen, Synaıdy eken meni Táńir?   Tanys emes myna tústerim, Beıtanys tym maǵan álem. Kúrsinedi únemi ishtegi, Syrtqa shyqpaı qalǵan óleń…   Qaıda bastap barady meni, Myna súrleý, myna jaryq. Kúnder, jyldar tonady meni, Qaı kóshede tura qalyp?   Qupıaǵa jetemin dedim, Oılan, sura, aqymaǵym! Qys kelgende bitedi seniń, Dirildegen japyraǵyń…   İshimdegi jetinshi ákeniń, Daýysy tur ǵoı jańǵyryp. Kimsiń óziń meniń bótenim, Qaıdan kelgensiń qańǵyryp? ..   Jaýap bermeıdi. İshimde meniń, Jylaıdy taǵy qansha rýh. Men eshteńe túsinbegenmin, Aqymaq bolar ma em, sonshalyq…    

  Men baıaǵy balamyn, kekildimin, Men birdeńe biletin sekildimin. Túnde meni qushaqtap jatady muń, Tańsáride súıedi betimdi Kún.   Armandar men kúıreýler arasynda, Tońyp turmyn ómirdiń jaǵasynda. Tústerimde sabylyp san arýaq, Bireý maǵan sybyrlar tań astynda.   Sharshadym ba ómirden, Jalyqtym ba, Jumaq sonda… Bilemin, tamuq munda. Meniń ishki dúnıemdi alastaýǵa, Qudyreti jetpeıdi-aý jaryqtyń da.   Bir úmitti izdeımin beker kúnnen, Óleń jazdym… Al, sodan óteldi nem? Náresteniń ıisin ańsap júrmin, Álde qatty saǵyndym ákemdi men?.    

  Taǵdyr meni synady, baǵynbadym, Jaýlar maǵan tap berdi, alynbadym. Jaýtańdaýdy bilmedim, jábirlensem, Ózimnen kúshtilerge jalynbadym.   İshte sherim bolsa da, oıymda muń, Taǵdyr meni synady, moıymadym. Túnek bassa jer betin, tań bop attym, Kún kúıdirse, tún bolyp jaıylamyn.   Taǵdyr meni synady, basylmadym, Túsinbese ókpem joq, qasymdaǵym. Meıirimdi adamǵa quraq ushtym, Álsizderdi eshqashan basynbadym.   Taǵdyr meni synady, qulamadym, Óksik qysyp tursa da, jylamadym. Meni osyndaı jaratqan Táńirimnen, Tek sabyr men parasat suraǵanym.   Taǵdyr meni synady, úmit kórem, Bárin-bárin umyttym, umyt degem. Myqty bolý kerek qoı er adamǵa, Qasqaıyp ólý kerek jigit degen!  

  Júregimdi kúıretpender, Eshteńeni úıretpender, Unamaǵan, unaǵan bar, Eshnárseni suramańdar, Kózin súrtsin jylaǵandar, Kóterilsin qulaǵandar! Keshirinder, renjimender, Minegen men synaǵandar. Esh adamǵa aqtatpandar, Esh adamǵa joqtatpandar. Esh adamǵa dattatpandar, Óleńimdi jattatpandar, Tiri janǵa maqtatpandar, Tylsymdanǵan appaq tańǵa, Ketip baram, toqtatpandar!